భారీ నష్టాల్లో స్టాక్ మార్కెట్లు, సెన్సెక్స్ 983 పాయింట్లు పతనం

ముంబై: స్టాక్ మార్కెట్లు శుక్రవారం భారీ నష్టాల్లో ముగిశాయి. సెన్సెక్స్ దాదాపు వెయ్యి పాయింట్ల నష్టాలను నమోదు చేసింది. ఇటీవల చాన్నాళ్లకు 50వేల పాయింట్లు దాటిన సెన్సెక్స్ నేడు మళ్లీ 49,000 దిగువకు పడిపోయింది. ఉదయం నుండి నష్టాల్లోనే ఉన్న సూచీలు అంతకంతకూ పతనమయ్యాయి. ప్రాఫిట్ బుకింగ్, కరోనా కేసులు పెరుగుతుండటం, మే 1వ తేదీ నుండి 18 ఏళ్లు దాటిన వారికి కూడా వ్యాక్సినేషన్ వంటి అంశాలు సూచీలపై ప్రభావం చూపాయి. వారాంతం కావడంతో ప్రధానంగా ప్రాఫిట్ బుకింగ్ కనిపించింది. నిఫ్టీ నిన్న 15,000 మార్కును తాకినప్పటికీ నేడు కీలక 14,700 దిగువకు పతనమైంది.

సెన్సెక్స్ 983 పాయింట్లు డౌన్

సెన్సెక్స్ 49,360.89 పాయింట్ల వద్ద ప్రారంభమై, 49,569.42 పాయింట్ల వద్ద గరిష్టాన్ని, 48,698.08 పాయింట్ల వద్ద కనిష్టాన్ని తాకింది. క్రితం సెషన్‌లో సెన్సెక్స్ 49,765.94 పాయింట్ల వద్ద క్లోజ్ అయింది. నేడు సెన్సెక్స్ 983.58 (1.98%) క్షీణించి 48,782.36 పాయింట్ల వద్ద ట్రేడ్ అయింది. నిఫ్టీ 14,747.35 పాయింట్ల వద్ద ప్రారంభమై, 14,855.45 పాయింట్ల వద్ద గరిష్టాన్ని, 14,601.70 పాయింట్ల వద్ద కనిష్టాన్ని తాకింది. 263.80 (1.77%) పాయింట్లు నష్టపోయి 14,631.10 పాయింట్ల వద్ద ట్రేడ్ అయింది.

టాప్ గెయినర్స్, లూజర్స్

నేటి టాప్ గెయినర్స్ జాబితాలో ఓఎన్జీసీ 3.94 శాతం, కోల్ ఇండియా 3.90 శాతం, దివిస్ ల్యాబ్స్ 3.87 శాతం, గ్రాసీమ్ 3.78 శాతం, ఐవోసీ 2.19 శాతం లాభపడ్డాయి.

టాప్ లూజర్స్ జాబితాలో HDFC 4.68 శాతం, HDFC బ్యాంకు 4.09 శాతం, ICICI బ్యాంకు 3.37 శాతం, కొటక్ మహీంద్రా బ్యాంకు 3.11 శాతం, ఏషియన్ పేయింట్స్ 2.95 శాతం నష్టపోయాయి.

నేటి మోస్ట్ యాక్టివ్ స్టాక్స్‌లో టాటా స్టీల్, JSW స్టీల్, HDFC బ్యాంకు, బజాజ్ ఫైనాన్స్, ఎస్బీఐ ఉన్నాయి.

రంగాలవారీగా

నిఫ్టీ 50 స్టాక్స్ 1.77 శాతం, మిడ్ క్యాప్ 0.60 శాతం నష్టపోయాయి. నిఫ్టీ ఆటో 0.61 శాతం, నిఫ్టీ బ్యాంకు 2.77 శాతం, నిఫ్టీ ఎనర్జీ 0.88 శాతం, నిఫ్టీ ఫైనాన్షియల్ సర్వీసెస్ 3.03 శాతం, నిఫ్టీ ఎఫ్ఎంసీజీ 1.13 శాతం, నిఫ్టీ ఐటీ 0.81 శాతం, నిఫ్టీ మీడియా 0.36 శాతం, నిఫ్టీ మెటల్ 0.15 శాతం, నిఫ్టీ పీఎస్‌యూ బ్యాంకు 1.04 శాతం, నిఫ్టీ రియాల్టీ 0.83 శాతం, నిఫ్టీ ప్రయివేటు బ్యాంకు 2.35 శాతం నష్టపోయాయి. నిఫ్టీ ఫార్మా 1.28 శాతం లాభపడింది.