UPI Charges: యూపీఐ చెల్లింపులపై ఛార్జీలు..! రూ.2,000పైన ట్రాన్సాక్షన్లకు బాదుడే..

UPI Payments: దేశంలో ప్రజలు ఇప్పటి వరకు యూపీఐ సేవలను ఉచితంగా వినియోగించుకున్నారు. యూపీఐ చెల్లింపులపై అదనపు ఛార్జీలు ఉంటాయంటూ గతంలో పలుమార్లు వార్తలు వచ్చాయి. అయితే అవన్నీ అవాస్తవమని.. తమకు అలాంటి ఉద్ధేశం లేదంటూ కేంద్రం క్లారిటీ ఇచ్చింది. అయితే ఇప్పుడు మాత్రం నిజంగానే ఛార్జీల మోత మెుదలు కానుంది. ఈ ఛార్జీలు ఎవరి నుంచి వసూలు చేస్తారు..? ఎంత వసూలు చేస్తారు..? ఇప్పుడు తెలుసుకుందాం.

ఏప్రిల్ 1 నుంచి UPI వ్యాపార లావాదేవీలపై ప్రీపెయిడ్ చెల్లింపు సాధనాల (PPI) రుసుము వర్తించబడుతుందని నేషనల్ పేమెంట్స్ కార్పొరేషన్ ఆఫ్ ఇండియా (NPCI) తెలిపింది. రూ.2,000 కంటే ఎక్కువ మర్చంట్ లావాదేవీలపై కొత్తగా ఛార్జీల భారం ఉండనుంది. అయితే రెండు వేల రూపాయల కంటే పెద్ద మెుత్తం లావాదేవీల విలువలో 1.1 శాతాన్ని రుసుముగా వసూలు చేయనున్నట్లు ఇటీవలి సర్క్యులర్‌లో స్పష్టం చేసింది.

ఇంటర్‌చేంజ్ ధర ఏప్రిల్ 1, 2023న ప్రవేశపెట్టబడుతున్నప్పటికీ.. దీనిని మళ్లీ సెప్టెంబర్ 30, 2023 నాటికి సమీక్షించనున్నారు. ఇంటర్‌చేంజ్ ఫీజులను ప్రవేశపెట్టడం దేశంలోని డిజిటల్ చెల్లింపులను అందిస్తున్న బ్యాంకులు, చెల్లింపు సర్వీస్ ప్రొవైడర్‌లకు ఆదాయాన్ని పెంచే లక్ష్యంతో తీసుకురాబడిందని తెలుస్తోంది. ఇంటర్‌చేంజ్ రుసుము కార్డ్ చెల్లింపులతో అనుబంధించబడుతుంది. లావాదేవీలను ఆమోదించడం, ప్రాసెస్ చేయడం, ఆథరైజ్ చేయటం వంటి ఖర్చులను కవర్ చేయడానికి విధించబడుతోంది.

దేశంలోని ప్రముఖ డిజిటల్ పేమెంట్ అగ్రిగేటర్లైన BharatPe, Google Pay, Razorpay, Paytm, PayU, పైన్ ల్యాబ్స్ వంటి సంస్థలు యూపీఐ ద్వారా క్రెడిట్ కార్డు చెల్లింపుల లావాదేవీలను అందించేందుకు నేషనల్ పేమెంట్స్ కార్పొరేషన్ ఆఫ్ ఇండియా (NPCI)తో జతకట్టాయి. రూపే క్రెడిట్ కార్డ్‌లను UPIకి లింక్ చేయడానికి రిజర్వ్ బ్యాంక్ ఆఫ్ ఇండియా ఇటీవల చర్యలు చేపట్టింది. కార్డ్ పాయింట్-ఆఫ్-సేల్ టెర్మినల్స్ విస్తృతంగా అందుబాటులో లేని సెమీ-అర్బన్ ప్రాంతాల్లోని వ్యాపారులకు ఈ చర్య ఎక్కువ ప్రయోజనకరంగా ఉండనుంది. ప్రస్తుతం UPI ప్లాట్‌ఫారమ్‌లో భారతదేశం 250 మిలియన్లకు పైగా ప్రత్యేక వినియోగదారులను, 5 కోట్ల మంది వ్యాపారులను కలిగి ఉంది.