బంగారం ధరల పెరుగుదలపై నిక్కీ ఆసియా సంచలన నివేదిక.. పసిడి కోసం ఆసియా దేశాలన్నీ ఏకమై..

ప్రపంచ ఆర్థిక వ్యవస్థలో అత్యంత సురక్షితమైన ఆస్తిగా భావించే Gold మార్కెట్‌లో ఒక చారిత్రాత్మక వ్యూహాత్మక మార్పు చోటుచేసుకుంటోంది. తమ దేశాల భూగర్భం నుండి తవ్వితీసిన ముడి బంగారాన్ని విదేశాలకు ఎగుమతి చేసి, అక్కడ శుద్ధి చేసి, అంతర్జాతీయ మార్కెట్లలో వర్తకం చేసే పాత విధానానికి స్వస్తి పలికేందుకు ఆసియాలోని ప్రధాన బంగారం ఉత్పత్తి దేశాలు సిద్ధమవుతున్నాయి.

జపనీస్ మీడియా దిగ్గజం 'నిక్కీ ఆసియా' (Nikkei Asia) విడుదల చేసిన ఒక సంచలనాత్మక నివేదిక ప్రకారం.. చరిత్రలోనే తొలిసారిగా ఉత్పాదక దేశాలు తమ సొంత గనుల ద్వారా లభించే Gold నుండి గరిష్ట ప్రయోజనాలు, ఉపాధి, ఆదాయాన్ని పొందడమే లక్ష్యంగా 'వనరుల జాతీయవాదం' (Resource Nationalism) వైపు అడుగులు వేస్తున్నాయి.

గనుల నుండి తవ్విన ముడి బంగారాన్ని శుభ్రపరిచి, మలినాలను తొలగించి, స్వచ్ఛతను నిర్ధారించే 'రిఫైనింగ్' (శుద్ధి) ప్రక్రియను ఆయా దేశాలు తమ స్వదేశంలోనే వేగంగా విస్తరిస్తున్నాయి. రైతు తన పంటను నేరుగా అమ్మేయకుండా ప్రాసెస్ చేసి అధిక ధరకు అమ్మినట్లే, బంగారం ఉత్పత్తి దేశాలు కూడా కేవలం ముడి పదార్థాలను ఎగుమతి చేయకుండా, విలువ ఆధారిత పరిశ్రమలను దేశీయంగానే నెలకొల్పుతున్నాయి.

దీనివల్ల స్థానికంగా వేలాది ఉద్యోగాలు సృష్టించబడటమే కాకుండా.. విదేశీ ఆదాయంలో పెద్ద వాటా దేశీయ ఖజానాకే చేరుతుంది. అంతేకాకుండా, ముడి బంగారం విదేశాలకు తరలిపోకుండా నిరోధించడానికి పలు ప్రభుత్వాలు భారీ ఎగుమతి పన్నులను విధిస్తున్నాయి. మరికొన్ని దేశాల కేంద్ర బ్యాంకులు తమ గనుల నుండి వచ్చే బంగారాన్ని విదేశాలకు అమ్మకుండా నేరుగా తామే కొనుగోలు చేసి తమ జాతీయ నిల్వల్లో జమ చేసుకుంటున్నాయి.

Also Read

అక్టోబర్‌లో బంగారం ధర రూ.1.55 లక్షలకు చేరుతుందా, ఇంకా తగ్గుతుందా..నిపుణులు ఏమంటున్నారంటే..

ఈ వ్యూహాత్మక మార్పు వెనుక డాలర్ ఆధిపత్యంపై పెరుగుతున్న ఆందోళనలు, అంతర్జాతీయ ఆంక్షల భయాలు ప్రధాన కారణంగా నిలుస్తున్నాయి. నిక్కీ నివేదిక ప్రకారం, ప్రపంచ ప్రాథమిక పొదుపు కరెన్సీగా అమెరికన్ డాలర్ పోషిస్తున్న పాత్రపై భయాలు వ్యక్తమవుతున్న నేపథ్యంలో, అనేక దేశాలు తమ విదేశీ మారక నిల్వల ప్రమాదాన్ని తగ్గించుకోవడానికి బంగారంపై మరింత దృష్టి సారిస్తున్నాయి. అంతర్జాతీయ వివాదాలు ముదిరినప్పుడు లేదా ఆర్థిక ఆంక్షలు ఎదురైనప్పుడు విదేశాలలో ఉండే ఆర్థిక ఆస్తుల లభ్యత నిలిచిపోయే ప్రమాదం ఉన్నందున, తమ సొంత నియంత్రణలో ఉండే బంగారం నిల్వలను పెంచుకోవడానికి ప్రభుత్వాలు ప్రాధాన్యత ఇస్తున్నాయి. ఇది డాలర్‌ను పూర్తిగా విడిచిపెట్టడం కాకపోయినప్పటికీ.. తమ ఆర్థిక భద్రతను పటిష్టం చేసుకునే చర్యగా మారుతోంది.

ఈ పరిణామం భారతదేశం వంటి దిగుమతి ఆధారిత దేశాలపై తీవ్ర ప్రభావం చూపే అవకాశాలు కనిపిస్తున్నాయి. తన పసిడి అవసరాలలో ఏకంగా 80 శాతానికి పైగా విదేశీ దిగుమతులపైనే ఆధారపడే భారత్‌కు, ఉత్పత్తి దేశాలు ఎగుమతులను తగ్గించి తమ వద్దే నిల్వ చేసుకోవడం వల్ల అంతర్జాతీయంగా సరఫరా కొరత ఏర్పడే ప్రమాదం ఉంది. గ్లోబల్ మార్కెట్‌లో డిమాండ్ స్థిరంగా ఉండి, విక్రయానికి వచ్చే బంగారం పరిమాణం తగ్గితే తక్షణమే ఆభరణాల ధరలు రికార్డు స్థాయికి పెరుగుతాయి. ఇది పసిడి కొనుగోలుదారులకు, ఇన్వెస్టర్లకు స్వల్పకాలంలో ధరల భారాన్ని పెంచినప్పటికీ, దీర్ఘకాలికంగా బంగారంలో పెట్టుబడి పెట్టిన వారికి అపారమైన లాభాలను అందిస్తుందని ఆర్థిక విశ్లేషకులు భావిస్తున్నారు.