Sharekhan: 'మీరే' గ్రూప్ చేతికి 'షేర్‌ఖాన్'.. అప్పటిలోగా డీల్ పూర్తయ్యే ఛాన్స్!

Stock broker: జెరోధా, అప్ స్టాక్స్, ఆలిస్ బ్లూ వంటి ఆధునిక స్టాక్ బ్రోకింగ్ సంస్థల పేర్లు ఇప్పుడు ప్రముఖంగా వినిపిస్తున్నాయి. అయితే ఎప్పటినుంచో ఇదే రంగంలో సేవలందిస్తున్న బ్రోకింగ్ దిగ్గజం తన ప్రస్థానాన్ని ముగించనున్నట్లు తెలుస్తోంది. వేరొకరికి తమ సంస్థను విక్రయించేందుకు గ్రౌండ్ క్లియర్ అయింది. ఆ సంస్థ భవిష్యత్తు ఎలా ఉండనుందో మరికొన్ని రోజుల్లో తేలే అవకాశం ఉంది.

దేశీయ స్టాక్ బ్రోకింగ్ రంగంలో ప్రముఖ ప్లేయర్ 'షేర్‌ ఖాన్‌'ను కొనుగోలు చేసేందుకు మీరే గ్రూప్ రెడీ అయింది. ఇందుకోసం BNP పారిబాస్ తోపాటు బోర్డు అనుమతులను సైతం పొందింది. త్వరలోనే షేర్ల కొనుగోలు ఒప్పందంపై సంతకాలు జరగనున్నట్లు ఆయా బోర్డులు ఓ ప్రకటనలో తెలిపాయి. ఈ డీల్ ద్వారా మీరే గ్రూప్ షేర్ ఖాన్ లోని పూర్తి వాటాను దక్కించుకోనుంది.

ఈ భారీ లావాదేవీలో షేర్ ఖాన్ BNP పారిబాస్ ఫైనాన్షియల్ సర్వీసెస్ లిమిటెడ్, ఎస్ప్రెస్సో ఫైనాన్షియల్ సర్వీసెస్ ప్రైవేట్ లిమిటెడ్ మరియు ఎడ్యుకేషనల్ బిజినెస్ షేర్ ఖాన్ డాట్ కామ్ ఇండియా ప్రైవేట్ లిమిటెడ్ వంటి అనుబంధ సంస్థలు ఉన్నాయి. భవిష్యత్తును దృష్టిలో ఉంచుకొని మీరే గ్రూప్ ఈ డీల్ పక్కా చేసుకున్నట్లు మార్కెట్ వర్గాలు భావిస్తున్నాయి.

నియంత్రణ సంస్థ సెక్యూరిటీస్ ఎక్స్చేంజ్ బోర్డ్ ఆఫ్ ఇండియా ఆమోదంతో ఈ డీల్ పూర్తికానుంది. వచ్చే ఏడాది చివర్లో లేదా 2025 ప్రారంభంలో ఈ లావాదేవీ ముగింపుకు రావచ్చని అంచనా వేస్తున్నారు. ఏళ్ల తరబడి స్టాక్ బ్రోకింగ్ సేవలందించిన భారీ సంస్థ ఇలా అమ్మకానికి రావడం పట్ల ఇన్వెస్టర్లు విచారం వ్యక్తం చేస్తున్నారు.