రోజంతా ఊగిసలాట, స్వల్ప లాభాల్లో ముగిసిన స్టాక్ మార్కెట్లు

ముంబై: భారత స్టాక్ మార్కెట్లు గురువారం లాభనష్టాల మధ్య కదలాడి చివరకు స్వల్ప లాభాల్లో ముగిశాయి. ఆద్యంతం పైకి, కిందకు కదిలాయి. మే నెల ఫ్యూచర్ అండ్ ఆప్షన్స్ గడవు నేటితో ముగిసింది. ఇది సూచీల కుదుపుకు కారణమైంది. కరోనా కేసులు తగ్గుముఖం పట్టడం, వ్యాక్సినేషన్ వేగవంతం కావడం ఇన్వెస్టర్ల సెంటిమెంటును బలపరిచింది. దీంతో చివరికి లాభాల్లో ముగిశాయి. నిఫ్టీ ఆల్‌టైమ్ గరిష్టం వద్ద ట్రేడింగ్‌ను ముగించింది. ఇక అమెరికాకు సంబంధించిన కీలక డేటా విడుదల కానుండటంతో ప్రపంచ మార్కెట్లు అప్రమత్తంగా ఉన్నాయి. అమెరికా మార్కెట్లు నిన్న లాభపడ్డాయి.

స్వల్ప లాభాల్లో సెన్సెక్స్

సెన్సెక్స్ నేడు 51,128.80 పాయింట్ల వద్ద ప్రారంభమై, 51,282.90 పాయింట్ల వద్ద గరిష్టాన్ని, 50,891.66 పాయింట్ల వద్ద కనిష్టాన్ని తాకింది. సెన్సెక్స్ చివరకు 97.70 (0.19%) పాయింట్లు ఎగిసి 51,115.22 పాయింట్ల వద్ద ముగిసింది. నిఫ్టీ 15,323.95 పాయింట్ల వద్ద ప్రారంభమై, 15,384.55 వద్ద గరిష్టాన్ని, 15,272.50 వద్ద కనిష్టాన్ని తాకింది. నిఫ్టీ చివరకు 36.40 (0.24%) పాయింట్లు లాభపడి 15,337.85 పాయింట్ల వద్ద ముగిసింది.

టాప్ గెయినర్స్, లూజర్స్

నేటి టాప్ గెయినర్స్ జాబితాలో శ్రీసిమెంట్స్ 3.65 శాతం, ఎస్బీఐ 2.82 శాతం, విప్రో 2.59 శాతం, కొటక్ మహీంద్రా 2.10 శాతం, యాక్సిస్ బ్యాంకు 2.07 శాతం లాభపడ్డాయి.

టాప్ లూజర్స్ జాబితాలో HDFC 2.29 శాతం, ఐవోసీ 1.56 శాతం, బజాజ్ ఫైనాన్స్ 1.54 శాతం, ఓఎన్జీసీ 1.32 శాతం, HUL 1.17 శాతం నష్టపోయాయి.

మోస్ట్ యాక్టివ్ స్టాక్స్‌లో HDFC, SBI, టాటా స్టీల్, రిలయన్స్, BPCL ఉన్నాయి.

రంగాలవారీగా..

నిఫ్టీ 50 స్టాక్స్ 0.24 శాతం లాభపడగా, నిఫ్టీ మిడ్ క్యాప్ 0.71 శాతం లాభపడ్డాయి. నిఫ్టీ ఆటో 0.58 శాతం, నిఫ్టీ బ్యాంకు 1.18 శాతం, నిఫ్టీ ఫైనాన్షియల్ సర్వీసెస్ 0.16 శాతం, నిఫ్టీ ఐటీ 1.14 శాతం, నిఫ్టీ మీడియా 0.99 శాతం, నిఫ్టీ మెటల్ 0.77 శాతం, నిఫ్టీ పీఎస్‌యూ బ్యాంకు 2.85 శాతం, నిఫ్టీ ప్రయివేటు బ్యాంకు 0.85 శాతం లాభపడ్డాయి. నిఫ్టీ ఎనర్జీ 0.13 శాతం, నిఫ్టీ ఎఫ్ఎంసీజీ 0.01 శాతం, నిఫ్టీ ఫార్మా 0.19 శాతం, నిఫ్టీ రియాల్టీ 1.19 శాతం నష్టపోయాయి.