తెలంగాణ నుంచి తిరుపతికి వేగవంతమైన కనెక్టివిటీ.. నకిరేకల్ - ఏర్పేడు NH-565 పూర్తిగా అందుబాటులోకి..

తెలంగాణ, ఆంధ్రప్రదేశ్ రాష్ట్రాల మధ్య ప్రయాణాన్ని మరింత వేగవంతం చేస్తూ జాతీయ రహదారి-565 పూర్తి స్థాయిలో అందుబాటులోకి వచ్చింది. తెలంగాణ నుంచి ఆధ్యాత్మిక నగరం తిరుపతికి వెళ్లే భక్తులకు అత్యంత సౌకర్యవంతమైన మార్గాన్ని అందిస్తూ జాతీయ రహదారి-565 (NH-565) ఇప్పుడు పూర్తిస్థాయిలో లైవ్ లోకి వచ్చింది. నకిరేకల్ నుండి ఏర్పేడు వరకు సాగే ఈ రహదారి కేవలం ఒక రవాణా మార్గమే కాకుండా, రెండు రాష్ట్రాల మధ్య ఆర్థిక, సామాజిక సంబంధాలను బలోపేతం చేసే కీలక అనుసంధానకర్తగా నిలుస్తోంది.

దాదాపు 420 కిలోమీటర్ల సుదీర్ఘ పొడవు కలిగిన ఈ జాతీయ రహదారి తెలంగాణలోని నకిరేకల్ వద్ద ప్రారంభమై..హైదరాబాద్-విజయవాడ రహదారి (NH-65)ని రాయలసీమలోని మదనపల్లె-నాయుడుపేట రహదారి (NH-71)తో కలుపుతుంది. తెలంగాణలోని నల్గొండ, దేవరకొండ వంటి ప్రాంతాల గుండా ప్రయాణించి, పల్నాడు జిల్లాలోని మాచర్ల వద్ద ఆంధ్రప్రదేశ్‌లోకి ప్రవేశిస్తుంది. అక్కడి నుండి యర్రగొండపాలెం, మార్కాపురం, కనిగిరి, రాపూరు, వెంకటగిరి మీదుగా సాగి చివరకు ఏర్పేడు వద్ద ముగుస్తుంది. ఇక్కడి నుండి భక్తులు సులభంగా శ్రీకాళహస్తికి లేదా తిరుపతికి చేరుకోవచ్చు.

ఈ రహదారి నిర్మాణం ముఖ్యంగా కొత్తగా ఏర్పడిన మార్కాపురం జిల్లా వాసులకు పెద్ద ఊరటనిచ్చింది. గతంలో యర్రగొండపాలెం నుండి హైదరాబాద్ వెళ్లాలంటే అటవీ ప్రాంతంలోని ఘాట్ రోడ్డు ప్రయాణం అత్యంత ప్రమాదకరంగా ఉండేది. కేవలం 20 కిలోమీటర్ల దూరాన్ని దాటడానికి దాదాపు 50 నిమిషాల సమయం పట్టేది. అతుకుల రోడ్లు, ఇరుకైన మలుపులతో ప్రయాణికులు ఎంతో ఇబ్బంది పడేవారు. అయితే, కేంద్ర ప్రభుత్వం సుమారు రూ. 393 కోట్ల భారీ వ్యయంతో ఈ ఘాట్ రోడ్డు మార్గాన్ని అద్భుతంగా తీర్చిదిద్దింది. పర్యావరణ, అటవీ అనుమతుల వంటి కఠినమైన అడ్డంకులు ఎదురైనప్పటికీ, పనులను వేగవంతం చేసి గడువు కంటే ముందే పూర్తి చేయడం విశేషం. దీనివల్ల గతంలో గంట పట్టే ప్రయాణం ఇప్పుడు కేవలం 20 నిమిషాల్లోనే పూర్తవుతోంది.

భద్రత, అత్యాధునిక ఇంజనీరింగ్ ప్రమాణాలతో నిర్మించిన ఈ రహదారిలో ప్రయాణం సాఫీగా సాగేందుకు 16 వంతెనలు, 8 అండర్‌పాస్‌లను ఏర్పాటు చేశారు. కొండలు, పచ్చని అడవుల మధ్య సాగే ఈ ప్రయాణం పర్యాటకులకు, వాహనదారులకు ఒక సరికొత్త అనుభూతిని మిగిలిస్తోంది. ఇది తెలంగాణలోని వరంగల్, ఖమ్మం, నల్గొండ జిల్లాల ప్రజలకు తిరుపతి ప్రయాణ సమయాన్ని గణనీయంగా తగ్గించడమే కాకుండా, కడప జిల్లాలోని పోరుమామిళ్ల వంటి ప్రాంతాల వారు హైదరాబాద్ చేరుకోవడానికి కూడా అత్యంత వేగవంతమైన ప్రత్యామ్నాయ మార్గంగా మారింది. వెనుకబడిన ప్రాంతాల్లో వ్యాపార, వాణిజ్య అవకాశాలను మెరుగుపరుస్తూ, ఈ రహదారి తెలుగు రాష్ట్రాల రవాణా రంగంలో ఒక మైలురాయిగా నిలిచిపోనుంది.