Rajmargyatra: ఎక్కువగా రోడ్డు ప్రయాణాలు చేస్తుంటారా..? NHAI తీసుకొచ్చిన ఈ యాప్ మీకోసమే..

Rajmargyatra: దేశంతో పాటు ఇక్కడి టూరిజం సైతం అభివృద్ధి బాటలో పయనిస్తోంది. అయితే టూరిస్టులు వారి ప్రయాణ అవసరాలను తీర్చుకోవడానికి గూగుల్ మ్యాప్స్ వంటి యాప్స్ ను ఉపయోగిస్తుంటారు. కానీ అది అన్ని నీడ్స్ తీర్చదు. ఈ ఇబ్బందిని గుర్తించిన కేంద్రం కొత్తగా ఓ యాప్ ని అందుబాటులోకి తీసుకొచ్చింది.

ప్రయాణికుల అనుభవాన్ని మెరుగుపరచడానికి నేషనల్ హైవే అథారిటీ ఆఫ్ ఇండియా (NHAI) చర్యలు చేపట్టింది. 'సిటిజన్-సెంట్రిక్ యూనిఫైడ్ మొబైల్ అప్లికేషన్'ని రూపొందించే ప్రయత్నంలో భాగంగా 'రాజ్‌ మార్గ్‌ యాత్ర' అనే కొత్త యాప్‌ను లాంచ్ చేసింది. ఈ అప్లికేషన్ ప్రస్తుతం హిందీ, ఇంగ్లీషు భాషల్లో అందుబాటులో ఉంది. గూగుల్ ప్లే స్టోర్, iOS యాప్ స్టోర్స్ ద్వారా దీనిని డౌన్‌లోడ్ చేసుకోవచ్చు.

దేశంలోని రహదారుల గురించి సమగ్ర సమాచారాన్ని ప్రయాణికులు ఈ యాప్ ద్వారా తెలుసుకోవచ్చు. ఏవైనా ఇబ్బందులు ఉంటే ఫిర్యాదులు సైతం చేయవచ్చు. సంబంధిత యంత్రాంగం దానిపై చర్యలు తీసుకుంటుంది. ఈ యాప్‌ లోని 4 ఫీచర్స్ వినియోగదారులకు చాలా ఉపయోగకరంగా ఉంటాయని భావిస్తున్నారు.

రహదారిపై ఉన్న లైవ్ ట్రాఫిక్, టోల్ ప్లాజాలు, పెట్రోల్ బంక్స్, హాస్పిటల్, హోటల్స్, ట్రాఫిక్ ఆంక్షల సమాచారం ఇందులో పొందవచ్చు. హైవే గురించి ఏవైనా ఫిర్యాదులు ఉంటే జియో-ట్యాగ్ చేసిన ఫొటోస్, వీడియోల ద్వారా డైరెక్టుగా ప్రభుత్వానికి నివేదించవచ్చు. ఫాస్టాగ్ రీఛార్జ్, నెలవారీ పాస్ లు సహా NHAI సేవలు ఒకేచోట అందుకోవచ్చు. వాహనాన్ని నడిపేటప్పడు ఓవర్ స్పీడ్ వంటి సురక్షిత డ్రైవింగ్ నోటిఫికేషన్స్ సైతం పొందొచ్చు.