Contra mutual fund: రిస్క్ ఎక్కువైనా.. రిటర్న్స్ అదిరిపోవాలి అంటే ఈ ఫండ్స్ వైపు చూడాల్సిందే!

స్టాక్ మార్కెట్ దూసుకుపోతున్నప్పుడు అందరూ లాభాల్లో ఉన్న షేర్ల వెంట పడతారు. కానీ మ్యూచువల్ ఫండ్స్ ప్రపంచంలో 'కాంట్రా ఫండ్స్' (Contra Funds) అనే ఒక విభిన్నమైన రకం ఉంది. మార్కెట్ ట్రెండ్‌కు పూర్తిగా వ్యతిరేకంగా ప్రయాణించడమే వీటి ప్రత్యేకత. అంటే, ప్రస్తుతం మార్కెట్లో ఎవరూ పట్టించుకోని, తక్కువ ధరలో ఉన్న లేదా తాత్కాలికంగా నష్టాల్లో ఉన్న కంపెనీల్లో ఇవి పెట్టుబడి పెడతాయి. దీన్నే 'కాంట్రేరియన్ ఇన్వెస్టింగ్' అని పిలుస్తారు.

అసలు ఈ స్ట్రాటజీ ఎలా పనిచేస్తుంది?

చాలా మంది ఇన్వెస్టర్లు ఏదైనా రంగం బాగుందని తెలిస్తే అక్కడికే ఎగబడతారు. దీనివల్ల ఆ షేర్ల ధరలు విపరీతంగా పెరిగిపోతాయి. కానీ కాంట్రా ఫండ్ మేనేజర్లు దీనికి రివర్స్‌లో ఆలోచిస్తారు. ప్రస్తుతం మార్కెట్లో ఆదరణ లేని, కానీ మంచి పునాదులు (Fundamentals) ఉన్న కంపెనీలను గుర్తిస్తారు. ఉదాహరణకు.. మెటల్, రియల్ ఎస్టేట్ లేదా ఆటోమొబైల్ రంగాలు ఎప్పుడూ ఒకేలా ఉండవు. ఒక కాలంలో పడిపోయిన రంగం, మరో కాలంలో రికార్డులు సృష్టిస్తుంది. ఇలాంటి అవకాశాలను ముందే పసిగట్టి తక్కువ ధరలో షేర్లను కొనడమే ఈ మ్యూచువల్ ఫండ్ (Mutual fund) స్ట్రాటజీ ముఖ్య ఉద్దేశం.

2020 కరోనా క్రాష్: ఒక లైవ్ ఎగ్జాంపుల్

కాంట్రా ఇన్వెస్టింగ్‌కు 2020 నాటి మార్కెట్ పతనం ఒక గొప్ప ఉదాహరణ. అప్పట్లో నిఫ్టీ 50 ఏకంగా 38 శాతం పడిపోయింది. బ్యాంకింగ్, హోటల్స్, ఆటోమొబైల్ రంగాలు కుప్పకూలాయి. భయంతో అందరూ షేర్లను అమ్మేస్తుంటే, కాంట్రా ఇన్వెస్టర్లు మాత్రం అవే మంచి కంపెనీలను తక్కువ ధరలో కొని పోగు చేసుకున్నారు. ఆ తర్వాత రెండు మూడేళ్లలో ఆర్థిక వ్యవస్థ పుంజుకోగానే, ఆ షేర్లు మల్టీబ్యాగర్లుగా మారి భారీ లాభాలను తెచ్చిపెట్టాయి.

ఇన్వెస్టర్లు గమనించాల్సిన విషయాలు

కాంట్రా ఫండ్స్ అనేవి అందరికీ సెట్ అవ్వవు. దీనికి విపరీతమైన ఓపిక కావాలి. ఎందుకంటే మనం కొన్న షేర్లు పెరగడానికి నెలలు లేదా ఏళ్లు పట్టవచ్చు. మార్కెట్ పెరుగుతున్నప్పుడు ఇవి నెమ్మదిగా కదలవచ్చు, కానీ మార్కెట్ రికవరీ అయ్యేటప్పుడు వీటి వేగం ఎక్కువగా ఉంటుంది.

• కాలపరిమితి: ఈ ఫండ్స్‌లో పెట్టుబడి పెట్టేవారికి కనీసం 5 నుండి 7 ఏళ్ల టైమ్ ఉండాలి.
• రిస్క్: కొన్నిసార్లు ఒక కంపెనీ షేర్ తక్కువ ధరలో ఉందంటే దానికి ఏదైనా పెద్ద సమస్య ఉండవచ్చు. అప్పుడు అది 'వాల్యూ ట్రాప్' (Value Trap) అయ్యే ప్రమాదం ఉంది. అందుకే ఫండ్ మేనేజర్ అనుభవం ఇక్కడ చాలా ముఖ్యం.
• పోర్ట్‌ఫోలియో: మీ మొత్తం పెట్టుబడిలో 10 నుండి 15 శాతం మాత్రమే ఇలాంటి హై-రిస్క్ ఫండ్స్‌కు కేటాయించడం మంచిది.

ప్రస్తుతం మోతీలాల్ ఓస్వాల్ వంటి సంస్థలు కొత్తగా కాంట్రా ఫండ్స్‌ను లాంచ్ చేస్తున్నాయి. ఇది ఇన్వెస్టర్లకు ఒక కొత్త అవకాశమే అని చెప్పాలి. మార్కెట్ అంతా ఒకే వైపు వెళ్తున్నప్పుడు, దారి మార్చి తెలివిగా పెట్టుబడి పెట్టాలనుకునే వారికి ఈ మ్యూచువల్ ఫండ్ (Mutual fund) ఒక మంచి ఎంపిక. అయితే, గుడ్డిగా వెళ్లకుండా కంపెనీల క్యాష్ ఫ్లో, అప్పులు , మేనేజ్‌మెంట్ క్వాలిటీని చూసి నిర్ణయం తీసుకోవాలి. ఓపిక ఉన్న ఇన్వెస్టర్‌కు కాంట్రా ఫండ్స్ దీర్ఘకాలంలో కాసుల వర్షం కురిపించగలవు.