IT news: మిసైల్‌లా దూసుకెళ్తున్న చిప్‌ మేకర్.. అమెజాన్ ఔట్, నెక్స్ట్ టార్గెట్ గూగుల్‌

Nvidia: మొన్నటికి మొన్న ఆపిల్‌ను వెనక్కునెట్టి మార్కెట్ క్యాప్‌లో మైక్రోసాఫ్ట్ ముందుకు దూసుకుపోయింది. ఇప్పుడు మరో కంపెనీ దాని బాటలోనే నడుస్తోంది. ఇటీవల అమెజాన్ క్రాస్ చేసిన సంస్థ తాజాగా గూగుల్‌ కు షాక్ ఇచ్చేందుకు రెడీ అయిపోయింది.

వాల్ స్ట్రీట్‌లో మూడవ అత్యంత విలువైన గూగుల్ మాతృసంస్థ ఆల్ఫాబెట్‌ను ప్రముఖ AI చిప్‌మేకర్ ఎన్‌విడియా(Nvidia) అధిగమించనున్నట్లు రాయిటర్స్ నివేదించింది. 2 దశాబ్దాల్లో మొదటిసారి అమెజాన్ మార్కెట్ క్యాపిటలైజేషన్‌ను అధిగమించిన తర్వాత మరో మైలురాయిని టచ్ చేసేందుకు సిద్ధమైంది. ఆయా కంపెనీలు తమ ఉత్పత్తులు మరియు సేవల్లో AIని చొప్పించడంతో టెక్ పరిశ్రమ నుంచి భారీగా ప్రయోజనం పొందుతున్నట్లు తెలుస్తోంది.

Nvidia మార్కెట్ క్యాప్ 1.78 ట్రిలియన్ డాలర్లకు చేరుకుంది. ఇది అమెజాన్ విలువ 1.75 ట్రిలియన్ డాలర్లను అధిగమించింది. గూగుల్ మాతృ సంస్థ ఆల్ఫాబెట్ స్టాక్‌లో 1.62 శాతం క్షీణత నెలకొనడంతో దాని మార్కెట్ విలువ 1.81 ట్రిలియన్‌ డాలర్లుగా ఉంది. మెటా ప్లాట్‌ఫారమ్‌ల వంటి ప్రధాన సాంకేతిక సంస్థలు Nvidia గ్రాఫిక్స్ ప్రాసెసర్‌లలో భారీగా పెట్టుబడులు పెడుతుండటంతో మార్కెట్ మరింత పెరవచ్చని విశ్లేషకులు భావిస్తున్నారు.

AI సెక్టార్‌లో Nvidiaకు గణనీయమైన భవిష్యత్ ఉందని నిపుణులు అంచనా వేస్తున్నారు. దాని త్రైమాసిక ఫలితాల కంటే ముందుగానే ఎన్‌విడియా స్టాక్‌ టార్గెట్‌ ను ప్రముఖ ఫైనాన్షియల్ గ్రూప్ మిజుహో పెంచింది. హై-ఎండ్ AI చిప్ మార్కెట్‌లో Nvidia ఆధిపత్యం, దానిలో 80 శాతాన్ని నియంత్రించడం స్టాక్‌ను కొత్త శిఖరాలకు నడిపించినట్లు తెలుస్తోంది.