Layoffs: మరో దిగ్గజ కంపెనీలో లేఆఫ్స్.. ఏకంగా 14 వేల మందికి ఉద్వాసన

Layoffs: ఖర్చులు తగ్గించుకోవడం పేరిట ప్రపంచవ్యాప్తంగా పలు కంపెనీలు ఉద్యోగాల్లో కోతలు విధిస్తున్నాయి. ఒక్క IT సెక్టార్ మాత్రమే కాకుండా ఇతర రంగాలు సైతం ఇందుకు మినహాయింపు కాదు. తాజాగా మరో దిగ్గజ సంస్థ వేలకొద్దీ సిబ్బందికి షాక్ ఇవ్వడానికి రెడీ అయింది.

మొబైల్స్ మ్యానుఫ్యాక్చరింగ్ విభాగంలో భారతీయులకు అత్యంత చేరువైన నోకియా.. తన ఉద్యోగులకు బ్యాడ్ న్యూస్ చెప్పింది. కంపెనీ ఆర్థిక స్థిరత్వం కోసం ఖర్చులు తగ్గించుకోవడానికి చూస్తున్నట్లు వెల్లడించింది. ఇందుకోసం తన శ్రామిక శక్తిలో ఏకంగా 14 వేల మందికి ఉద్వాసన పలకాలని నిర్ణయించుకున్నట్లు ప్రకటించింది.

కంపెనీ కీలక మార్కెట్ ఉత్తర అమెరికాలో 5జీ పరికరాలకు డిమాండ్ తగ్గడంతో నోకియా ఇబ్బందులు ఎదుర్కొంటోంది. మూడో త్రైమాసికంలోనూ అమ్మకాలు 20 శాతం క్షీణించడం సంస్థను మరింత నిరుత్సాహపరిచింది. దీంతో 2026 నాటికి 800 మిలియన్ నుంచి 1.2 బిలియన్ యూరోల మేరకు పొదుపు చేయాలని భావిస్తోంది. ఇందులో భాగంగానే ఉద్యోగుల కోతకు సిద్ధమైంది.

ప్రస్తుతం నోకియాలో 86 వేల మంది శ్రామిక శక్తి పనిచేస్తోంది. ఈ సంఖ్యను 72 నుంచి 77 వేలకు కుదించాలని కంపెనీ నిర్ణయించుకుంది. తద్వారా 2024లో ఏడాదికి 400 మిలియన్ యూరోలు, 2025లో అదనంగా మరో 300 మిలియన్ యూరోలు పొదుపు చేయాలని చూస్తోంది. అయితే ఈ నిర్ణయం వేలాది కుటుంబాలపై తీవ్ర ప్రభావం చూపనుంది.