రిలయన్స్ షేర్ ఎఫెక్ట్: ప్రపంచ కుబేరుల్లో 9వ స్థానంలో ముఖేష్ అంబానీ

రిలయన్స్ ఇండస్ట్రీస్ అధినేత ముఖేష్ అంబానీ ప్రపంచ కుబేరుల్లో 9వ స్థానం దక్కించుకున్నారు. ఫోర్బ్స్ విడుదల చేసిన ది రియల్ టైమ్ బిలియనీర్స్ జాబితాలో టాప్ 10లో చోటు దక్కించుకోవడం గమనార్హం. ఈ జాబితాలో అమెజాన్ వ్యవస్థాపకులు, సీఈవో జెఫ్ బెజోస్ మొదటి స్థానంలో ఉన్నారు.

2019 సంవత్సరానికి గాను పోర్బ్స్ ప్రకటించిన ప్రపంచ కుబేరుల జాబితాలో అంబానీ 13వ స్థానంలో నిలిచారు. గురువారం సాయంత్రం మార్కెట్ క్లోజ్ అయ్యే సమయానికి రిలయన్స్ షేర్లు భారీగా పుంజుకున్నాయి. రిలయన్స్ ఆస్తులు రూ.10 లక్షల కోట్ల కు చేరుకున్నాయి. ఇందులో సగం వాటా ముఖేష్, ఆయన కుటుంబానిదే. దీంతో వారి ఆస్తి భారీగా పెరిగింది.

షేర్లు పుంజుకొని, ఆస్తులు పెరగడంతో ముఖేష్ అంబానీ 60 బిలియన్ డాలర్లతో ప్రపంచంలో తొమ్మిదో స్థానంలో నిలిచారు. జెఫ్ బెజోస్ 113 బిలియన్ డాలర్లతో అగ్రస్థానంలో ఉన్నారు. 1.7.4 బిలియన్ డాలర్లతో గేట్స్ రెండో స్థానంలో, 107.2 బిలియన్ డాలర్లతో బెర్నార్డ్ అర్నాల్డ్ మూడో స్థానంలో నిలిచారు. 86.9 బిలియన్ డాలర్లతో వారెన్ బఫెట్ నాలుగో స్థానంలో, ఫేస్‌బుక్ సీఈవో జుకర్ బర్గ్ 74.9 డాలర్లతో 5వ స్థానంలో నిలిచారు.