Success story: మైక్రోసాఫ్ట్ ఉద్యోగం వదిలేసి.. రూ. 600 కోట్ల సామ్రాజ్యం! పట్టుదల ఉంటే ఇంత సాధించొచ్చా?

ఐటీ రంగం ఉవ్వెత్తున ఎగుస్తున్న 2007వ సంవత్సరంలో, మైక్రోసాఫ్ట్ (Microsoft) వంటి ప్రతిష్టాత్మక సంస్థలో స్థిరమైన ఉద్యోగాన్ని వదిలేయడం అంటే సామాన్యమైన విషయం కాదు. కానీ సునీల్ జున్జున్వాలా ఆ సాహసం చేశారు. తన కుటుంబ పొదుపు మొత్తం రూ. 20 లక్షలతో తిరుపూర్‌లోని టెక్స్టైల్ రంగంలోకి అడుగుపెట్టి 'టెక్నోస్పోర్ట్' (Technosport) బ్రాండ్‌ను ప్రారంభించారు. నేడు అది రూ. 600 కోట్ల వ్యాపారంగా ఎదిగి, ఈ ఆర్థిక ఏడాదిలో రూ. 1,000 కోట్ల రెవెన్యూ దిశగా దూసుకుపోతోంది. ఈ అద్భుతమైన సక్సెస్ స్టోరీ (Success Story) వెనుక ఉన్న కృషి ఏంటో చూద్దాం.

వ్యాపార ఆలోచన ఎలా పుట్టింది?

టెక్నోస్పోర్ట్ ప్రారంభంలో కేవలం ఒక ట్రేడింగ్ కంపెనీగా ఉండేది. లూథియానా, సిల్వస్సా వంటి ప్రాంతాల నుండి సింథటిక్ ఫ్యాబ్రిక్స్‌ను సేకరించి, తిరుపూర్‌లో దుస్తులను కుట్టించి తన లేబుల్ కింద విక్రయించేది. ఆ సమయంలో నైక్, అడిడాస్, రీబాక్ వంటి అంతర్జాతీయ బ్రాండ్లు భారత్‌లో ప్రాచుర్యం పొందుతున్నప్పటికీ, సామాన్యులకు అవి అందుబాటులో లేవు (చాలా ఖరీదైనవి). అదే క్వాలిటీని, సౌకర్యాన్ని తక్కువ ధరకే సామాన్యులకు అందించాలనే లక్ష్యంతో 'డెమోక్రటైజింగ్ పెర్ఫార్మెన్స్ వేర్' అనే కాన్సెప్ట్‌ను సునీల్ తెరపైకి తెచ్చారు.

టర్నింగ్ పాయింట్: చైనా, తైవాన్ పర్యటనలు

ప్రారంభంలో గ్లోబల్ బ్రాండ్ల తరహాలో లుక్ ఉన్నప్పటికీ, పనితీరులో (Performance) టెక్నోస్పోర్ట్ వెనుకబడి ఉండేది. 2010లో సునీల్ చైనా, తైవాన్‌లలో జరిగిన టెక్స్టైల్ ఎక్స్‌పోలను సందర్శించారు. అక్కడ హై-పెర్ఫార్మెన్స్ ఫ్యాబ్రిక్స్ వెనుక ఉన్న సైన్స్, ముఖ్యంగా 'మాయిశ్చర్ మేనేజ్‌మెంట్' (చెమటను పీల్చుకోవడం) , మన్నిక గురించి తెలుసుకున్నారు. తిరిగి వచ్చాక కేవలం బట్టలు కొనడం కాకుండా, సొంతంగా ఫ్యాబ్రిక్ ఇంజనీరింగ్ చేయడంపై దృష్టి పెట్టారు. కేవలం క్రీడాకారులకే కాకుండా ఆఫీస్ గోయర్స్, డెలివరీ బాయ్స్ , రైతుల కోసం 'యాక్టివ్‌వేర్' విభాగంలోకి బ్రాండ్‌ను విస్తరించారు.

రోజుకి లక్ష దుస్తులు..

ప్రస్తుతం టెక్నోస్పోర్ట్ తిరుపూర్ పరిసరాల్లో రోజుకు 30 టన్నుల ఫ్యాబ్రిక్ ఉత్పత్తి చేసే సామర్థ్యం కలిగిన అత్యాధునిక ప్లాంట్‌ను నిర్వహిస్తోంది. దీని ద్వారా ప్రతిరోజూ 1.2 లక్షల దుస్తులు తయారవుతున్నాయి. వ్యాపారంతో పాటు పర్యావరణంపై కూడా సునీల్ ప్రత్యేక శ్రద్ధ చూపుతున్నారు.

వారి ప్లాంట్ పునరుత్పాదక శక్తి (Renewable Energy) తో నడుస్తుంది. 'జీరో లిక్విడ్ డిశ్చార్జ్' నిబంధనలను పాటిస్తూ నీటి కాలుష్యాన్ని నివారిస్తున్నారు. కార్బన్ ఫుట్‌ప్రింట్‌ను తగ్గించడంపై నిరంతరం కృషి చేస్తున్నారు.

ఒక ఐటీ ఇంజనీర్ తన కంఫర్ట్ జోన్ నుండి బయటకు వచ్చి, కొత్త రంగంలోకి అడుగుపెట్టి అంతర్జాతీయ సంస్థలకు దీటుగా స్వదేశీ బ్రాండ్‌ను నిర్మించడం నిజంగా గర్వకారణం. ఎంతో మంది ఔత్సాహిక పారిశ్రామికవేత్తలకు సునీల్ జున్జున్వాలా ప్రయాణం ఒక గొప్ప ప్రేరణ. తన విజయం ద్వారా ఆయన నిరూపించింది ఒక్కటే-నిరంతర అభ్యాసం , నాణ్యతపై రాజీ పడకుండా చేసే కృషి ఏ రంగంలోనైనా తిరుగులేని విజయాన్ని అందిస్తుంది. ఈ సక్సెస్ స్టోరీ (Success Story) నేటి యువతకు ఒక చక్కని పాఠం.