Viral News: మిత్షి ఇండియాకు CFO రిజిగ్నేషన్.. వైరల్ అవుతున్న రాజీనామా లేఖ.. అందులో ఏముందంటే..

CFO Resignation: సాంకేతికత పెరుగుతున్న కొద్దీ కొత్త ఉత్పత్తులు అందుబాటులోకి వస్తున్నాయి. ప్రపంచం వేగంగా మారిపోతున్న తరుణంలో పాత కాలపు పద్ధతులకు చెక్ పెట్టేస్తున్నాం. అయితే ఓ లిస్టెడ్ కంపెనీ టాప్ ఎగ్జిక్యూటివ్ చేసిన పని ఇప్పుడు నెట్టింట హాట్ టాపిక్‌ గా మారింది.

పెయింట్ తయారీ సంస్థ మిత్షి ఇండియా.. దేశీయ స్టాక్ మార్కెట్లో లిస్ట్ కాబడిన సంస్థ. దీనికి రింకూ పటేల్ చీఫ్ ఫైనాన్షియల్ ఆఫీసర్‌గా బాధ్యతలు నిర్వహిస్తున్నారు. వ్యక్తిగత కారణాల రీత్యా తన పదవి నుంచి నిష్క్రమించాలని భావించారు. అందుకు రాజీనామా సమర్పించేందుకు సదరు ఆఫీసర్ ఎంచుకున్న మార్గం ఇప్పుడు వైరల్ అవుతోంది.

రెండు పేరాలతో రాసిన రాజీనామాను కంపెనీ CFO తన మేనేజింగ్ డైరెక్టర్‌కు సమర్పించారు. అయితే ఇంటర్నెట్‌ రోజుల్లోనూ, పిల్లలు వినియోగించే బ్రాడ్ రూల్స్ నోట్ పుస్తకంలోని పేపర్‌ మీద సాదాసీదాగా చేతితో మ్యాటర్ రాసి పంపారు. ఇది చూసిన నెటిజన్లు పలురకాల కామెంట్స్‌ తో సోషల్ మీడియాలో మోత మోగిస్తున్నారు.

'వ్యక్తిగత కారణాల వల్ల నేను తక్షణమే CFO ఉద్యోగానికి రాజీనామా చేస్తున్నాను. మీ సంస్థలో పని చేయడం చాలా ఆనందంగా ఉంది. ఇదొక అద్భుతమైన అనుభూతిగా భావిస్తున్నాను' అని రింకూ పటేల్ లేఖలో పేర్కొన్నారు. దీనిని అంగీకరించినట్లు మిత్షీ ఇండియా తన ఎక్స్ఛేజ్ ఫైలింగ్‌ లో పేర్కొంది. త్వరలోనే కొత్త CFOని నియమించనున్నట్లు తెలిపింది.