భారత వృద్ధి రేటును భారీగా తగ్గించిన మూడీస్, చైనా వృద్ధి రేటు కూడా

కరోనా మహమ్మారి కారణంగా భారత వృద్ధి రేటు ఈ ఏడాది గణనీయంగా తగ్గుతుందని ప్రముఖ రేటింగ్ ఏజెన్సీ మూడిస్ అంచనా వేసింది. 2020 క్యాలెండర్ ఏడాదిలో జీడీపీ వృద్ధి రేటు అంచనాలను భారీగా కుదించింది. వృద్ధి రేటు 2.5 శాతం వరకు ఉండొచ్చని మార్చిలో చేసిన ప్రకటనను సవరించి తాజాగా అంచనాల్ని 0.2 శాతానికి కుదించింది. వచ్చే క్యాలెండర్ ఏడాదిలో మాత్రం వృద్ధి రేటు 6.2 శాతం వరకు ఉంటుందని తెలిపింది.

గ్లోబల్ మాక్రో ఔట్ లుక్ 2020-21 (ఏప్రిల్ 2020 అప్ డేట్) పేరుతో నివేదికను విడుదల చేసింది. 2020 క్యాలెండర్ ఏడాదిలో G-20 దేశాల వృద్ధి తగ్గుతుందని తెలిపింది. ఈ ఏడాదిలో G-20 ఆర్థిక వ్యవస్థల వృద్ధి 5.8 శాతం కుదించుకుపోవచ్చునని తెలిపింది. చైనా వృద్ధి రేటు 2020 ఏడాదికి గాను 1 శాతం ఉంటుందని మూడీస్ తెలిపింది.

ఇండియా తొలుత 21 రోజుల పాటు ప్రకటించిన లాక్ డౌన్‌ను మళ్లీ 40 రోజులకు పొడిగించిందని గుర్తు చేసింది. అయితే వ్యవసాయం సహా కొన్ని మినహాయింపులు ఇచ్చిందని పేర్కొంది. ఇండియా రేటింగ్ అండ్ రీసెర్చ్ కూడా వృద్ధి రేటు 29 ఏళ్ల కనిష్టానికి 1.9 శాతానికి చేరుకుంటుందని తెలిపింది.