చమురు ధరలు పెరుగుదలపై షాకింగ్ న్యూస్.. బ్యారెల్‌కు 150 డాలర్ల నుంచి 200 డాలర్లకు.. మక్వారీ వార్నింగ్ ఇదే..

ఇరాన్, ఇజ్రాయెల్, అమెరికా మధ్య ఉద్రిక్తతలు యుద్ధంగా మారిన నేపథ్యంలో.. అంతర్జాతీయ ముడి చమురు మార్కెట్ భయంకరమైన దిశగా పయనిస్తోందని ప్రముఖ ఆర్థిక విశ్లేషణ సంస్థ మక్వారీ (Macquarie) హెచ్చరించింది. ఇప్పటివరకు చమురు ధరలు బ్యారెల్‌కు 150 డాలర్లకు చేరుతాయని విశ్లేషకులు భావించగా.. మక్వారీ అంతకు మించి ఏకంగా 200 డాలర్లస్థాయికి చేరువయ్యే ప్రమాదం ఉందని ప్రపంచ దేశాలను అప్రమత్తం చేసింది. ఈ పరిణామం ప్రపంచ ఆర్థిక వ్యవస్థపై, ముఖ్యంగా భారతదేశం వంటి దిగుమతులపై ఆధారపడే దేశాలపై ఊహించని ప్రభావాన్ని చూపనుంది.

చమురు ధరలు ఈ స్థాయికి పెరగడానికి ప్రధాన కారణం సరఫరా గొలుసులో తలెత్తే అంతరాయం. ఇరాన్ యుద్ధంలో నేరుగా పాల్గొనడం వల్ల ప్రపంచ చమురు రవాణాలో కీలకమైన 'హార్ముజ్ జలసంధి' (Strait of Hormuz) మూతపడే అవకాశం ఉందని మక్వారీ విశ్లేషించింది. ప్రపంచవ్యాప్తంగా సరఫరా అయ్యే చమురులో దాదాపు 20% ఈ మార్గం గుండానే వెళ్తుంది. ఒకవేళ ఈ మార్గం మూసుకుపోతే, చమురు కొరత ఏర్పడి ధరలు నియంత్రణ కోల్పోతాయని, అది ప్రపంచవ్యాప్తంగా ఎనర్జీ షాక్ కు దారితీస్తుందని హెచ్చరించింది. ఇది కేవలం ధరల పెరుగుదలే కాకుండా, ప్రపంచవ్యాప్త ద్రవ్యోల్బణాన్ని (Inflation) కొత్త శిఖరాలకు చేరుస్తుంది.

భారతదేశం తన చమురు అవసరాలలో 85 శాతానికి పైగా దిగుమతుల ద్వారానే తీర్చుకుంటుంది. మక్వారీ హెచ్చరికల ప్రకారం చమురు ధరలు 200 డాలర్లకు చేరితే, భారత రూపాయి విలువ దారుణంగా పడిపోయే ప్రమాదం ఉంది. చమురు దిగుమతుల కోసం భారత్ భారీగా డాలర్లను వెచ్చించాల్సి రావడం వల్ల విదేశీ మారక నిల్వలు కరిగిపోతాయి. దీనివల్ల దేశీయంగా పెట్రోల్, డీజిల్ ధరలు లీటరుకు రూ. 150 నుండి రూ. 200 వరకు పెరిగే అవకాశం ఉంటుంది. ఈ ధరల పెరుగుదల రవాణా రంగాన్ని దెబ్బతీసి, పండ్లు, కూరగాయలు మరియు ఇతర నిత్యావసర వస్తువుల ధరలను సామాన్యుడికి అందనంత ఎత్తుకు తీసుకెళ్తుంది.

ప్రపంచ ఆర్థిక సంక్షోభం ఎంతో దూరంలో లేదు.. బ్లాక్‌రాక్ అధినేత సంచలన వ్యాఖ్యలు.. కారణం ఏంటంటే..

ఆర్థిక వృద్ధి విషయానికి వస్తే.. అధిక చమురు ధరలు దేశ జిడిపి (GDP) వృద్ధిని మందగింపజేస్తాయి. కంపెనీల ఉత్పత్తి వ్యయం పెరగడం వల్ల వాటి లాభాలు తగ్గి, స్టాక్ మార్కెట్లు మరింత పతనమవుతాయి. మక్వారీ విశ్లేషణ ప్రకారం, ఈ తరహా ఇంధన సంక్షోభం ప్రపంచాన్ని ఆర్థిక మాంద్యం (Recession) వైపు నెట్టే అవకాశం ఉంది. ఇప్పటికే వడ్డీ రేట్లు అధికంగా ఉన్న తరుణంలో, ఈ అదనపు భారం వినియోగదారుల కొనుగోలు శక్తిని పూర్తిగా దెబ్బతీస్తుంది.

ఏదేమైనా మక్వారీ నివేదిక ప్రపంచ దేశాలకు ఒక స్పష్టమైన హెచ్చరికను పంపింది. యుద్ధం కేవలం సరిహద్దులకే పరిమితం కాకుండా, ప్రతి సామాన్యుడి జేబుపై ప్రభావం చూపుతుందని స్పష్టం చేసింది. ఒకవేళ ముడి చమురు ధరలు 200 డాలర్ల మార్కును తాకితే, అది ప్రపంచ ఆర్థిక చరిత్రలో అత్యంత క్లిష్టమైన కాలంగా మారుతుంది. ఈ పరిస్థితులను ఎదుర్కోవడానికి భారత్ వంటి దేశాలు ప్రత్యామ్నాయ ఇంధన వనరులను వేగవంతం చేయడమే కాకుండా, వ్యూహాత్మక చమురు నిల్వలను సమర్థవంతంగా నిర్వహించాల్సిన అవసరం ఎంతైనా ఉంది.