మే నెలలో రికార్డ్ స్థాయిలో పెరిగి ఎఫ్‌పీఐ విక్రయాలు

స్టాక్ మార్కెట్ నుండి విదేశీ పోర్ట్‌పోలియో ఇన్వెస్టర్లు (FPI) పెట్టుబడుల ఉపసంహరణ మే నెలలో కొనసాగింది. నికరంగా రూ.45,276 కోట్ల నిధులను ఎఫ్‌పీఐలు వెనక్కి తీసుకున్నారు. మార్చి 2020 తర్వాత ఒక నెలలో ఈ స్థాయిలో అమ్మకాలు వెల్లువెత్తడం ఇది తొలిసారి. మొత్తంగా చూస్తే ఇధి రెండో అతిపెద్ద ఔట్-ఫ్లో. కరోనా కట్టడి నిమిత్తం దేశవ్యాప్తంగా లాక్ డౌన్ విధించడంతో పాటు మార్చి 2020లో ఎఫ్‌పీఐలు నికరంగా రూ.62,000 కోట్ల నిధులను ఉపసంహరించుకున్నారు. ఇప్పటి వరకు ఇదే ఒక నెల గరిష్ట అమ్మకాలుగా కొనసాగుతోంది.

మళ్లీ గత నెలలో అమ్మకాలు రికార్డ్ స్థాయిలో వెల్లువెత్తాయి. వరుసగా ఎనిమిది నెలలుగా విదేశీ ఇన్వెస్టర్ల నికర అమ్మకందారులుగా నిలిచారు. దీంతో దేశీయ ప్రధాన సూచీలు సెన్సెక్స్, నిఫ్టీలు మూడు శాతానికి పైగా పడిపోయాయి. మే 2012 తర్వాత ఇది దారుణ ప్రదర్శన.

యూఎస్ ఫెడ్ రిజర్వ్ వడ్డీ రేట్ల పెంపు, ద్రవ్యోల్భణం పెరుగుదల ఫలితంగా ఆర్థిక మందగమన భయాలు విదేశీ ఇన్వెస్టర్ల అమ్మకాలకు కారణమయ్యాయి. రష్యా-ఉక్రెయిన్ యుద్ధం, చైనాలో లాక్ డౌన్ కారణంగా సరఫరా వ్యవస్థలో తలెత్తిన సమస్యలు సెంటిమెంటును దెబ్బతీశాయి. ఆర్థిక సేవలు, ఐటీ కంపెనీలపై విదేశీ ఇన్వెస్టర్ల అమ్మకాల ప్రభావం ఎక్కువగా ఉంది. మే 15వ తేదీ నాటికి ఈ రెండు రంగాల్లో ఎఫ్‌పీఐలు రూ.18500 కోట్ల అమ్మకాలు జరిపారు.