ఉద్యోగార్థులకు మెర్సిడెజ్ బెంజ్ శుభవార్త.. ఏకంగా వెయ్యి మంది ఇంజనీర్లకు కొలువులు

Mercedes Benz: లేఆఫ్స్‌తో సతమతం అవుతున్న ఉద్యోగార్థులకు ఇప్పుడిప్పుడే పలు కంపెనీలు ఆఫర్లు రిలీజ్ చేస్తున్నట్లు వింటున్నాం. ఈ కేటగిరీలోకి తాజాగా మెర్సిడెజ్ బెంజ్ సైతం చేరింది. తమ వ్యాపారాన్ని వేగవంతం చేసే ప్రణాళికల్లో భాగంగా భారీగా ఇంజనీర్లను నియమించుకోవడానికి సిద్ధమవుతోంది. కంపెనీ ఉన్నతాధికారి ఒకరు ఈ మేరకు స్పష్టం చేశారు.

వచ్చే ఏడాదిలో దాదాపు వెయ్యికి పైగా ఇంజనీర్లను రిక్రూట్ చేసుకోనున్నట్లు మెర్సిడెస్-బెంజ్ రీసెర్చ్ అండ్ డెవలప్‌మెంట్ ఇండియా (MBRDI) ఉన్నతాధికారి తెలిపారు. దేశంలో డిజిటల్ నైపుణ్యాలతో కూడిన వారిని తమ టీమ్‌లో జాయిన్ చేసుకోనున్నట్లు స్పష్టం చేశారు. ఈ ప్రాంతంలో వ్యాపారాన్ని వేగవంతం చేసేందుకు అనుగుణంగా ఇంజనీర్ల సామర్థ్యాన్ని విస్తరిస్తున్నట్లు MBRDI మానవ వనరుల వైస్ ప్రెసిడెంట్ మహేష్ మేధేకర్ పేర్కొన్నారు. కాగా ప్రస్తుతం దేశంలోని R&D కేంద్రంలో సుమారు 7 వేల మంది పనిచేస్తున్నారు.

మెర్సిడెస్-బెంజ్ ఇండియాకు 2022 ఉత్తమ సంవత్సరంగా నిలిచింది. 15 వేల 822 యూనిట్లతో అత్యధిక అమ్మకాలను సాధించింది. "భారతీయ మార్కెట్లో మెర్సిడెస్-బెంజ్ అత్యంత వేగంగా అభివృద్ధి చెందుతోంది. 41 శాతం కంటే ఎక్కువ YoY వృద్ధి సాధించింది. ఇదే జోరును Q1 2023లోనూ కొనసాగించాము. మా అత్యుత్తమ Q1 అమ్మకాలు 4 వేల 697 యూనిట్లను సాధించాము" అని కంపెనీ ఇండియా విభాగం MD & CEO సంతోష్ అయ్యర్ వెల్లడించారు.

భారతీయుల కోసం దూకుడుగా ముందుకెళ్లే EV రోడ్‌మ్యాప్‌ను సైతం మెర్సిడెజ్ బెంజ్ కలిగి ఉంది. 2027 నాటికి విక్రయించబడే ప్రతి నాలుగు కార్లలో ఒకటి EVగా ఉంటుందని అంచనా. "భారత మార్కెట్ కోసం వచ్చే రెండేళ్లలో మా గ్లోబల్ పోర్ట్‌ఫోలియో నుంచి కొత్త EVలను విడుదల చేస్తాము" అని అయ్యర్ ప్రకటించారు. 2030 నాటికి పూర్తిగా ఎలక్ట్రిక్‌గా మారాలని కంపెనీ లక్ష్యంగా పెట్టుకున్నట్లు MBRDI MD & CEO మను సాలే తెలిపారు.