Narayana Murthy: 5 నెలల పిల్లాడు 4 కోట్ల సంపాదన.. ఇదీ నారాయణ మూర్తి మనవడి స్టోరీ..

Infosys News: దేశంలో అతిపెద్ద IT కంపెనీల్లో ఇన్ఫోసిస్ రెండో స్థానంలో ఉంది. దాని సహవ్యవస్థాపకులుగా నారాయణ మూర్తి అందరికీ సుపరిచితమే. అయితే ఇప్పుడు ఆయన మనవడు ఏకాగ్ర రోహన్ మూర్తి గురించి వార్తలు నెట్టింట హల్‌చల్‌ చేస్తున్నాయి. వయసు కేవలం 5 నెలలే అయినా కోట్లాది రూపాయలు విలువైన షేర్లు ఆ పిల్లాడి సొంతం కావడమే ఇందుకు కారణం.

తాజాగా నారాయణ మూర్తి మనవడు ఏకంగా 4 కోట్లు సంపాదించాడు. 5 నెలల ఏకగ్రహ రోహన్ మూర్తికి తన తాత నారాయణ మూర్తి గత నెలలో 15 లక్షల ఇన్ఫోసిస్ షేర్లను బహుమతిగా ఇచ్చారు. వాటి నుంచి ఇప్పుడు 4.2 కోట్ల మేర డివిడెండ్ ఆదాయాన్ని పొందాడు. దీంతో ఆ పిల్లాడు కాస్తా మరింత సంపన్నుడు అయ్యాడు. అతడు హోల్డ్ చేస్తున్న మొత్తం షేర్ల విలువ 210 కోట్లకు చేరింది.

గతేడాది నవబంర్ 10న ఏకాగ్ర బెంగళూరులో జన్మించాడు. బాలుడి తండ్రి రోహన్‌ మూర్తి హార్వర్డ్ యూనివర్సిటీ నుంచి కంప్యూటర్‌ సైన్స్‌లో Phd చేసి, సాఫ్ట్‌వేర్ సంస్థ సోరోకోను నడిపిస్తున్నారు. తల్లి అపర్ణ కృష్ణన్ మూర్తి మీడియా అధినేతగా కొనసాగుతున్నారు. ఇకపోతే నారాయణ మూర్తి భార్య సుధామూర్తి ఇటీవలే రాజ్యసభ MPగా ప్రమాణ స్వీకారం చేశారు. కాగా బ్రిటన్ ప్రధాని రిషి సునక్‌ , అక్షతా మూర్తి సంతానం ఇద్దరుతో పాటు ఏకాగ్ర రోహన్ మూర్తి మూడో మనవడు.

ఇన్ఫోసిస్‌ తన Q4 ఫలితాలను ఇటీవల డిక్లేర్ చేసింది. తుది డివిడెండ్ గా 20 మరియు 8 ప్రత్యేక డివిడెండ్‌తో సహా మొత్తం 28 మేర డివిడెండ్‌ను ప్రకటించింది. దీనికి రికార్డు తేదీని మే 31గా నిర్ణయించగా.. జూలై 1న పేమెంట్ ఉండనుంది. అయితే ఇన్ఫోసిస్‌లో రోహన్‌ 1.6తో పాటు అక్షత 1.05, సుధా మూర్తి 1.64 శాతం షేర్లను హోల్డ్ చేస్తున్నారు.