Bengaluru: కరెంట్ బిల్లు కడుతున్నారా? జూన్ 1 నుండి మారబోతున్న కొత్త రూల్స్ ఇవే!

బెంగళూరుతో పాటు కర్ణాటక వ్యాప్తంగా ఉండే విద్యుత్ వినియోగదారులకు కర్ణాటక విద్యుత్ నియంత్రణ మండలి (KERC) ఒక పెద్ద ఊరటనిచ్చే వార్త చెప్పింది. కరెంట్ బిల్లుల చెల్లింపుల్లో డిస్ట్రిబ్యూషన్ కంపెనీలు (Discoms) చేస్తున్న ఇష్టారాజ్యానికి అడ్డుకట్ట వేస్తూ ఒక కీలకమైన ఆర్డర్ పాస్ చేసింది. జూన్ 1, 2026 నుండి ప్రతి కరెంట్ బిల్లు చెల్లించడానికి కస్టమర్లకు కనీసం 15 రోజుల సమయం ఇవ్వాలని స్పష్టం చేసింది.

ఈ మేరకు చైర్మన్ పి. రవికుమార్, సభ్యులు హెచ్.కె. జగదీష్, జవైద్ అక్తర్‌లతో కూడిన కమిషన్ బెంచ్ మే 21, 2026న అధికారిక ఆదేశాలు జారీ చేసింది. అసలు ఈ నిర్ణయం ఎందుకు తీసుకోవాల్సి వచ్చింది? దీనివల్ల సామాన్యులకు వచ్చే లాభం ఏంటో ఇప్పుడు తెలుసుకుందాం.

అసలు సమస్య ఏంటి?

నిజానికి కర్ణాటక ఎలక్ట్రిసిటీ సప్లై కోడ్ - 2004 ప్రకారం.. బిల్లు జనరేట్ అయినప్పటి నుండి కస్టమర్లకు డబ్బులు కట్టడానికి 15 రోజుల టైం ఇవ్వాలి. ఒకవేళ బిల్లు కట్టాల్సిన చివరి తేదీ ఆదివారం లేదా ఏదైనా ప్రభుత్వ సెలవు రోజు అయితే, ఆ గడువును ఆటోమేటిక్‌గా తర్వాతి పనిదినానికి పొడిగించాలి. కానీ చాలా కంపెనీలు ఈ రూల్స్ అస్సలు పాటించడం లేదు.

బెంగళూరు (Bengaluru) లాంటి నగరాల్లో బిల్లులు చాలా ఆలస్యంగా ఇస్తున్నారు. ఉదాహరణకు, బిల్లు ప్రింట్ అవ్వాల్సిన డేట్ ఒకటి అయితే, అది కస్టమర్ చేతికి వచ్చేసరికి వారం రోజులు పడుతోంది. కానీ కంపెనీలు మాత్రం పాత డేట్ ప్రకారమే డ్యూ డేట్ లెక్కగడుతున్నాయి. దీనివల్ల కస్టమర్లకు బిల్లు కట్టడానికి కేవలం నాలుగైదు రోజులే సమయం మిగులుతోంది. దీంతో సామాన్యులు తీవ్ర ఇబ్బందులు పడుతున్నారు, పెనాల్టీలు కట్టాల్సి వస్తోంది.

కచ్చితంగా 15 రోజుల సమయం ఉండాల్సిందే!

వినియోగదారుల నుండి వచ్చిన వందలాది ఫిర్యాదులపై స్పందించిన KERC, ఈ అన్యాయమైన పద్ధతికి చెక్ పెట్టింది. కొత్త రూల్స్ ప్రకారం..

• టైమ్ స్టాంప్ తప్పనిసరి: ఇకపై ప్రతి కరెంట్ బిల్లు పైన అది ఏ రోజు, ఏ టైమ్‌కి ప్రింట్ అయ్యిందో సిస్టమ్ జనరేటెడ్ టైమ్ స్టాంప్ స్పష్టంగా ఉండాలి.
• యాక్చువల్ డేట్ నుండే కౌంటింగ్: బిల్లు ఎప్పుడు ప్లాన్ చేశారు అనేదానితో సంబంధం లేదు. బిల్లు ఏ రోజు అయితే కస్టమర్ చేతికి ఇస్తారో, ఆ రోజు నుండి మాత్రమే 15 రోజుల గడువును లెక్కించాలి.
• ఆలస్యంగా వస్తే అదనపు టైం: ఒకవేళ బిల్లింగ్ సైకిల్ ఆలస్యమై బిల్లు లేట్‌గా వచ్చినా సరే, కస్టమర్‌కు పూర్తి స్థాయిలో 15 రోజుల క్లియర్ పేమెంట్ విండో ఇవ్వాల్సిందే.

రూల్స్ బ్రేక్ చేస్తే ఎండీలపై చర్యలు!

ఈ కొత్త నియమాలు జూన్ 1, 2026 నుండి జారీ అయ్యే ప్రతి బిల్లుకు వర్తిస్తాయని కమిషన్ స్పష్టం చేసింది. ఒకవేళ ఏ కంపెనీ అయినా ఈ రూల్స్ ఉల్లంఘిస్తే ఎలక్ట్రిసిటీ యాక్ట్ - 2003 లోని సెక్షన్ 142 ప్రకారం కఠినమైన చట్టపరమైన చర్యలు ఉంటాయని హెచ్చరించింది.

అంతేకాదు, తప్పులు జరిగితే నేరుగా ఆయా విద్యుత్ పంపిణీ సంస్థల మేనేజింగ్ డైరెక్టర్లదే (MDs) వ్యక్తిగత బాధ్యత అని తేల్చి చెప్పింది. ఈ నిర్ణయం వల్ల బెంగళూరు విద్యుత్ రంగంలో పారదర్శకత పెరగడమే కాకుండా, వినియోగదారుల హక్కులకు పూర్తి రక్షణ దొరుకుతుందని నిపుణులు భావిస్తున్నారు. కాబట్టి జూన్ నుండి మీ కరెంట్ బిల్లు తీసుకునేటప్పుడు పైన ప్రింట్ అయిన డేట్, డ్యూ డేట్ కచ్చితంగా సరిచూసుకోండి!