New Rules: తెలంగాణ డ్రైవింగ్ లైసెన్స్ కొత్త రూల్స్! ఇకపై అది ఉంటేనే లైసెన్స్!

తెలంగాణలో వాహనదారులకు రవాణా శాఖ షాక్ ఇచ్చే వార్త చెప్పింది. ఇకపై డ్రైవింగ్ లైసెన్స్ పొందడం మునుపటిలా సులభం కాబోదు. రోడ్డు ప్రమాదాలను అరికట్టడానికి , ప్రజల్లో అవగాహన పెంచడానికి ప్రభుత్వం కొత్త రూల్స్ (New Rules) తీసుకువచ్చింది. ఈ కొత్త నిబంధనల ప్రకారం, మీరు ఎల్.ఎల్.ఆర్ (LLR) కోసం దరఖాస్తు చేసుకునే ముందే ఒక ప్రత్యేకమైన టెస్ట్ పాస్ అవ్వాల్సి ఉంటుంది. దీనికి సంబంధించిన పూర్తి వివరాలు ఇప్పుడు తెలుసుకుందాం.

తెలంగాణ రాష్ట్రంలో రోడ్డు ప్రమాదాల సంఖ్య రోజురోజుకూ ఆందోళనకరంగా మారుతోంది. ఏటా సుమారు 7,500 మంది ప్రాణాలు కోల్పోతుండగా, దాదాపు 28,000 మంది గాయపడుతున్నారు. అతివేగం, అజాగ్రత్తగా డ్రైవింగ్ చేయడం, ట్రాఫిక్ నియమాలపై అవగాహన లేకపోవడమే ఇందుకు ప్రధాన కారణాలని అధికారులు గుర్తించారు. ఈ నేపథ్యంలో, సుప్రీంకోర్టు ఆదేశాల మేరకు రవాణా శాఖ లైసెన్స్ జారీ ప్రక్రియలో భారీ మార్పులు చేస్తూ కొత్త రూల్స్ (New Rules) ప్రవేశపెట్టింది.

మూడు అంచెల విధానం

ఇప్పటివరకు మనం ఎల్.ఎల్.ఆర్ రాసి, ఆ తర్వాత డ్రైవింగ్ టెస్ట్ ఇచ్చి పర్మనెంట్ లైసెన్స్ పొందేవాళ్ళం. కానీ ఇప్పుడు కొత్తగా మరో దశను చేర్చారు. అదే ఆన్‌లైన్ రోడ్డు సేఫ్టీ అవేర్‌నెస్ టెస్ట్. దాని తర్వాత లెర్నర్స్ లైసెన్స్ (LLR) టెస్ట్ అలాగే పర్మనెంట్ డ్రైవింగ్ లైసెన్స్ టెస్ట్
ఏప్రిల్ మొదటి వారం నుండి ఈ నిబంధనలు అమలులోకి రానున్నాయి. మొదటి దశలో పాస్ అయితేనే మీరు రెండో దశకు అర్హులవుతారు.

6 మాడ్యూల్స్.. 3 గంటల సమయం

కొత్త విధానం ప్రకారం, దరఖాస్తుదారులు ఆన్‌లైన్‌లో రోడ్డు భద్రతపై శిక్షణ తీసుకోవాలి. ఇందులో మొత్తం 6 మాడ్యూల్స్ ఉంటాయి. ఒక్కో మాడ్యూల్ 30 నిమిషాల పాటు ఉంటుంది, అంటే మొత్తం 3 గంటల సమయం కేటాయించాలి. ఈ శిక్షణను మీరు ఇంటి వద్ద నుండే కెమెరా ఉన్న ఫోన్ లేదా కంప్యూటర్ ద్వారా పూర్తి చేయవచ్చు. ఒకవేళ వీలు కాకపోతే డ్రైవింగ్ స్కూల్ సెంటర్లకు వెళ్లి కూడా పూర్తి చేయొచ్చు. ఈ కోర్సు చివరలో ఒక చిన్న అసెస్‌మెంట్ (పరీక్ష) ఉంటుంది. అది పూర్తి చేశాక మీకు ఒక యూనిక్ సర్టిఫికేట్ నంబర్ వస్తుంది. ఈ నంబర్ ఉంటేనే ఎల్.ఎల్.ఆర్ దరఖాస్తు సాధ్యమవుతుంది.

ఇందులో ఏం నేర్పిస్తారు?

ఈ శిక్షణలో కేవలం రూల్స్ మాత్రమే కాకుండా, నిజ జీవితంలో జరిగే ప్రమాదాల దృశ్యాలను (Real-life scenarios) చూపిస్తారు. అద్దాల (Mirrors) వాడకం, ఓవర్‌టేకింగ్ పద్ధతులు, ప్రమాదాలు జరిగినప్పుడు బాధితుల కుటుంబాలు పడే బాధ వంటి అంశాలపై అవగాహన కల్పిస్తారు. ఇది కష్టమైన పరీక్ష కాకపోయినా, బాధ్యతాయుతమైన డ్రైవింగ్ అలవాటు చేయడానికి చాలా కీలకం.

గణాంకాల ప్రకారం తెలంగాణలో 2024లో 25,986 ప్రమాదాలు జరగ్గా, 2025 నాటికి అవి 27,352కి పెరిగాయి. మరణాల సంఖ్య స్వల్పంగా తగ్గినా, ప్రమాదాల తీవ్రత మాత్రం తగ్గడం లేదు. అందుకే లైసెన్స్ ఇచ్చే ముందే డ్రైవర్లకు పూర్తి అవగాహన ఉండాలని ప్రభుత్వం ఈ కఠిన నిర్ణయం తీసుకుంది. మీరు కూడా కొత్త లైసెన్స్ కోసం ప్లాన్ చేస్తుంటే, ఈ మారుతున్న నిబంధనల గురించి తెలుసుకోవడం చాలా అవసరం.