సరికొత్త శిఖరాలకు: స్టాక్ మార్కెట్లు భారీ జంప్, భారీ నష్టాల నుండి భారీ లాభాల్లోకి..

ముంబై: స్టాక్ మార్కెట్లు వరుసగా నాలుగో రోజు భారీ లాభాల్లో ముగిశాయి. నేడు (ఫిబ్రవరి 4, గురువారం) భారీ నష్టాల్లో ప్రారంభమైనప్పటికీ, ఆ తర్వాత కోలుకున్నాయి. ఓ సమయంలో 300 పాయింట్ల మేర నష్టాల్లో కనిపించిన సెన్సెక్స్ చివరకు 360 పాయింట్ల లాభాల్లో ముగిసింది. ఓ సమయంలో 400 పాయింట్లకు పైగా లాభాల్లోకి వచ్చింది. సోమవారం బడ్జెట్ ప్రవేశపెట్టిన అనంతరం వరుసగా నాలుగు రోజులు మార్కెట్లు లాభాల్లోనే ఉన్నాయి. ఈ సెషన్లలో 4000 పాయింట్లకు పైగా లాభపడింది.

భారీ నష్టాల నుండి భారీ లాభాల్లోకి

నేడు సెన్సెక్స్ 358.54 పాయింట్లు లేదా 0.71% లాభపడి 50,614.29 పాయింట్ల వద్ద, నిఫ్టీ 105.70 పాయింట్లు లేదా 0.71% ఎగిసి 14895.70 పాయింట్ల వద్ద క్లోజ్ అయింది. 1813 షేర్లు లాభాల్లో, 1110 షేర్లు నష్టాల్లో ముగియగా, 142 షేర్లలో ఎలాంటి మార్పులేదు. ఐటీ రంగం మినహా అన్ని రంగాలు కూడా లాభాల్లో ముగిశాయి.

ఉదయం నష్టాల్లో ప్రారంభమైన సెన్సెక్స్ ఆ తర్వాత లాభాల్లో ముగిసింది. 50,212.25 పాయింట్ల వద్ద ప్రారంభమై, 50,687.51 పాయింట్ల వద్ద గరిష్టాన్ని, 49,926 పాయింట్ల వద్ద కనిష్టాన్ని తాకింది. సెన్సెక్స్ 700 పాయింట్ల మధ్య పైకి, కిందకు కదలాడింది.

నిఫ్టీ 14900 పాయింట్లకు సమీపంలో ఉండగా, సెన్సెక్స్ 51,000 పాయింట్ల దిశగా సాగుతోంది.

డాలర్ మారకంతో రూపాయి 72.96 వద్ద క్లోజ్ అయింది. నిన్న 72.94 వద్ద ముగిసింది. నేటి సెషన్లో 72.89-72.96 మధ్య ట్రేడ్ అయింది.

టాప్ గెయినర్స్, లూజర్స్

నేటి టాప్ గెయినర్స్ జాబితాలో ITC 6.09 శాతం, SBI 5.70 శాతం, బజాజ్ ఫైనాన్స్ 4.95 శాతం, కోల్ ఇండియా 4.63 శాతం, ONGC 4.61 శాతం లాభపడ్డాయి.

టాప్ లూజర్స్ జాబితాలో ఏషియన్ పేయింట్స్ 2.11 శాతం, యూపీఎల్ 1.83 శాతం, సిప్లా 1.74 శాతం, ఇండస్ఇండ్ బ్యాంకు 1.56 శాతం, టాటా మోటార్స్ 1.47 నష్టపోయాయి.

మోస్ట్ యాక్టివ్ స్టాక్స్‌లో SBI, టాటా మోటార్స్, భారతీ ఎయిర్ టెల్, బజాజ్ ఫైనాన్స్, ఐటీసీ ఉన్నాయి.

రంగాలవారీగా..

నిఫ్టీ 50 స్టాక్స్ 0.71 శాతం, నిఫ్టీ మిడ్ క్యాప్ 1.73 శాతం లాభపడ్డాయి. రంగాలవారీగా చూస్తే నిఫ్టీ ఆటో 1.10 శాతం, నిఫ్టీ బ్యాంకు 1.69 శాతం,

నిఫ్టీ ఎనర్జీ 1.40 శాతం, నిఫ్టీ ఫైనాన్షియల్ సర్వీసెస్ 1.24 శాతం,

నిఫ్టీ ఎఫ్ఎంసీజీ 2.45 శాతం, నిఫ్టీ మీడియా 2.05 శాతం, నిఫ్టీ మెటల్ 1.95 శాతం, నిఫ్టీ ఫార్మా 0.25 శాతం, నిఫ్టీ పీఎస్‌యూ బ్యాంకు 5.88 శాతం, నిఫ్టీ రియాల్టీ 0.95 శాతం, నిఫ్టీ ప్రయివేటు బ్యాంకు 0.94 శాతం లాభపడ్డాయి. నిఫ్టీ ఐటీ మాత్రం 0.43 శాతం నష్టపోయింది.