వచ్చే నెల నుండి బ్యాడ్ బ్యాంకు! స్విస్ ఛాలెంజ్ పద్ధతిలో బిడ్స్‌కు ఆహ్వానం

2020-21 ఆర్థిక సంవత్సరం బడ్జెట్ సందర్భంగా కేంద్ర ఆర్థికమంత్రి నిర్మలా సీతారామన్ నేషనల్ అసెట్ రీస్ట్రక్షన్ కంపెనీ లిమిటెడ్ (NARCL) లేదా బ్యాడ్ బ్యాంకును ప్రకటించిన విషయం తెలిసిందే. ఈ బ్యాడ్ బ్యాంకు ఆపరేషన్స్ జూన్ నెల నుండి ప్రారంభం కానున్నట్లు తెలుస్తోంది. బ్యాడ్ బ్యాంకు అనేది రుణదాతల ఎన్పీఏలను స్వాధీనం చేసుకునే సంస్థ. ప్రభుత్వ, ప్రయివేటు రంగ బ్యాంకుల సహకారంతో ఈ కొత్త సంస్థను రూపొందిస్తున్నట్లు ఇండియన్ బ్యాంక్స్ అసోసియేషన్ చీఫ్ ఎగ్జిక్యూటివ్ (CEO) సునీల్ మెహాతా తెలిపారు.

వచ్చే నెల నుండి బ్యాడ్ లోన్స్

ఇందుకు సన్నాహక పనులు జరుగుతున్నాయని, ఇది వచ్చే నెల నుండి పని చేసే అవకాశాలు ఉన్నాయని, ఈ మేరకు తాము ఆశాభావం వ్యక్తం చేస్తున్నామని మెహతా తెలిపారు. NARCL యొక్క అతిపెద్ద ప్రయోజనం గుర్తించబడిన NPAలను (నిరర్ధక ఆస్తులు) సమగ్రపరచడమన్నారు. మనీ రికవరీలో ఇది సమర్థవంతంగా పని చేస్తోందని భావిస్తున్నట్లు తెలిపారు. బ్యాడ్ లోన్స్ లేదా ఎన్పీఏల పరిష్కారంలో ఇది సమర్థవంతంగా ఉంటుందన్నారు. రుణదాతలు గుర్తించిన బ్యాడ్ లోన్స్‌ను NARCL తన పరిధిలోకి తీసుకుంటుందన్నారు.

పరిష్కారం

బ్యాడ్ బ్యాంక్ ఒక ఆర్థిక సంస్థగా ఏర్పాటయి, రుణదాతల వద్ద పేరుకు పోయిన మొండి బకాయిలను తీసుకుని, వాటికి ఓ పరిష్కారం చూపుతుంది. ప్రభుత్వ, ప్రయివేటు బ్యాంకుల సహకారంతో ఈ బ్యాడ్ బ్యాంక్ ఏర్పాటు అవుతోంది. మొండి బకాయిల పరిష్కారానికి చాలా మంది రుణదాతలు ఇబ్బందులు ఎదుర్కొంటున్నారని, ఓసారి బ్యాడ్ బ్యాంక్ కార్యకలాపాలు ప్రారంభమైతే 100 శాతం రుణాలను దానికి అప్పగించి రుణదాతలు ఒక మంచి పరిష్కారాన్ని పొందే అవకాశం ఉంటుంది.

స్విస్ ఛాలెంజ్ పద్ధతిలో..

రుణదాతలు గుర్తించిన ఎన్పీఏలను NARCL స్వాధీనం చేసుకుంటుంది. ఇందులోని లీడ్ బ్యాంక్ స్విస్ ఛాలెంజ్ పద్ధతిలో ఇతర ఆస్తుల పునర్నిర్మాణ కంపెనీల నుండి బిడ్స్‌ను ఆహ్వానిస్తుంది. ఎన్పీఏకు అధిక వ్యాల్యూ రాబట్టేందుకు ప్రయత్నిస్తుంది. రుణదాతలు 100 శాతం కేటాయింపులు జరిపిన ఆస్తులను ఇందుకు ఎంచుకుంటుంది.