Ratan Tata: రతన్ టాటాకి బెదిరింపు కాల్.. రంగంలోకి దిగిన ముంబై పోలీసులు..

Threat call to Ratan Tata: మెున్న రిలయన్స్ ఇండస్ట్రీస్ అధినేత ముఖేష్ అంబానీని చంపేస్తామంటూ వరుస బెదిరింపులు వచ్చిన సంగతి తెలిసిందే. అయితే తాజాగా ఇదే తరహా బెదిరింపులు టాటా గ్రూప్ ఛైర్మన్ రతన్ టాటాకు వచ్చాయి.

టాటాకు బెదిరింపు కాల్ రావటంపై ముంబై పోలీసులు స్పందిస్తూ వెంటనే అప్రమత్తమయ్యారు. వెంటనే పారిశ్రామికవేత్త రతన్ టాటాకు భద్రతా చర్యలను పెంచారు. సెప్టెంబర్ 4, 2022న జరిగిన కారు ప్రమాదంలో టాటా సన్స్ మాజీ ఛైర్మన్ సైరస్ మిస్త్రీ మరణించినట్లే రతన్ టాటాకి జరుగుతుందంటూ అజ్ఞాత వ్యక్తి నుంచి బెదిరింపు కాల్ వచ్చినట్లు వెల్లడైంది.

దీనిని చాలా సీరియస్ గా తీసుకున్న ముంబై పోలీసులు అగంతకుడిని పట్టుకునేందుకు రంగంలోకి దిగారు. ఈ క్రమంలో సదరు వ్యక్తి స్కిజోఫ్రెనియా అనే వ్యాధితో బాధపడుతున్న పూణేకు చెందిన ఎంబీఏ హోల్డర్‌గా గుర్తించారు. అయితే ఈ కాల్ చేసిన వ్యక్తిని పోలీసులు కర్ణాటకలో ఉన్నట్లు గుర్తించారు. టెక్నికల్, టెలికాం సర్వీస్ ప్రొవైడర్ల సాయంతో పోలీసులు లొకేషన్‌ను గుర్తించారు. కాల్ చేసిన వ్యక్తి పూణే నివాసానికి వెళ్లగా.. సదరు వ్యక్తి గత ఐదు రోజులుగా కనిపించకుండా పోయినట్లు పోలీసులు గుర్తించారు.

దీనిపై అతని భార్య సైతం పోలీసులకు ఫిర్యాదు చేసింది. అయితే ప్రారంభ ముప్పు ఉన్నప్పటికీ, కాల్ చేసిన వ్యక్తి మానసిక ఆరోగ్య పరిస్థితి కారణంగా సానుభూతితో పోలీసులు చట్టపరమైన చర్య తీసుకోకుండా వదిలేశారు. ముంబై పోలీస్ కంట్రోల్ రూమ్‌కు ఫోన్ చేసి రతన్ టాటా గురించి సదరు ఇంజనీర్ వెల్లడించారు.