కో-లొకేషన్ స్కాం: పాస్‌వర్డ్ మరిచిపోయానని ఆనంద్ ట్విస్ట్

సెంట్రల్ బ్యూరో ఆఫ్ ఇన్వెస్టిగేషన్ (CBI) నేషనల్ స్టాక్ ఎక్స్చేంజ్ (NSE) మాజీ గ్రూప్ ఆపరేటింగ్ ఆఫీసర్ (COO) ఆనంద్ సుబ్రమణియంను అరెస్ట్ చేసింది. 2018 నాటి మార్కెట్ మాణిప్యులేషన్ కేసులో గతరాత్రి చెన్నైలో అరెస్ట్ చేశారు. అతనిని అక్కడి నుండి ఢిల్లీకి తీసుకు వెళ్లారు. ఈ కేసు దర్యాఫ్తుకు ఆయన సహకరించడం లేదని తెలుస్తోంది. ఎన్ఎస్ఈ కో-లొకేషన్ స్కాం ఇటీవల సంచలనం సృష్టించిన విషయం తెలిసిందే. ఈ కేసులో ఆయనను అరెస్ట్ చేశారు.

అయితే తన మెయిల్ ఐడీ వివరాలు చెప్పమంటే మరిచిపోయానని ఆనంద్ సుబ్రమణియం సమాధానమిచ్చారని వార్తలు వస్తున్నాయి. 2013 ఏప్రిల్ 1వ తేదీ వరకు ఆనంద్ సుబ్రమణియన్ చీఫ్ స్ట్రాటెజిక్ ఆఫీసర్‌గా ఉన్నారు. ఆ తర్వాత ఆయనను గ్రూప్ ఆపరేటింగ్ ఆఫీసర్‌గా చిత్రా రామకృష్ణ నియమించారు. ఆ తర్వాత ఎండీ సలహాదారుగా నియమించారు. ఇదంతా ఓ యోగి సూచన మేరకు చేసినట్లుగా సెబి దర్యాఫ్తులో వెల్లడైంది.

ఇక్కడ మరో ట్విస్ట్ ఉంది. ఎన్ఎస్ఈకి సంబంధించి ఆర్థిక, వ్యాపార ప్రణాళికలతో పాటు, డివిడెండ్, ఆర్థిక ఫలితాల వంటి అంతర్గత సమాచారాన్ని చిత్రా రామకృష్ణ సదరు యోగితో పంచుకున్నారని, ఆ అదృశ్య యోగి.. ఈ ఆనంద్ సుబ్రమణియం అనే వార్తలు కూడా వస్తున్నాయి. యోగి పేరుతో చిత్రకు ఈ మెయిల్స్ పంపించి ఉంటారని భావిస్తున్నారు. దీనిపై దర్యాఫ్తు చేస్తున్నారు.