బెంగళూరు ప్రయాణికులకు గుడ్ న్యూస్.. మెట్రో, BMTC బస్సులకు ఒకే కార్డు..

ఐటీ రాజధాని బెంగళూరులో మరింత సమగ్రమైన, సౌకర్యవంతమైన ప్రజా రవాణా వ్యవస్థను ప్రయాణికులకు అందించే దిశగా బెంగళూరు మెట్రోపాలిటన్ ట్రాన్స్‌పోర్ట్ కార్పొరేషన్ (BMTC) భారీ డిజిటల్ కార్యక్రమాలకు శ్రీకారం చుట్టింది. ఇందులో భాగంగా బెంగళూరు మెట్రో ప్రయాణాల కోసం జారీ చేసిన ఆర్‌బిఎల్ (RBL) బ్యాంక్ 'నేషనల్ కామన్ మొబిలిటీ కార్డ్' (NCMC) ద్వారా ఇకపై బిఎమ్‌టిసి బస్సులలో కూడా ప్రయాణ ఛార్జీలు చెల్లించవచ్చని అధికారులు వెల్లడించారు.

జాతీయ ఇంటర్‌ఆపరేబుల్ కార్డ్ ప్రమాణాలకు అనుగుణంగా రూపొందిన ఈ NCMC కార్డు ద్వారా ప్రయాణికులు వేర్వేరు టిక్కెట్లు కొనే అవసరం లేకుండా ఒకే కార్డుతో మెట్రో, బస్సులలో ప్రయాణించవచ్చు. వాస్తవానికి ఈ సేవలను 2026 జూన్‌లోనే ప్రారంభించాలని షెడ్యూల్ చేసినప్పటికీ, వివిధ కారణాల వల్ల కొంత ఆలస్యమై ఈ ఏడాది అమల్లోకి వచ్చింది.

దీనికితోడు బస్సు, మెట్రో ప్రయాణ సేవలను ఒకే గొడుగు కిందకు తీసుకువస్తూ 'నమ్మ BMTC మొబైల్ యాప్ 2.0' అనే ఏకీకృత డిజిటల్ ప్లాట్‌ఫామ్‌ను గురువారం విధానసౌధలో కర్ణాటక ముఖ్యమంత్రి డీకే శివకుమార్ ఘనంగా ఆవిష్కరించారు. ఈ కార్యక్రమంలో ఉప ముఖ్యమంత్రి జి. పరమేశ్వర, రవాణా శాఖ మంత్రి బీఎస్ సురేష్ తదితర ముఖ్య నేతలు హాజరయ్యారు.

ఈ కొత్త యాప్ ద్వారా ప్రయాణికులు డిజిటల్ బస్ టిక్కెట్లు, మెట్రో క్యూఆర్ టిక్కెట్లతో పాటు విస్తారా, వజ్ర గోల్డ్, జనరల్ విస్తారా, వాయు వజ్ర, నైస్ రోడ్ వంటి వివిధ రకాల బస్ పాస్‌లను నేరుగా కొనుగోలు చేయవచ్చు. UPI, మొబైల్ వాలెట్‌ల ద్వారా సులభంగా డిజిటల్ చెల్లింపులు జరిపి, పాత లావాదేవీలు, డిజిటల్ రసీదులను ఒకే చోట పొందే వెసులుబాటును ఈ వేదిక కల్పిస్తోంది.

ఈ యాప్‌లో పొందుపరిచిన 'జర్నీ ప్లానర్', 'లైవ్ బస్ ట్రాకింగ్' ఫీచర్లు ప్రయాణికులకు ఎంతగానో ఉపయోగపడనున్నాయి. వినియోగదారులు తమ ప్రారంభ స్థానం, గమ్యస్థానాలను నమోదు చేస్తే, బస్సులు, మెట్రో లేదా రెండింటి కలయికతో కూడిన ప్రయాణ మార్గాలను యాప్ చూపిస్తుంది. అంతేకాకుండా సమీపంలోని బస్ స్టాప్‌లు, బస్సుల లైవ్ లొకేషన్ సమాచారం, అవి వచ్చే అంచనా సమయం, రూట్ వివరాలను కూడా క్షణాల్లో తెలుసుకోవచ్చు. కన్నడ, ఆంగ్ల భాషలలో అందుబాటులో ఉన్న ఈ యాప్ ద్వారా నగర ప్రజా రవాణా వ్యవస్థను మరింత డిజిటల్, నగదు రహిత, ప్రయాణీకులకు అనుకూలంగా మార్చడమే లక్ష్యమని బిఎమ్‌టిసి పేర్కొంది. గూగుల్ ప్లే స్టోర్‌లో 'నమ్మ BMTC 2.0' పేరుతో లభిస్తున్న ఈ యాప్ నగరవాసుల ప్రయాణ కష్టాలను గణనీయంగా తగ్గించనుంది.