7 నెలల తర్వాత వృద్ధిబాట పట్టిన సేవారంగం

అక్టోబర్ నెలలో సేవారంగం పుంజుకున్నది. మార్చి నుండి వరుసగా 7 నెలల క్షీణిస్తూ వస్తున్న భారత సేవారంగం అక్టోబర్ నెలలో వృద్ధి బాటలోకి వచ్చింది. మార్చి చివరి వారం నుండి కరోనా లాక్‌డౌన్ వల్ల ఆ తర్వాత కార్యకలాపాలు లేకపోవడంతో ప్రతికూల వృద్ధిని నమోదు చేసింది సేవారంగం. కానీ గత నెలలో సానుకూల వృద్ధిని సాధించింది. సెప్టెంబర్ నెలతో పోలిస్తే సేవల రంగం పీఎంఐ (పర్చేజింగ్ మేనేజర్స్ ఇండెక్స్) 49.8 పాయింట్ల నుండి 54.1 పాయింట్లకు పెరిగింది.

పీఎంఐ సూచీ 50 పాయింట్లను మించితే ఆ రంగంలో వృద్ధిని సూచిస్తుంది. 50 పాయింట్ల లోపు ఉంటే క్షీణతకు సంకేతం. ఈ ఏడాది ఫిబ్రవరి తర్వాత పీఎంఐ సేవారంగ సూచీ 50 పాయింట్ల ఎగువకు నమోదు కావడం ఇది మొదటిసారి. తయారీ రంగం వలె సేవారంగం కూడా రాణించడం గమనార్హం. కరోనా కారణంగా ఇటీవలి వరకు ప్రతికూలత నమోదు చేసిన ఆర్థిక వ్యవస్థలో వేగవంత రికవరీ కనిపిస్తున్న సంకేతాలు ఉన్నాయి.

భారతీయ సేవారంగం ఆశాజనకంగా ఉందని, ఈ ఏడాది ప్రారంభం నుండి కరోనా వల్ల క్షీణించిన పరిస్థితుల నుండి ఆర్థిక వ్యవస్థ క్రమంగా కోలుకుంటోందని, ఇది ప్రోత్సాహకరంగా ఉందని ఐహెచ్ఎస్ మార్కిట్ ఎకనమిక్స్ అసోసియేట్ డైరెక్టర్ పోలీయానా డిలిమా అన్నారు.