MDH, Everest: ఎండీహెచ్, ఎవరెస్ట్ మసాలాలపై నిషేధం విధించిన నేపాల్..

భారతీయ మసాలా దినుసులకు సంబంధించి గత నెలలో మొదలైన వివాదం ఇంకా ఆగడం లేదు. భారతీయ మసాలాలను సింగపూర్, హాంకాంగ్ ఇప్పటికే నిషేధించాయి. తాజాగా నేపాల్‌లో కూడా భారతీయ సుగంధ ద్రవ్యాల బ్రాండ్‌లు ఎవరెస్ట్, ఎండీహెచ్ అమ్మకం, దిగుమతి వినియోగం నిషేధం విధించారు. ఈ రెండు కంపెనీల మసాలా దినుసులలో రసాయన ఇథిలీన్ ఆక్సైడ్ ఉన్నట్లు అనుమానం ఉన్న నేపథ్యంలో నేపాల్ ఈ నిర్ణయం తీసుకుంది.

నేపాల్ ఫుడ్ టెక్నాలజీ అండ్ క్వాలిటీ కంట్రోల్ డిపార్ట్‌మెంట్ రెండు బ్రాండ్‌ల సుగంధ ద్రవ్యాలలో ఈ రసాయనాన్ని పరీక్షించడం ప్రారంభించింది.
ఈ రెండు సుగంధ ద్రవ్యాలు అంటే ఎండీహెచ్, ఎవరెస్ట్ దిగుమతిని ప్రస్తుతానికి నిషేధించినట్లు నేపాల్ ఫుడ్ టెక్నాలజీ విభాగం ప్రతినిధి మోహన్ కృష్ణ మహారాజన్ తెలిపారు. ఈ మసాలా దినుసుల్లో ఇథిలీన్ ఆక్సైడ్ అనే క్రిమిసంహారక మందు ఉన్నట్లు వార్తలు రావడంతో ప్రభుత్వం ఈ చర్య తీసుకుంది.

ప్రస్తుతం విచారణ నివేదిక వచ్చే వరకు ఈ నిషేధం కొనసాగనుంది. భారత్ ప్రసిద్ధ మసాలా బ్రాండ్లు ఎండీహెచ్, ఎవరెస్ట్ భారత్ తో పాటు బ్రిటన్, న్యూజిలాండ్, అమెరికా, మధ్యప్రాచ్యంతో సహా ప్రపంచంలోని అనేక దేశాలలో మసాలాలు అమ్ముతున్నారు. బుధవారం, న్యూజిలాండ్ ఫుడ్ సేఫ్టీ రెగ్యులేటర్ భారతీయ మసాలా బ్రాండ్‌ల వివిధ ఉత్పత్తులపై పరీక్ష నిర్వహిస్తోంది. అమెరికా, ఆస్ట్రేలియా ఆహార భద్రతా నియంత్రకాలు కూడా ఈ రెండు బ్రాండ్ల మసాలా దినుసులపై దర్యాప్తు ప్రారంభించాయి.

బ్రిటన్ ఫుడ్ సేఫ్టీ ఏజెన్సీ కూడా భారీ చర్యలు చేపట్టింది. భారతదేశం నుంచి వస్తున్న సుగంధ ద్రవ్యాలపై దర్యాప్తు ప్రారంభించింది. బయటి దేశాలతో పాటు దేశీయంగానూ ఈ రెండు కంపెనీలు ఇబ్బందులు ఎదుర్కొంటున్నాయి. దేశీయ ఆహార భద్రత నియంత్రణ సంస్థ FSSAI కఠినమైన చర్యలు తీసుకుంది. దేశవ్యాప్తంగా ఈ రెండు మసాలా దినుసుల 1500 కంటే ఎక్కువ నమూనాలను తీసుకుంది.