GoFirst: గోఫస్ట్ దివాలా ప్రక్రియ.. NCLT నిర్ణయాన్ని సమర్థించిన NCLAT..

GoFirst: బ్రిటానియా ఇండస్ట్రీస్ యజమాని వాడియా గ్రూప్ నేతృత్వంలోని బడ్జెట్ విమాన సంస్థ గోఫస్ట్ డబ్బు కొరతతో గ్రౌండ్ అయిన సంగతి తెలిసిందే. దీంతో కంపెనీ స్వచ్చందంగా దివాలా ప్రక్రియ కోసం కంపెనీ లా ట్రిబ్యునల్ ను అభ్యర్థించింది.

గోఫస్ట్ దివాలా చర్యలకు NCLT అంగీకరించటంతో విమాన అద్దెదారులు అప్పిలేట్ ట్రిబ్యునల్ తలుపు తట్టారు. అయితే ఎన్సీఎల్టీ ఇచ్చిన తీర్పును సమర్థిస్తున్నట్లు ఎన్సీఎల్ఏటీ వెల్లడించింది. దీంతో విమాన అద్దెదారులు తమ విహంగాలను తిరిగి స్వాధీనం చేసుకునేందుకు చేసిన ప్రయత్నాలకు ఎదురుదెబ్బ తగిలింది. దీనికి ముందు నేషనల్ కంపెనీ లా ట్రిబ్యునల్(NCLT) మే 10న ఎయిర్‌లైన్ స్వచ్ఛంద అభ్యర్థన దివాలా పరిష్కార ప్రక్రియను అంగీకరించింది.

దివాలా ప్రక్రియను సజావుగా నిర్వహించేందుకు అభిలాష్ లాల్ క్యారియర్ మధ్యంతర రిజల్యూషన్ ప్రొఫెషనల్‌గా నియమించబడ్డారు. దివాలా పరిష్కార ప్రక్రియలో ఉన్న గో ఫస్ట్ మే 3 నుంచి విమానాలను నడపటం నిలిపివేసింది. తదుపరి ఉత్తర్వులు వచ్చే వరకు టికెట్ బుకింగ్ చేయవద్దని డీజీసీఏ తాత్కాలికంగా నిషేధం విధించింది. అయితే వాడియా గ్రూప్ మాత్రం విమాన సేవలకు కట్టుబడి ఉందని త్వరలోనే గ్రౌండ్ అయిన విమానాలను తిరిగి సేవల్లోకి తీసుకొస్తామని కంపెనీ సీఈవో గతంలో వెల్లడించిన సంగతి తెలిసిందే.

నిర్వహణ కారణాలతో మే 26, 2023 వరకు విమాన సేవలను తాత్కాలికంగా రద్దు చేసినట్లు కంపెనీ అధికారిక మాధ్యమాల్లో వెల్లడించింది. ఇప్పటి వరకు విమాన టిక్కెట్లు కొన్న వారికి ఒరిజినల్ పేమెంట్ మోడ్ ద్వారా డబ్బును పూర్తిగా రీఫండ్ చేస్తామని కంపెనీ ప్రకటించింది. అలాగే త్వరలోనే విమానాల బుక్కింగ్స్ తిరిగి ప్రారంభిస్తామని వెల్లడించింది. గో ఫస్ట్ కార్పొరేట్ ఇన్సాల్వెన్సీ రిజల్యూషన్ ప్రాసెస్(CIRP) కోసం క్లెయిమ్ మేనేజ్‌మెంట్ పోర్టల్ 'gofirstclaims.in/claims' ప్రారంభించబడింది.