ట్రంప్ ఆదేశం, అమెరికా చేతిలో ఇరాన్ టాప్ కమాండర్ హతం: పెరిగిన చమురు ధరలు

ఇరాక్ రాజధాని బాగ్దాద్‌లోని ఇంటర్నేషనల్ విమానాశ్రయంపై రాకెట్ దాడి జరిగింది. శుక్రవారం ఉదయం జరిగిన ఈ దాడిలో ఇరాన్, ఇరాక్ దేశాలకు చెందిన ఉన్నతస్థాయి కమాండర్లు సహా ఎనిమిది మంది మృతి చెందారు. ఇరాన్ నిఘా విభాగం ఖడ్స్ ఫోర్స్ అధినేత జనరల్ ఖాసీమ్ సోలేమన్ కూడా మృతి చెందాడు. ఇరాక్‌లో ఇరాన్ మద్దతు ఉన్న తిరుగుబాటు సంస్థ పీఎంఎఫ్ డిప్యూటీ కమాండర్ అబు మహది ఆల్ ముహందీస్ కూడా మృతి చెందాడు.

దాడి... 4 శాతం పెరిగిన చమురు ధరలు

కాగా, బాగ్దాద్ ఇంటర్నేషనల్ విమానాశ్రయంపై జరిగిన దాడిని తామే చేసినట్లు అమెరికా రక్షణ విభాగం పెంటగాన్ ధృవీకరించింది. ఖాసీమ్ సోలెమన్‌ను చంపాలన్న అమెరికా అధ్యక్షులు ట్రంప్ ఆదేశాల మేరకు ఈ దాడి నిర్వహించినట్లు తెలిపింది. ఈ దాడి నేపథ్యంలో ప్రపంచవ్యాప్తంగా చమురు భయాలు కమ్ముకున్నాయి. తాజా ఉద్రిక్తతల నేపథ్యంలో అంతర్జాతీయ మార్కెట్లో చమురు ధరలు 4 శాతం వరకు పెరిగాయి.

ఎంత పెరిగిందంటే?

4 శాతం వరకు పెరిగిన చమురు ధరలు స్థానిక కాలమానం ప్రకారం నిన్న ఉదయం గం.11.14 సమయానికి బ్రెంట్ క్రూడాయిల్ బ్యారెల్‌కు 2.88 శాతం పెరిగి 68.14 డాలర్ల వద్ద ఉంది. యూఎస్ క్రూడాయిల్ 2.70 శాతం పెరిగి 62.82 శాతం వద్ద ఉంది.

పరిస్థితులు మరింత ఉద్రిక్తంగా...

తాజా ఘటనతో మధ్య ఆసియా ప్రాంతంలో పరిస్థితులు ఉద్రిక్తంగా మారే అవకాశాలు ఉన్నాయని అంచనా వేస్తున్నారు. ఈ దాడికి ప్రతీకారంగా ఇరాన్ సహా దానికి మద్దతిస్తున్న దేశాలు తీవ్రస్థాయిలో విరుచుకుపడే అవకాశాలు లేకపోలేదని అంటున్నారు. ఈ నేపథ్యంలో చమురు ధరలు మరింత పెరిగే అవకాశాలు ఉన్నాయి.