హైదరాబాద్ రియల్ ఎస్టేట్ మార్కెట్‌లో సంచలనం... రాయదుర్గం ఎకరం భూమి రూ. 177 కోట్లు రికార్డు బిడ్

హైదరాబాద్ రియల్ ఎస్టేట్ మళ్లీ హాట్ న్యూస్‌గా మారింది! రాయదుర్గంలోని నాలెడ్జ్ సిటీలోని భూమి ఒక్క ఎకరా రూ. 177 కోట్ల రికార్డు ధరకు అమ్ముడవడంతో నగరంలో చర్చలకు దారితీసింది. రియల్ ఎస్టేట్ రంగంలో ఈ డీల్ పెట్టుబడిదారుల నమ్మకాన్ని స్పష్టంగా చూపిస్తోంది.

రాయదుర్గంలోని నాలెడ్జ్ సిటీలో మొత్తం రెండు ప్లాట్లు వేలం వేయబడ్డాయి. అందులో 7.67 ఎకరాల ఒక ప్లాట్ ఎకరాకు రూ. 177 కోట్ల రికార్డు ధరకు అమ్ముడైంది. ఇదే వేలంలో మరో 11 ఎకరాల భూమి కూడా ఎకరాకు రూ. 141.5 కోట్ల భారీ ధరకు అమ్ముడుపోయింది. ఈ రెండు భూముల అమ్మకాల ద్వారా తెలంగాణ స్టేట్ ఇండస్ట్రియల్ ఇన్‌ఫ్రాస్ట్రక్చర్ కార్పొరేషన్‌ (TSIIC) సుమారు రూ. 3,000 కోట్ల ఆదాయం పొందింది. ఈ మొత్తం ఒక్క రోజులోనే వేలం ద్వారా రాష్ట్రానికి వచ్చిన అత్యధిక ఆదాయాలలో ఒకటిగా నిలిచింది. రియల్ ఎస్టేట్ రంగంలో ఈ డీల్ పెట్టుబడిదారుల ఆసక్తిని స్పష్టంగా చూపిస్తోంది.

ఇంతకు ముందు 2023లో కోకాపేట్‌లోని నీఓపోలిస్ లేఅవుట్‌లో ఎకరాకు రూ. 100.75 కోట్లు ధర రికార్డ్‌గా నిలిచింది. 2017లో రాయదుర్గంలో చివరి సారి జరిగిన వేలంలో ఎకరాకు గరిష్టంగా రూ. 42.59 కోట్లు మాత్రమే వచ్చింది. అంటే ఈ సారి వచ్చిన బిడ్లు దాదాపు రెట్టింపు స్థాయిలో ఉన్నాయి.

ఈ భూములను ఎవరు కొన్నారు అనే వివరాలు ఇంకా అధికారికంగా ప్రకటించలేదు. అయినప్పటికీ లోపలి వనరుల ప్రకారం, 7.67 ఎకరాల ప్లాట్‌ను MSN ల్యాబ్స్ సుమారు రూ. 1,357 కోట్లకు కొనుగోలు చేసింది. అదే సమయంలో 11 ఎకరాల మరో ప్లాట్‌ను బెంగళూరులో ప్రధానంగా కార్యకలాపాలు కలిగిన ప్రెస్టీజ్ గ్రూప్ సుమారు రూ. 1,556 కోట్లకు దక్కించుకుంది, వీరు హైదరాబాద్ రియల్ ఎస్టేట్ మార్కెట్‌ పై పెట్టుబడి చూపిస్తున్న పెద్ద సంస్థలు అని చెప్పవచ్చు. ప్రభుత్వం ఈ వేలానికి ముందు ఎకరాకు రూ. 101 కోట్ల "బేస్ ప్రైస్" పెట్టింది. కానీ దాన్ని మించి వచ్చిన బిడ్లు, హైదరాబాదు రియల్ ఎస్టేట్ మళ్లీ వేగంగా పుంజుకుంటోందని చూపిస్తున్నాయి.

బెస్ట్ మ్యూచువల్ ఫండ్స్ మీకోసం.. అధిక వడ్డీ రేటుతో..

TSIIC వైస్ చైర్మన్ కే. శశాంక మాట్లాడుతూ, రూ. 177 కోట్లు ఎకరాకు వచ్చిన ఈ బిడ్ పెట్టుబడిదారులు హైదరాబాద్‌ పై ఉంచిన నమ్మకానికి నిదర్శనం. "తెలంగాణ రైజింగ్ 2047" లక్ష్యాలకు ఇది మంచి స్టార్ట్ అన్నారు. రాయదుర్గంలోని నాలెడ్జ్ సిటీ ఎందుకు ప్రత్యేకం అంటే, ఇది ఇప్పటికే హైదరాబాద్‌లో ప్రధాన ఐటీ హబ్‌గా నిలిచింది. ఈ ప్రాంతంలో ఇప్పటికే Apple, JP Morgan వంటి 100 కంటే ఎక్కువ పెద్ద కంపెనీలు కార్యకలాపాలు నిర్వహిస్తున్నాయి. ఇది ఇక్కడ వ్యాపారం, ఉద్యోగ అవకాశాలు, పెట్టుబడులకు పెద్ద ఆకర్షణని అందిస్తుంది.

నాలెడ్జ్ సిటీకి ముఖ్యమైన ప్రత్యేకతలు కూడా ఉన్నాయి. ఇక్కడ మెట్రో ద్వారా సులభంగా కనెక్ట్ అవ్వడం, ఔటర్ రింగ్ రోడ్ మరియు హైదరాబాద్ ఎయిర్‌పోర్ట్‌కి సమీపం వంటి సౌకర్యాలు ఉన్నాయి. అదే విధంగా, ఈ భూమిని వాడే విధానంలో ఫ్లెక్సిబిలిటీ ఉంది. అంటే ఇక్కడ ఉన్న ప్లాట్లు కమర్షియల్, రెసిడెన్షియల్, హోటల్, ఎంటర్టైన్మెంట్ వంటి విభిన్న ప్రయోజనాల కోసం ఉపయోగించుకోవచ్చు. ఈ కారణాల వల్ల, ఇక్కడ భూములు మరింత విలువైనవి మరియు పెట్టుబడిదారులకు ఆకర్షణీయంగా మారాయి.

వేలంలో విజేతగా నిలిచిన వారు డీల్ పూర్తి చేసుకోవడానికి కొన్ని నిబంధనలు పాటించాల్సి ఉంది. ముందుగా, అవార్డు లెటర్‌ను ఒక వారం లోపల సైన్ చేయడం తప్పనిసరి. అంటే, వారు భూమి కొనుగోలు చేసేందుకు అధికారికంగా అంగీకారం తెలియజేయాలి. ఆ తరువాత, కొనుగోలు మొత్తాన్ని 90 రోజుల లోపల చెల్లించాల్సి ఉంటుంది. రాష్ట్ర ప్రభుత్వం ఈ వేలం ద్వారా పశ్చిమ హైదరాబాద్ రియల్ ఎస్టేట్ మార్కెట్‌కు కొత్త ఊహ, కొత్త ఊపుని ఇస్తుందని భావిస్తోంది. అదేవిధంగా ఈ వేడి మార్కెట్, పెట్టుబడుల ఉత్సాహం ఇతర ప్రాంతాల రియల్ ఎస్టేట్ రంగానికి కూడా ప్రభావం చూపి, నగరంలోని మొత్తం భూమి మార్కెట్‌కు వేగాన్ని అందించే అవకాశముందని అధికారులు ఆశిస్తున్నారు.