వామ్మో.. హైదరాబాద్‌‌లో ఇదేమి డిమాండ్ సామి, వాటి అద్దె ధరలు చూస్తే కళ్లు బైర్లు కమ్మాల్సిందే..

ప్రపంచ ఆర్థిక పరిస్థితుల్లో అనిశ్చితి నెలకొన్నప్పటికీ.. ప్రధాన కార్యాలయాలకు మాత్రం డిమాండ్ పెరుగుతూనే ఉంది. ముఖ్యంగా దేశంలోని ప్రధాన నగరాల్లో కంపెనీలు తమ కార్యాలయాలను పెట్టాలంటే అధిక అద్దెలు చెల్లించాల్సిన పరిస్థితి నెలకొంది. ముఖ్యంగా ముంబై, హైదరబాద్, ఢిల్లీ, చెన్నై, బెంగుళూరు వంటి నగరాల్లో కార్యాలయాలు ప్రారంభించాలంటే కంపెనీలకు అద్దెల రూపంలో చుక్కలు కనిపిస్తున్నాయి.

గత రెండున్నర సంవత్సరాలలో ముంబై మెట్రోపాలిటన్ ప్రాంతంలో కార్యాలయ అద్దె 28 శాతం పెరిగిందని రియల్ ఎస్టేట్ కన్సల్టెంట్ అనరాక్ తెలిపింది.ప్రధాన మెట్రో నగరాల్లో అద్దె విలువలు భారీగా పెరిగాయని, వ్యాపారాలు పూర్తి స్థాయిలో కార్యాలయాల్లోకి తిరిగి రావడానికి మరింత కష్టపడాల్సి ఉందని రియల్ ఎస్టేట్ కన్సల్టెంట్ అనరాక్ తన నివేదికలో తెలిపింది.

ప్రధానంగా గణనీయమైన వ్యాపార విధాన అనిశ్చితిని ఎదుర్కొంటున్న అమెరికా.. భారతదేశంలోని మొత్తం ఆఫీస్ స్పేస్ లీజింగ్‌లో 45 శాతం వాటాను కలిగి ఉంది. ఇది అన్ని ఇతర దేశాల కంటే ముందుందని అనరాక్ గ్రూప్‌లోని కమర్షియల్ లీజింగ్ & అడ్వైజరీ MD ప్యూష్ జైన్ అన్నారు. భారతీయ గ్రేడ్ A కార్యాలయ స్థలాల కోసం అమెరికన్ కంపెనీల కోరిక ఏ మాత్రం తగ్గలేదని జైన్ అన్నారు.

2022 నుండి 2025 వరకు, మహమ్మారి తర్వాత తిరిగి పుంజుకునే క్రమంలో ప్రీమియం వర్క్‌స్పేస్‌లకు ఈ స్థిరమైన, పెరుగుతున్న డిమాండ్‌ ఆజ్యం పోసిందని అన్నారు. ముఖ్యంగా MMR, ఢిల్లీ-NCR హైదరాబాద్ వంటి హాట్‌స్పాట్‌లలో అద్దె ధరలు భారీగా ఉన్నాయని తెలిపారు. ముంబైలో సగటు నెలవారీ ఆఫీసు అద్దె 2022లో చదరపు అడుగుకు రూ.131 నుండి చదరపు అడుగుకు రూ.168కి పెరిగింది. ఇక ఢిల్లీ-ఎన్‌సిఆర్‌లో అద్దె చదరపు అడుగుకు రూ.92 నుంచి రూ.110కి 20 శాతం వృద్ధిని నమోదు చేసింది.

హైదరాబాద్‌లో ఆఫీసు అద్దె విలువలు 24.1 శాతం పెరిగి చదరపు అడుగుకు రూ.58 నుంచి రూ.72కి చేరుకున్నాయి. బెంగళూరులో ఆఫీసు అద్దె 2022లో చదరపు అడుగుకు రూ.82 నుంచి 16 శాతం పెరిగి రూ.95కి చేరుకుంది.పూణే, చెన్నై మార్కెట్లలో వరుసగా 11.1 శాతం మరియు 9.1 శాతం అద్దె పెరుగుదల మాత్రమే కనిపించింది. పూణేలో ఆఫీసు అద్దె చదరపు అడుగుకు రూ. 80, చెన్నైలో చదరపు అడుగుకు రూ. 72గా ఉందని నివేదిక తెలిపింది.

BHIVE వర్క్‌స్పేస్‌ల వ్యవస్థాపకుడు & CEO అయిన శేష్ రావు పాప్లికర్ ఈ డేటాపై వ్యాఖ్యానిస్తూ.. "బెంగళూరులో ఆఫీసు అద్దెలలో 16 శాతం పెరుగుదల వాణిజ్య రియల్ ఎస్టేట్‌లో స్థిరమైన పునరుజ్జీవనాన్ని సూచిస్తుంది, ఇది ప్రధానంగా సాంకేతికత, GCCలు (గ్లోబల్ కెపాబిలిటీ సెంటర్లు), సౌకర్యవంతమైన వర్క్‌స్పేస్ ప్రొవైడర్ల నుండి బలమైన డిమాండ్ ద్వారా నడిచింది." ఈ అద్దె పెరుగుదల భారతదేశ ప్రతిభ పర్యావరణ వ్యవస్థలు, మౌలిక సదుపాయాల ఆధునికీకరణ, కార్యాలయానికి తిరిగి వచ్చే ఆదేశాలపై పెరుగుతున్న విశ్వాసాన్ని ప్రతిబింబిస్తుందని ఆయన అన్నారు.

స్టోన్‌క్రాఫ్ట్ గ్రూప్ వ్యవస్థాపకురాలు & MD కీర్తి చిలుకూరి మాట్లాడుతూ, "భారతదేశంలోని ప్రధాన నగరాల్లో కార్యాలయ అద్దెల పెరుగుదల కొత్త వ్యాపార విశ్వాసాన్ని, భవిష్యత్తుకు సిద్ధంగా ఉన్న కార్యస్థలాల వైపు నిర్ణయాత్మక మార్పును సూచిస్తుందన్నారు. హైదరాబాద్ లో పెరిగిన 24 శాతం వృద్ధి బలమైన మౌలిక సదుపాయాలు, డైనమిక్ టాలెంట్ పూల్ మద్దతుతో టెక్, ఆవిష్కరణ-ఆధారిత సంస్థలకు గో-టు హబ్‌గా దాని పరివర్తనను హైలైట్ చేస్తుందన్నారు.