Credit card: క్రెడిట్ కార్డ్ వాడుతున్నారా? ఏప్రిల్ 1 లోపు ఈ మార్పులు తెలుసుకోకపోతే ఇబ్బందే!

ఈ రోజుల్లో టీ కప్పు దగ్గర నుండి విమాన టిక్కెట్ల వరకు ప్రతిదానికీ క్రెడిట్ కార్డు (Credit card) వాడటం సర్వసాధారణం అయిపోయింది. అయితే ఈ వాడకం పెరిగే కొద్దీ పన్ను అధికారులు కూడా తమ నిఘాను పెంచుతున్నారు. ప్రతిపాదిత ఆదాయపు పన్ను నిబంధనలు 2026 (Draft Income Tax Rules 2026) ప్రకారం ఏప్రిల్ 1 నుండి క్రెడిట్ కార్డ్ వినియోగదారులపై కొన్ని కొత్త నిబంధనలు అమలు కానున్నాయి. ఈ మార్పులు మీ ఆర్థిక లావాదేవీలపై ఎలాంటి ప్రభావం చూపుతాయో ఇప్పుడు వివరంగా తెలుసుకుందాం.

పాన్ కార్డ్ తప్పనిసరి (Mandatory PAN)

ఇకపై కొత్తగా క్రెడిట్ కార్డ్ కోసం దరఖాస్తు చేసుకోవాలంటే 'పాన్' (PAN) కార్డ్ తప్పనిసరి. కొత్త నిబంధనల ప్రకారం, పాన్ వివరాలు ఇవ్వకుండా బ్యాంకులు ఏ అప్లికేషన్‌ను ప్రాసెస్ చేయవు. క్రెడిట్ కార్డ్ ఖర్చులను పన్ను వ్యవస్థతో అనుసంధానించడానికి , నకిలీ ఖాతాలను అరికట్టడానికి ప్రభుత్వం ఈ నిర్ణయం తీసుకుంది.

భారీ లావాదేవీలపై ఐటీ శాఖ నిఘా

ఒక ఆర్థిక సంవత్సరంలో మీరు క్రెడిట్ కార్డ్ ద్వారా రూ. 10 లక్షలు లేదా అంతకంటే ఎక్కువ నగదు రహిత (Online/Swipe) చెల్లింపులు చేస్తే.. ఆ వివరాలను బ్యాంకులు నేరుగా ఆదాయపు పన్ను శాఖకు నివేదిస్తాయి. అలాగే రూ. 1 లక్ష లేదా అంతకంటే ఎక్కువ నగదు (Cash) రూపంలో క్రెడిట్ కార్డ్ బిల్లు చెల్లిస్తే కూడా ఐటీ శాఖకు సమాచారం వెళ్తుంది. మీ ఆదాయానికి, ఖర్చులకు పొంతన లేకపోతే నోటీసులు వచ్చే అవకాశం ఉంది.

క్రెడిట్ కార్డ్‌ తో ఆదాయపు పన్ను చెల్లింపు

పన్ను చెల్లింపుదారులకు ఇది ఒక శుభవార్త. త్వరలో మీరు మీ ఆదాయపు పన్నును కూడా క్రెడిట్ కార్డు (Credit card) ద్వారా చెల్లించే అవకాశం కలగనుంది. ప్రస్తుతం నెట్ బ్యాంకింగ్ లేదా డెబిట్ కార్డులకే పరిమితమైన ఈ సౌకర్యం క్రెడిట్ కార్డ్ వినియోగదారులకు మరింత వెసులుబాటును ఇస్తుంది. అయితే, దీనిపై పడే వడ్డీ రేట్లు , ప్రాసెసింగ్ ఫీజులను గమనించుకోవడం ముఖ్యం.

కంపెనీ క్రెడిట్ కార్డుల వినియోగం

ఉద్యోగులకు కంపెనీలు ఇచ్చే క్రెడిట్ కార్డుల విషయంలో కూడా నిబంధనలు కఠినతరం కానున్నాయి. ఆ కార్డ్ ద్వారా చేసే ఖర్చులను వ్యక్తిగత ప్రయోజనాలుగా (Perquisites) పరిగణించి పన్ను విధించే అవకాశం ఉంది. అయితే, ఆ ఖర్చు కేవలం కంపెనీ పనుల కోసమే అని సరైన ఆధారాలు , సర్టిఫికేషన్ చూపిస్తే పన్ను మినహాయింపు పొందవచ్చు.

అడ్రస్ ప్రూఫ్‌ గా క్రెడిట్ కార్డ్ స్టేట్‌మెంట్

పాన్ కార్డ్ దరఖాస్తు చేసుకునే వారికి ఇది సులభతరమైన మార్పు. గత మూడు నెలల్లో జారీ చేసిన క్రెడిట్ కార్డ్ స్టేట్‌మెంట్‌ను ఇకపై చెల్లుబాటు అయ్యే చిరునామా ధృవీకరణ పత్రం (Address Proof) గా అంగీకరిస్తారు. దీనివల్ల డాక్యుమెంటేషన్ ప్రక్రియ మరింత సులభం అవుతుంది.

ఈ నిబంధనలు ప్రస్తుతానికి డ్రాఫ్ట్ రూపంలో ఉన్నాయి. ప్రజల అభిప్రాయాల తర్వాత ఏప్రిల్ 1 నుండి అధికారికంగా అమల్లోకి రానున్నాయి. కాబట్టి క్రెడిట్ కార్డ్ వాడేటప్పుడు కాస్త జాగ్రత్తగా నిబంధనలకు లోబడి వ్యవహరించడం ఉత్తమం.