భారతదేశం దాటి అమెరికాకు… గ్లోబల్ రియల్ ఎస్టేట్‌లోకి దిగుతున్న ముఖేష్ అంబానీ!

భారతదేశానికి చెందిన అతి ధనవంతుడు మరియు చైర్మన్ అయిన ముఖేష్ అంబానీ, ఇప్పుడు తన గ్లోబల్ ప్రాపర్టీ కలెక్షన్‌లోకి మరో విలాసవంతమైన భవనాన్ని జోడించారు. అమెరికాలోని న్యూయార్క్ సిటీలో ఉన్న ట్రైబెకా ప్రాంతంలో అంబానీ తాజాగా ఒక భవనం కొనుగోలు చేశారు.

ది రియల్ డీల్ నివేదిక ప్రకారం, ఆయన 11 హ్యూబర్ట్ స్ట్రీట్‌లో ఉన్న ఈ ప్రాపర్టీ కోసం $17.4 మిలియన్లు (సుమారు రూ. 145 కోట్లు) చెల్లించారు. ఈ ప్రాపర్టీ, ప్రస్తుతానికి ఖాళీగా ఉన్నప్పటికీ, లగ్జరీ మాన్షన్‌గా మారే సామర్థ్యం ఉన్న స్థలం కావడం విశేషం. ఇది అంబానీకి అమెరికాలో మొదటి పెట్టుబడి కాదు. రెండు సంవత్సరాల క్రితం ఆయన మాన్‌హట్టన్‌లోని వెస్ట్ విలేజ్ ప్రాంతంలో ఉన్న తన 2 బెడ్‌రూమ్ ఫ్లాట్‌ను $9 మిలియన్లకు విక్రయించారు. ఆ అపార్ట్‌మెంట్ నుంచి అందమైన దృశ్యాలు కనిపించేవి.

ఈ భవనాన్ని విక్రయించిన వ్యక్తి రాబర్ట్ పెరా, టెక్ కంపెనీ Ubiquiti వ్యవస్థాపకుడు మరియు CEO.
పెరా ఈ భవనాన్ని 2018లో $20 మిలియన్లకు కొనుగోలు చేసి, ప్రసిద్ధ ఆర్కిటెక్ట్ ఎరిక్ కాబ్ ద్వారా 17,000 చదరపు అడుగుల విలాసవంతమైన మాన్షన్‌గా మార్చే ప్రణాళికలు వేసుకున్నారు.
హాఫ్ బాస్కెట్‌ బాల్ కోర్ట్, డబుల్ హెయిట్ లివింగ్ రూం, ఫుల్-ఫ్లోర్ మాస్టర్ సూట్ వంటి ఫీచర్లతో డిజైన్ చేశారు. కానీ ఆ ప్రాజెక్ట్ ఆగిపోయింది.

2021లో రాబర్ట్ పెరా ఈ భవనాన్ని $25 మిలియన్లకు అమ్మకానికి పెట్టారు. అప్పట్లో ఆయన, ప్రసిద్ధ ఆర్కిటెక్ట్ మాయ లిన్ రూపొందించిన పాత లగ్జరీ డిజైన్‌లను కూడా కొనుగోలుదారులకు ఆఫర్ చేశారు. ఆ డిజైన్‌లో 20,000 చదరపు అడుగుల మెగా మాన్షన్, 7 బెడ్‌రూమ్స్, 5,000 చదరపు అడుగుల అవుట్‌డోర్ స్పేస్, హాఫ్-ఒలింపిక్ స్విమ్మింగ్ పూల్, బ్రేక్‌ఫాస్ట్ రూం వంటి అనేక విలాసవంతమైన ఫీచర్లు ఉన్నాయి. కానీ ఇన్ని అద్భుతమైన ప్రణాళికలు ఉన్నప్పటికీ, ఈ భవనం దాదాపు 10 ఏళ్లుగా ఖాళీగానే ఉండిపోయింది. చివరికి ముఖేష్ అంబానీ తన అమెరికా విభాగం అయిన RIL USA ద్వారా ఈ ప్రాపర్టీని కొనుగోలు చేశారు.

ఎందుకు ఈ భవనం ప్రత్యేకం?

ట్రైబెకా ప్రాంతంలో అత్యంత ఖరీదైన, డిమాండ్ ఉన్న రియల్ ఎస్టేట్ ప్రాంతాలలో ఒకటి.
సెలబ్రిటీల ఇళ్ళు, లగ్జరీ లివింగ్, ఆర్ట్ కల్చర్‌తో ఈ ప్రాంతం ప్రసిద్ధి చెందింది. ఈ భవనాన్ని "ట్రైబెకా మధ్యలో కలల ఫ్యామిలీ మాన్షన్ నిర్మించుకునే అరుదైన అవకాశంగా లిస్టింగ్‌లో పేర్కొన్నారు.

ఇప్పటికే ముంబైలోని ప్రపంచంలోనే అత్యంత ఖరీదైన గృహాలలో ఒకటైన యాంటిలియాకి యజమాని అయిన అంబానీ, ఇప్పుడు అమెరికాలో కూడా తన రియల్ ఎస్టేట్ ఫుట్‌ప్రింట్‌ను పెంచుకుంటున్నారు. ఇది చూస్తుంటే, అంబానీ గ్లోబల్ లగ్జరీ ప్రాపర్టీలను దశలవారీగా తన సొంతం చేసుకుంటూ, భారత వ్యాపార దిగ్గజం నుండి గ్లోబల్ ప్రాపర్టీ మాగ్నేట్‌గా మారిపోతున్నట్టు అనిపిస్తోంది.