విమర్శ కాదు, విజ్ఞప్తి మాత్రమే: అక్కడ పెట్రోల్ రూ.105, తెలుగు రాష్ట్రాల్లో రూ.119: మోడీ

పెట్రోల్, డీజిల్ పెరుగుదలపై ప్రధాని నరేంద్ర మోడీ కీలక వ్యాఖ్యలు చేశారు. దేశంలో పెరుగుతున్న ఇంధన ధరలపై ఆయన తొలిసారి స్పందించారు. కేంద్రం ఇంధన ధరలపై సుంకాన్ని గత నవంబర్ నెలలోనే తగ్గించిందని, కానీ కొన్ని రాష్ట్రాలు మాత్రం ఆ పన్నులను తగ్గించలేదని చెప్పారు. సహకార సమాఖ్య స్ఫూర్తితో ఆయా రాష్ట్రాలు ఇప్పటికైనా ఇంధన ధరలను తగ్గించాలని కోరారు.

ఇది విమర్శ కాదని, కేవలం విజ్ఞప్తి మాత్రమేనని కూడా ప్రధాని మోడీ చెప్పారు. గత నవంబర్ నెలలో చమురు ధరలపై కేంద్రం ఎక్సైజ్ సుంకాన్ని తగ్గించిందని, రాష్ట్రాలు కూడా పన్నులు తగ్గించాలని కోరామని గుర్తు చేశారు. మహారాష్ట్ర, పశ్చిమ బెంగాల్, తెలంగాణ, ఆంధ్రప్రదేశ్, కేరళ, జార్ఖండ్, తమిళనాడు రాష్ట్రాలు తగ్గించలేదని, కానీ ఆ రాష్ట్రాలు సమాఖ్య స్ఫూర్తితో ఇంధన ధరలపై వ్యాట్‌ను తగ్గించాలని కోరారు.

ఈ సందర్భంగా మోడీ మాట్లాడుతూ... ఒకవేళ కర్నాటక కనుక పెట్రోల్, డీజిల్ ధరలపై వ్యాట్‌ను తగ్గించకపోయి ఉంటే కనుక గత ఆరు నెలల కాలంలో అదనంగా రూ.5,000 కోట్లు ఆర్జించి ఉండేదని చెప్పారు. గుజరాత్ సామాన్యులపై పెట్రో భారాన్ని తగ్గించకపోయి ఉంటే ఆ రాష్ట్రం కూడా రూ.3500 కోట్లు వెనుకేసి ఉండేదన్నారు. అదే సమయంలో ఈ ఆరు నెలల కాలంలో గుజరాత్, కర్నాటక పక్కన ఉన్న వ్యాట్ తగ్గించని రాష్ట్రాలు రూ.3500 కోట్ల నుండి రూ.5000 కోట్లు ఆర్జించాయన్నారు.

వ్యాట్ తగ్గించని రాష్ట్రాలలో పెట్రోల్ ధరలు ఇలా ఉన్నాయని మోడీ వివరించారు. చెన్నైలో లీటర్ పెట్రోల్ రూ.111, జైపూర్‌లో రూ.118, హైదరాబాద్‌లో రూ.119, కోల్‌కతాలో రూ.115, ముంబైలో రూ.120గా ఉందన్నారు. కానీ, డామన్ అండ్ డయ్యులో రూ.105 మాత్రమే అని గుర్తు చేశారు. కాగా, అహ్మదాబాద్‌లో లీటర్ పెట్రోల్ రూ.105, బెంగళూరులో రూ.111, ఉత్తరాఖండ్‌లో రూ.103, లక్నోలో రూ.105గా ఉంది.