Click it and Unblock the Notifications
బెంగళూరు సిల్క్ బోర్డు సమీపంలో ట్రాఫిక్ కష్టాలకు చెక్.. రెండు కొత్త ఫ్లైఓవర్-కమ్-అండర్పాస్ ప్రాజెక్టులు రెడీ
దక్షిణ బెంగళూరులో ట్రాఫిక్ సమస్యలను తగ్గించేందుకు మరో కీలక అడుగు పడుతోంది. ఇటీవల ప్రారంభమైన నగరంలోని తొలి డబుల్ డెక్కర్ రైల్-కమ్-రోడ్ ఫ్లైఓవర్ వల్ల సెంట్రల్ సిల్క్ బోర్డ్ జంక్షన్ వద్ద ట్రాఫిక్ రద్దీ గణనీయంగా తగ్గినప్పటికీ.. ఆ ప్రభావం ఇప్పుడు సమీప ప్రాంతాలపై పడుతోంది. ప్రధాన కూడళ్ల వద్ద వాహనాల రద్దీ పెరగడంతో.. Bengaluru సౌత్ సిటీ కార్పొరేషన్ (BSCC) రెండు కొత్త ఫ్లైఓవర్-కమ్-అండర్పాస్ ప్రాజెక్టులను పరిశీలిస్తోంది. ఈ క్రమంలో మారెనహళ్లి రోడ్డులోని రాఘవేంద్ర స్వామి మఠం జంక్షన్, బన్నేరుఘట్ట మెయిన్ రోడ్డులోని వేగా సిటీ మాల్ జంక్షన్ వద్ద భారీ గ్రేడ్-సెపరేటెడ్ ఇంటర్చేంజ్ల నిర్మాణానికి సంబంధించిన సాధ్యాసాధ్యాల అధ్యయనాలు చేపట్టాలని నిర్ణయించింది.
ఈ రెండు ప్రదేశాలు ప్రస్తుతం దక్షిణ బెంగళూరులో అత్యంత రద్దీగా మారిన ట్రాఫిక్ పాయింట్లుగా గుర్తించబడ్డాయి. సెంట్రల్ సిల్క్ బోర్డ్ వద్ద సిగ్నల్ రహిత రాకపోకలు అందుబాటులోకి రావడంతో వాహనాలు వేగంగా ప్రయాణిస్తున్నప్పటికీ, తదుపరి కూడళ్ల వద్ద వాహనాల ఒత్తిడి ఒక్కసారిగా పెరిగింది. ముఖ్యంగా బన్నేరుఘట్ట రోడ్, జేపీ నగర్, బీటీఎం లేఅవుట్, హెచ్ఎస్ఆర్ లేఅవుట్ ప్రాంతాల మధ్య రోజువారీ ప్రయాణాలు చేసే ఉద్యోగులు, విద్యార్థులు తీవ్ర ఇబ్బందులు ఎదుర్కొంటున్నారు. ఉదయం, సాయంత్రం పీక్ అవర్స్ సమయంలో వాహనాలు కిలోమీటర్ల మేర నిలిచిపోతున్నాయి.
ఈ నేపథ్యంలో ట్రాఫిక్ను బహుళస్థాయిలుగా విభజించే ఫ్లైఓవర్-కమ్-అండర్పాస్ నమూనాను అమలు చేయాలని అధికారులు భావిస్తున్నారు. ఈ తరహా నిర్మాణాల్లో పైభాగంలో ఫ్లైఓవర్, దిగువన అండర్పాస్ ఏర్పాటు చేసి వాహనాలను వేర్వేరు దిశల్లో నిరంతరాయంగా మళ్లిస్తారు.
దీంతో ట్రాఫిక్ సిగ్నళ్లపై ఆధారపడకుండా రాకపోకలు సులభతరం అవుతాయి. ప్రస్తుతం BSCC టెండర్ల ద్వారా కన్సల్టెంట్లను ఎంపిక చేసి, ట్రాఫిక్ డేటా, భూసేకరణ అవసరాలు, నిర్మాణ వ్యయం, పర్యావరణ ప్రభావం వంటి అంశాలపై సమగ్ర అధ్యయనం చేయించనుంది. అనంతరం వివరణాత్మక ప్రాజెక్ట్ నివేదికలు (DPRలు) సిద్ధం చేసి ప్రభుత్వ అనుమతులకు పంపించనున్నారు.
ఇది అంతా ఇటీవల పూర్తిస్థాయిలో ప్రారంభమైన రూ. 499 కోట్ల విలువైన రాగిగుడ్డ-సెంట్రల్ సిల్క్ బోర్డ్ డబుల్ డెక్కర్ ప్రాజెక్ట్ విజయానంతరం జరుగుతోంది. సుమారు 5.12 కిలోమీటర్ల పొడవున్న ఈ ప్రాజెక్ట్లో మెట్రో మార్గం కింద రహదారి ఫ్లైఓవర్ను నిర్మించారు. లూప్లు, ర్యాంప్లు, సిగ్నల్ ఫ్రీ కారిడార్లతో రూపొందించిన ఈ వ్యవస్థ వల్ల హోసూర్ రోడ్, హెచ్ఎస్ఆర్ లేఅవుట్ వైపు ప్రయాణ సమయం తగ్గిందని అధికారులు చెబుతున్నారు.
అయితే ఒక ప్రాంతంలో ట్రాఫిక్ తగ్గితే మరో ప్రాంతంలో ఒత్తిడి పెరగడం నగర ప్రణాళికలో పెద్ద సవాలుగా మారింది. అందుకే ఇప్పుడు దక్షిణ బెంగళూరులో కొత్త ట్రాఫిక్ కారిడార్ల నిర్మాణంపై అధికారులు దృష్టి పెట్టారు. ఈ ప్రాజెక్టులు అమలైతే రోజువారీ ప్రయాణికులకు గణనీయమైన ఉపశమనం లభించే అవకాశం ఉందని భావిస్తున్నారు.
Sign in with Google