పెట్రోల్, డీజిల్ ధరల పెరుగుదల, జీఎస్టీలోకి.. నిర్మలమ్మ కీలక వ్యాఖ్యలు

కేంద్ర ఆర్థికమంత్రి నిర్మలా సీతారామన్ పెట్రోల్, డీజిల్ పెరుగుదలపై కీలక వ్యాఖ్యలు చేశారు. ప్రస్తుతానికి పెట్రోల్, డీజిల్, ఏటీఎఫ్, గ్యాస్ వంటి వాటిని జీఎస్టీ కిందకు తీసుకు వచ్చే ప్రతిపాదనలు లేవని కేంద్ర ఆర్థికమంత్రి నిర్మలా సీతారామన్ అన్నారు. పెట్రోల్, డీజిల్ ధరలు ఇటీవలి కాలంలో భారీగా పెరిగి వినియోగదారులకు షాకిచ్చిన విషయం తెలిసిందే. ధరల పెరుగుదల చర్చనీయాంశమైన నేపథ్యంలో దీనిని జీఎస్టీ పరిధిలోకి తీసుకు రావాలనే డిమాండ్లు వినిపిస్తున్నాయి. ఇలాంటి పరిస్థితుల్లో నిర్మలమ్మ పైవ్యాఖ్యలు చేశారు.

అంతకుముందు క్రిప్టోకరెన్సీ అంశంపై కూడా స్పందించారు. అన్ని రకాల క్రిప్టోకరెన్సీలకు భారత్‌ దూరం కాదని, చెల్లింపులకు ప్రత్యామ్నాయ టెక్నాలజీలను ప్రయోగాత్మకంగా అనుమతిస్తామన్నారు. బ్లాక్ చెయిన్ సాంకేతికత, బిట్ కాయిన్స్ లేదా క్రిప్టోకరెన్సీలపై ప్రయోగాలు చేసేందుకు ప్రత్యేకంగా అనుమతి ఇస్తామన్నారు.

ఆర్థిక టెక్నాలజీ (ఫిన్ టెక్) సంస్థలు బ్లాక్ చెయిన్ మీద ఆధారపడతాయన్నారు. క్రిప్టోకరెన్సీలకు ఈ టెక్నాలజీ కీలకమన్నారు. ఇటువంటి వాటికోసం ప్రత్యేక విధానాన్ని అందుబాటులోకి తెస్తామన్నారు. బిట్ కాయిన్ వ్యాల్యూ రికార్డ్ స్థాయిలో 60,000 డాలర్లను మించిన విషయం తెలిసిందే.