Income tax rules : డబుల్ కానున్న టాక్స్ మినహాయింపులు.. మీ చేతికి వచ్చే జీతం పెరుగుతుందా?

సొంతంగా ఇల్లు ఉన్నా, అద్దె ఇంట్లో ఉన్నా.. ప్రతి నెలా వచ్చే జీతంలో పన్ను రూపంలో ఎంత కట్ అవుతుందో అని సామాన్య ఉద్యోగులు ఆందోళన చెందుతుంటారు. అయితే కేంద్ర ప్రభుత్వం ప్రతిపాదించిన కొత్త ట్యాక్స్ రూల్స్ (income tax rules) 2026 ముసాయిదా నిబంధనలు అమల్లోకి వస్తే, జీతగాళ్లకు ఊహించని విధంగా భారీ పన్ను ప్రయోజనాలు లభించే అవకాశం ఉంది. ముఖ్యంగా పాత పన్ను విధానాన్ని (Old Tax Regime) అనుసరించే వారికి ఈ మార్పులు ఒక వరంగా మారబోతున్నాయి. ఈ కొత్త ప్రతిపాదనల వల్ల ట్యాక్స్ మినహాయింపుల పూల్ దాదాపు రెట్టింపు అయ్యే సూచనలు కనిపిస్తున్నాయి.

మినహాయింపుల పరిమితి భారీగా పెంపు

ప్రస్తుతం ఉన్న నిబంధనల ప్రకారం.. ఒక జీతగాడు వివిధ అలవెన్సులు , ప్రయోజనాల ద్వారా సుమారు రూ. 6.9 లక్షల వరకు పన్ను మినహాయింపులను క్లెయిమ్ చేయవచ్చు. అయితే, కొత్త ముసాయిదా నిబంధనల ప్రకారం, ఈ పరిమితిని ఏకంగా రూ. 12.08 లక్షలకు పెంచాలని ప్రభుత్వం భావిస్తోంది. దీనివల్ల పన్ను పరిధిలోకి వచ్చే నికర ఆదాయం గణనీయంగా తగ్గుతుంది. ఫలితంగా ఉద్యోగుల చేతికి వచ్చే నికర జీతం (Take-home salary) పెరుగుతుంది.

రూ. 30 లక్షల ప్యాకేజీ వారికి ఎంత ఆదా?

ఒకవేళ మీ వార్షిక ఆదాయం రూ. 30 లక్షలు అనుకుందాం. కొత్త నిబంధనల ప్రకారం మీరు మీ శాలరీ స్ట్రక్చర్‌ను సరిగ్గా ప్లాన్ చేసుకుంటే, ఏడాదికి దాదాపు రూ. 1.72 లక్షల వరకు పన్ను ఆదా చేసుకోవచ్చని నిపుణులు చెబుతున్నారు. ఇది ఉద్యోగుల పొదుపు సామర్థ్యాన్ని పెంచడమే కాకుండా వారి ఆర్థిక స్థితిని మెరుగుపరుస్తుంది.

దశాబ్దాల కాలం నాటి అలవెన్సుల్లో మార్పులు

ప్రస్తుతం మనం వాడుతున్న చాలా పన్ను మినహాయింపు పరిమితులు దశాబ్దాల క్రితం నిర్ణయించినవి. పెరిగిన జీవన వ్యయానికి అనుగుణంగా వీటిని మార్చాలనే డిమాండ్ ఎప్పటి నుంచో ఉంది. ఈ క్రమంలోనే ట్యాక్స్ రూల్స్ (income tax rules) లో భాగంగా ఈ క్రింది అలవెన్సులను పెంచాలని ప్రతిపాదించారు..

• పిల్లల విద్యా అలవెన్స్: గత కొన్నేళ్లుగా చాలా తక్కువగా ఉన్న ఈ పరిమితి పెరగనుంది.
• హాస్టల్ అలవెన్స్: హాస్టల్ ఖర్చులకు ఇచ్చే మినహాయింపులో మార్పులు రానున్నాయి.
• భోజన, గిఫ్ట్ వోచర్లు: ఉద్యోగులకు ఇచ్చే మీల్ కూపన్లు, గిఫ్ట్ అలవెన్సులపై పరిమితి పెరగవచ్చు.
• రవాణా, ఇతర ప్రయోజనాలు: ఆఫీస్ ప్రయాణ ఖర్చుల రీయింబర్స్‌మెంట్లలో కూడా సానుకూల మార్పులు రానున్నాయి.

పాత vs కొత్త పన్ను విధానం

ఉద్యోగులు తమకు నచ్చిన విధంగా పాత లేదా కొత్త పన్ను విధానాన్ని ఎంచుకునే సౌలభ్యం అలాగే ఉంటుంది. తక్కువ పన్ను రేట్లు కావాలనుకునే వారు కొత్త విధానాన్ని.. మరిన్ని మినహాయింపులు, డిడక్షన్లు కోరుకునే వారు పాత విధానాన్ని ఎంచుకోవచ్చు. కొత్త ముసాయిదా నిబంధనలు ప్రధానంగా పాత విధానంలో ఉంటూ ఇన్వెస్ట్‌మెంట్లు , అలవెన్సుల ద్వారా పన్ను ఆదా చేయాలనుకునే వారికి మేలు చేస్తాయి.

ఎప్పటి నుండి అమల్లోకి వస్తాయి? ప్రస్తుతానికి ఇవి కేవలం ముసాయిదా (Draft) నిబంధనలు మాత్రమే. ప్రభుత్వం ప్రజల నుండి, నిపుణుల నుండి అభిప్రాయాలను సేకరిస్తోంది. ఇవన్నీ ఆమోదం పొందితే ఆర్థిక సంవత్సరం 2026-27 నుండి ఇవి అమల్లోకి వచ్చే అవకాశం ఉంది. మీ జీతం, పన్ను ప్రణాళికను మార్చుకోవడానికి ఇది ఒక గొప్ప అవకాశంగా మారబోతోంది.