బెంగళూరు మెట్రో ఫేజ్-3 కి లైన్ క్లియర్! ఆకాశంలో డబుల్ డెక్కర్ వండర్.. రూట్ మ్యాప్ ఇదే!

ట్రాఫిక్ సమస్యలతో సతమతమవుతున్న బెంగళూరు (Bengaluru) నగర వాసులకు ఒక అద్భుతమైన శుభవార్త అందింది. ఎన్నాళ్లుగానో కేంద్ర ప్రభుత్వ అనుమతుల కోసం ఎదురుచూస్తున్న 'నమ్మ మెట్రో' (Namma Metro) ఫేజ్-3 ప్రాజెక్ట్‌కు ఎట్టకేలకు లైన్ క్లియర్ కాబోతోంది. ఈ ప్రాజెక్ట్‌లో ప్రతిపాదించిన 'డబుల్ డెక్కర్' (మెట్రో రైల్ , ఫ్లైఓవర్ కలిపి ఉండే వయాడక్ట్) నిర్మాణంపై కేంద్ర గృహనిర్మాణ, పట్టణ వ్యవహారాల మంత్రిత్వ శాఖ (MoHUA) లేవనెత్తిన సాంకేతిక అభ్యంతరాలు ఇప్పుడు తొలిగిపోయాయి.

కేంద్ర ప్రభుత్వ రంగ సంస్థ 'రైట్స్' (RITES Ltd) సమర్పించిన తాజా నివేదిక ప్రకారం, ఈ డబుల్ డెక్కర్ ప్రాజెక్ట్ వల్ల సామాజికంగా , ఆర్థికంగా నగరానికి భారీ ప్రయోజనాలు కలగనున్నాయి. దీని ఎకనామిక్ ఇంటర్నల్ రేట్ ఆఫ్ రిటర్న్ (EIRR) 15.9 శాతంగా నమోదైంది. సాధారణంగా మెట్రో ప్రాజెక్టులకు 14 శాతం ఉంటేనే లాభదాయకంగా భావిస్తారు, కానీ ఈ ప్రాజెక్ట్ అంతకంటే ఎక్కువ రేటింగ్‌ను సాధించి గ్రీన్ సిగ్నల్ అందుకోబోతోంది.

ఏ రూట్లలో రాబోతోంది? కొత్త ప్లాన్ ఏంటి?

మొదట 2024 సెప్టెంబర్‌లో కేంద్రం ఈ ఫేజ్-3 కి అనుమతి ఇచ్చినప్పుడు అందులో డబుల్ డెక్కర్ ప్లాన్ లేదు. కానీ, భవిష్యత్తులో రోడ్లను వెడల్పు చేసే ఖర్చును తగ్గించుకోవడానికి కర్ణాటక ప్రభుత్వం రూ.9,700 కోట్ల అదనపు వ్యయంతో ఈ డబుల్ డెక్కర్ ఫ్లైఓవర్‌ను చేర్చాలని నిర్ణయించింది.
మొత్తం 44.65 కిలోమీటర్ల పొడవు ఉండే ఈ ఫేజ్-3 ప్రాజెక్ట్‌లో రెండు ముఖ్యమైన కారిడార్లు ఉన్నాయి..

1. ఔటర్ రింగ్ రోడ్ లైన్: జేపీ నగర్ 4త్ ఫేజ్ (JP Nagar 4th Phase) నుండి కెంపాపుర వరకు 32.5 కిలోమీటర్ల పొడవైన కారిడార్.
2. మాగడి రోడ్ లైన్: హోసహళ్లి నుండి కడబగెరె వరకు 12.15 కిలోమీటర్ల పొడవైన కారిడార్.

మైసూర్ రోడ్డులో 32 మీటర్ల ఎత్తైన స్టేషన్!

ఈ కొత్త ప్రాజెక్ట్‌లో మరో ఆశ్చర్యకరమైన విషయం ఏంటంటే, మైసూర్ రోడ్ జంక్షన్ వద్ద నిర్మించబోయే మెట్రో స్టేషన్ అత్యంత ఎత్తులో ఉండబోతోంది. ప్రస్తుతం ఉన్న పర్పుల్ లైన్ మెట్రో స్టేషన్ పైనుంచి ఈ కొత్త లైన్ వెళ్తుంది. దీని రైలు మార్గం భూమికి దాదాపు 32 మీటర్ల ఎత్తులో ఉంటుంది. ఇది నగరంలోనే అత్యంత ఎత్తైన జయదేవ హాస్పిటల్ మెట్రో స్టేషన్ రికార్డును కూడా బద్దలు కొట్టనుంది. రోడ్డు సహజ వాలు (Gradient) , పక్కనే ఉన్న రైల్వే లైన్‌కు ఇబ్బంది కలగకుండా ఉండటానికే ఈ భారీ ఎత్తును డిజైన్ చేసినట్లు అధికారులు చెబుతున్నారు.

ఇటీవల కర్ణాటక ముఖ్యమంత్రి డి.కె. శివకుమార్ ఢిల్లీలో కేంద్ర మంత్రి మనోహర్ లాల్ ఖట్టర్‌ను కలిసి, బెంగళూరు (Bengaluru) ట్రాఫిక్ పరిస్థితుల దృష్ట్యా ఈ డబుల్ డెక్కర్ ప్లాన్‌ను త్వరగా ఆమోదించాలని కోరారు. దీనితో పాటు రూ.25,999 కోట్లతో ప్రతిపాదించిన సర్జాపూర్-హెబ్బాల్ (ఫేజ్-3A) ప్రాజెక్టుకు కూడా ముందస్తు అనుమతులు ఇవ్వాలని విజ్ఞప్తి చేశారు.

ఈ భారీ డబుల్ డెక్కర్ ఫ్లైఓవర్ , మెట్రో ప్రాజెక్ట్ గనుక పూర్తయితే, బెంగళూరు లోని ఔటర్ రింగ్ రోడ్ , మాగడి రోడ్ పరిసర ప్రాంతాల్లో ట్రాఫిక్ కష్టాలు దాదాపు తొలగిపోతాయి. నిర్మాణం సమయంలో కొన్ని సవాళ్లు ఎదురైనప్పటికీ, రాబోయే రోజుల్లో ఇది సిటీ ప్రయాణ రూపురేఖలను పూర్తిగా మార్చేయడం ఖాయం.