Budget 2026: నిర్మలమ్మ 'కాంచీపురం' చీర వెనుక ఉన్న సందేశం ఇదేనా?

దేశమంతా బడ్జెట్ లెక్కల కోసం ఎదురుచూస్తుంటే.. సంస్కృతిని ప్రేమించే వారంతా ఆర్థిక మంత్రి నిర్మలా సీతారామన్ (Nirmala Sitharaman) కట్టుకున్న చీర గురించి ఆసక్తిగా చర్చించుకుంటున్నారు. ప్రతి ఏటా బడ్జెట్ రోజున భారతదేశ నేతన్నల నైపుణ్యాన్ని ప్రపంచానికి చాటిచెప్పే సంప్రదాయాన్ని ఆమె ఈసారి కూడా కొనసాగించారు. తన రికార్డు స్థాయి 9వ బడ్జెట్ ప్రసంగం కోసం ఆమె తమిళనాడుకు చెందిన ప్రసిద్ధ 'కాంచీపురం' (Kanchipuram) పట్టు చీరను ఎంచుకున్నారు.

నేటి ప్రత్యేకత: మెజెంటా & కాఫీ బ్రౌన్ కలయిక

ఈరోజు నిర్మలా సీతారామన్ గారు మెజెంటా రంగులో ఉన్న ' కాంచీపురం' చీరలో పార్లమెంట్‌కు చేరుకున్నారు. బంగారు, నలుపు రంగు అంచుతో ఉన్న మెజెంటా రంగు చీర, గోల్డెన్‌ కలర్‌ బ్లౌజ్‌, శాలువాతో కన్పించారు. ఈ చీర ఎంపిక కేవలం ఫ్యాషన్ కోసం మాత్రమే కాదు, తమిళనాడులోని చేనేత కళాకారుల పట్ల ఆమెకున్న గౌరవాన్ని, ఆ రాష్ట్ర సంస్కృతిని ప్రతిబింబిస్తోంది.

కాంచీపురం చీరల చరిత్ర

కాంచీపురం పట్టు చీరలు అంటే ప్రపంచవ్యాప్తంగా మంచి గుర్తింపు ఉంది. దీని చరిత్ర వందల ఏళ్ల నాటిది. 9వ నుండి 13వ శతాబ్దం వరకు పాలించిన చోళ రాజుల కాలంలో ఈ నేత కళ బాగా ప్రాచుర్యం పొందింది. అప్పటి రాజులు కళలను, వస్త్ర రంగాన్ని ఎంతగానో ప్రోత్సహించేవారు. ఈ చీరలపై ఉండే డిజైన్లు ఎక్కువగా దక్షిణ భారత ఆలయాల శిల్పకళ, ప్రకృతి నుండి ప్రేరణ పొంది తయారు చేస్తారు. అందుకే ఈ చీరలను శుభకార్యాలకు, వివాహాలకు అత్యంత పవిత్రమైనవిగా భావిస్తారు.

గత తొమ్మిదేళ్ల ప్రయాణం: ఒకసారి చూద్దాం!

ఆర్థిక మంత్రి నిర్మలా సీతారామన్ (Nirmala Sitharaman) గారు ప్రతి బడ్జెట్‌లోనూ ఒక్కో రాష్ట్రానికి చెందిన ప్రత్యేకమైన నేతను పరిచయం చేస్తూ వస్తున్నారు.

• 2019: తన మొదటి బడ్జెట్‌లో ఏపీకి చెందిన 'మంగళగిరి' పింక్ సిల్క్ చీరను ధరించారు.
• 2020: ఆశలు, శ్రేయస్సుకు గుర్తుగా పసుపు రంగు పట్టు చీర.
• 2021: తెలంగాణకు చెందిన 'పోచంపల్లి ఇక్కత్' ఎరుపు, ఆఫ్-వైట్ చీర.
• 2022: ఒడిశాకు చెందిన బ్రౌన్ కలర్ 'బొంకై' చీర.
• 2023: కర్ణాటకకు చెందిన నల్లటి 'కసూతీ' ఎంబ్రాయిడరీ ఉన్న ఎరుపు రంగు చీర.
• 2024 (మధ్యంతర): బెంగాల్‌కు చెందిన బ్లూ 'టస్సార్' సిల్క్ కాంతా వర్క్ చీర.
• 2025: పద్మశ్రీ అవార్డు గ్రహీత దులారీ దేవి బహుకరించిన 'మధుబని' పెయింటింగ్ ఉన్న ఆఫ్-వైట్ చీర.
• 2026: ఈ ఏడాది తమిళనాడు సంస్కృతిని ప్రతిబింబించేలా కాంచీపురం శారీలో కనిపించారు.

మొత్తానికి ఆర్థిక మంత్రి ప్రసంగంలో అంకెలు ఎలా ఉన్నా.. ఆమె కట్టుకున్న చీర మాత్రం భారతీయ చేనేత కళాకారుల గుండె చప్పుడును వినిపిస్తోంది. దేశ వారసత్వాన్ని గౌరవిస్తూ ఆమె చేస్తున్న ఈ 'సారీ డిప్లొమసీ' ఇప్పుడు సోషల్ మీడియాలో హాట్ టాపిక్‌గా మారింది.