Ambani Vs Adani: అంబానీ, అదానీ మధ్య పవర్ గేమ్.. ఆట మధ్యలో ప్రభుత్వం.. లాభపడే స్టాక్స్ ఇవే..

Ambani Vs Adani: వ్యాపార విస్తరణలో అంబానీ, అదానీలు రేసుగుర్రాల్లాగా ముందుకు సాగుతున్నారు. నువ్వానేనా అన్నట్లుగా సాగుతున్న ఈ పోటీలో ఇప్పుడు ప్రభుత్వం కూడా ప్రవేశించింది. అసలు ఈ పవర్ ఫుల్ గేమ్ గురించి పూర్తి విషయాలు ఇప్పుడు తెలుసుకుందాం..

అప్పుల్లో ఉన్న కంపెనీ కోసం..

అప్పుల ఊబిలో కూరుకుపోయిన ల్యాంకో అమర్‌కంటక్ పవర్ అమ్మకానికి సిద్ధమైంది. దీన్ని కొనుగోలు చేసేందుకు దేశంలోని ఇద్దరు దిగ్గజ ధనవంతులు గౌతమ్ అదానీ, ముఖేష్ అంబానీ ముఖాముఖి పోటీలో ఉన్నారు. అలాగే కేంద్ర ప్రభుత్వ నిర్వహణలోని పవర్ ఫైనాన్స్ కార్పొరేషన్ (PFC) కూడా REC లిమిటెడ్ భాగస్వామ్యంతో వేలంలో నిలబడింది. ప్రస్తుతం.. ముఖేష్ అంబానీ నేతృత్వంలోని రిలయన్స్ ఇండస్ట్రీస్ ఈ బొగ్గు ఆధారిత పవర్ ప్రాజెక్ట్ కొనుగోలు రేసులో ముందంజలో ఉన్నట్లు తెలుస్తోంది. దీని కోసం కంపెనీ రూ.1,960 కోట్ల నగదును ముందస్తుగా ఆఫర్ చేసింది. రిలయన్స్ ఈ బిడ్‌ను గెలిస్తే, దీని ద్వారా కంపెనీ తొలిసారిగా బొగ్గు ఆధారిత విద్యుత్ ఉత్పత్తిలోకి ప్రవేశిస్తుంది.

రూట్ క్లియర్ చేస్తే..

ల్యాంకో అమర్‌కంటక్ పవర్ రుణదాతలు రిలయన్స్ ప్రతిపాదనను క్లియర్ చేస్తే, ఇది IBC కోడ్ ప్రకారం ముఖేష్ అంబానీ మూడవ అతిపెద్ద కొనుగోలు అవుతుంది. ఇంతకుముందు ఇది IBC కోడ్ కింద రిలయన్స్ కమ్యూనికేషన్స్, టెక్స్‌టైల్ కంపెనీ అలోక్ ఇండస్ట్రీస్ అనుబంధ సంస్థ అయిన రిలయన్స్ ఇన్‌ఫ్రాటెల్‌ను కొనుగోలు చేసింది. ల్యాంకో అమర్‌కంటక్ పవర్‌ను కొనుగోలు చేసేందుకు రిలయన్స్.. అదానీ గ్రూప్‌తో ప్రత్యక్ష పోటీలో ఉంది. రెండు గ్రూపులు తమ వ్యాపారాన్ని వేగంగా విస్తరించుకుంటున్నాయి.

అదానీ బిడ్..

ఆసియాలో అతిపెద్ద సంపన్నుడైన గౌతమ్ అదానీకి చెందిన అదానీ పవర్ రూ.1,800 కోట్లకు బిడ్ దాఖలుచేసినట్లు సమాచారం. ఇది బాండ్ల రూపంలో ఎనిమిది శాతం వడ్డీతో ఐదేళ్లలో తిరిగి చెల్లించాలి. దీంతోపాటు పవర్ ఫైనాన్స్-ఆర్ఈసీ కన్సార్టియం రూ.3,400 కోట్ల ఆఫర్ చేసింది. ఈ మొత్తాన్ని 20 ఏళ్లలో ఇవ్వాల్సి ఉంటుంది. అలాగే, రుణదాతలకు 40 శాతం ఈక్విటీని కూడా ఆఫర్ చేసినట్లు తెలుస్తోంది.

ల్యాంకో పరిస్థితి ఏమిటి..

ల్యాంకో అమర్‌కంటక్ పవర్‌కు చెందిన రిజల్యూషన్ ప్రొఫెషనల్ (RP) 17 బ్యాంకుల క్లెయిమ్‌లను రూ.14,632 కోట్లకు అంగీకరించింది. ఇందులో పీఎఫ్‌సీ, ఆర్‌ఈసీలకు 42 శాతం వాటా ఉంది. గతంలో వేదాంత లిమిటెడ్ రూ.3,000 కోట్ల ఆఫర్ చేసినా బ్యాంకులు తిరస్కరించాయి. దీని తరువాత RP జనవరిలో కంపెనీ విక్రయ ప్రక్రియను తిరిగి ప్రారంభించింది. 11 కంపెనీలు దీనిపై ఆసక్తి చూపాయి. ల్యాంకో అమర్‌కంటక్ పవర్ వద్ద రూ. 1,300 కోట్ల నగదు, నగదు సమానమైనవి, స్వీకరించదగినవి ఉన్నాయి.

ఉత్పత్తి సామర్థ్యం..

చత్తీస్‌గఢ్‌లోని కోర్బా-చంపా రాష్ట్ర రహదారిపై ల్యాంకో అమర్‌కంటక్ పవర్ అనే సంస్థ బొగ్గు ఆధారిత థర్మల్ పవర్ ప్రాజెక్ట్‌ను నడుపుతోంది. మొదటి దశలో 300-300 మెగావాట్ల రెండు యూనిట్ల నుంచి విద్యుత్‌ను ఉత్పత్తి చేస్తున్నారు. వీటి నుంచి హర్యానా, మధ్యప్రదేశ్, ఛత్తీస్‌గఢ్‌లకు విద్యుత్‌ సరఫరా జరుగుతోంది. రెండో దశలో మరో రెండు యూనిట్లు నిర్మిస్తున్నారు. వీటిలో ఒక్కోటి 660 మెగావాట్ల సామర్థ్యం కలిగి ఉంది. మూడో దశలో కూడా 660 మెగావాట్ల రెండు యూనిట్లు నిర్మించాల్సి ఉంది. వీటికి సంబంధించిన పనులు ఇంకా ప్రారంభం కాలేదు.

ఏఏ షేర్లు పెరగవచ్చు..

ఒకవేళ అదానీ ఈ బిడ్ లో విజయం సాధిస్తే.. అదానీ పవర్ షేర్లు మంచి ర్యాలీని చూడవచ్చని నిపుణులు అభిప్రాయపడుతున్నారు. అదే సమయంలో అంబానీ ఈ కంపెనీని సొంతం చేసుకుంటే.. రిలయన్స్ ఇండస్ట్రీస్ షేర్లు తమ పెట్టుబడిదారులకు మంచి లాభాలను తెచ్చిపెట్టనున్నాయి.