Matrimony Apps: మ్యాట్రిమోనీ, షాదీ, నౌకరీ యాప్‌ల‌పై గూగుల్ కీల‌క నిర్ణయం...

భార‌త్‌కు చెందిన ప‌లు యాప్‌ల‌పై గూగుల్ కీల‌క నిర్ణ‌యం తీసుకుంది. సర్వీస్ ఫీజు చెల్లింపులపై తలెత్తిన వివాదం క్ర‌మంలో ప్రపంచ టెక్ దిగ్గజం గూగుల్ సంచలన నిర్ణయాలు తీసుకుంది. భారత్‌లోని తన ప్లే స్టోర్ నుంచి పలు యాప్స్ తొలగిస్తోంది. అందులో 'భారత్ మ్యాట్రిమోనీ' వంటి పాపులర్ యాప్ సహా మొత్తం ప‌ది కంపెనీల యాప్‌లను గూగుల్ తొలగించనుంది.

సర్వీస్ ఫీజు చెల్లింపు వివాదం నేప‌థ్యంలో సెర్చింజ‌న్ దిగ్గ‌జం గూగుల్ కీల‌క‌ నిర్ణయం తీసుకుంది. ఈ యాప్స్ జాబితాలో షాదీ, మ్యాట్రిమోనీ, భారత్ మ్యాట్రిమోనీ సహా జాబ్ యాప్ నౌకరీ, బాలాజీ టెలీఫిల్మ్స్‌కు చెందిన ఆల్ట్, ఆడియో ప్లాట్‌ఫాం అయిన కుకు FM, డేటింగ్ యాప్ క్వాక్‌క్వాక్, ట్రూలీ మ్యాడ్లీ వంటివి ఈ తొలగింపుల జాబితాలో ఉన్న‌ట్లు తెలుస్తోంది.

ఇక‌, 11 - 26 శాతం ఫీజులు చెల్లించలేమంటూ మ్యాట్రీమోనీ యాప్‌ల నిర్వహకులు ఇంత‌కుముందే అభ్యంతరం వ్యక్తం చేసిన సంగ‌తి తెలిసిందే. ఇదే వివాదానికి కార‌ణ‌మ‌య్యింది. విజ్ఞప్తులను పరిగణనలోకి తీసుకున్న కేంద్ర ప్రభుత్వ అధికారులు.. 15-30 శాతం ఫీజులు విధించే పాత విధానాన్ని రద్దు చేయాలంటూ కొద్దికాలం క్రితమే ఆదేశాలు జారీ చేయ‌డం జ‌రిగింది. దీంతో గూగుల్ యాప్‌ల‌ను తొల‌గించే ప‌నిలో ప‌డింది.

మ్యాట్రిమోనీ వంటి స్టార్టప్‌లకు ఉపశమనం అవసరం లేదంటూ జనవరి, ఫిబ్రవరిలో కోర్టులు పేర్కొన‌డం జ‌రిగింది. ఈ మేరకు దాఖలైన పిటిషన్లపై విచారణ అనంతరం కోర్టు ఆదేశాలు జారీ చేశాయి. దీంతో ఫీజు వసూలు చేయ‌డం లేదా యాప్‌లను తొలగించే ప‌ని చేయ‌వ‌చ్చ‌ని పేర్కొన్నాయి. దీంతో గూగుల్ భార‌త్‌లోని ప‌లు మ్యాట్రిమోనీ యాప్స్‌ను తొలగించేందుకు సిద్ధ‌మ‌య్యింది. అందులో భారత్ మ్యాట్రిమోనీ, క్రీస్టియన్ మ్యాట్రిమోనీ, ముస్లిం మ్యాట్రీమోనీ, జోడీ యాప్‌లను గూగుల్ శుక్రవారం తొలగించేసింది.

స్పందించిన ప్ర‌ముఖులు..

క్వాక్‌క్వాక్ ఫౌండర్ రవి మిట్టల్ మాత్రం గూగుల్ తీసుకున్న చ‌ర్య‌పై స్పందించారు. వెంట‌నే నిబంధనల్ని పాటించి తిరిగి ప్లే స్టోర్‌లోకి వస్తామని ఆయ‌న తెలిపారు. ఇక‌, కుకు ఎఫ్ఎం కోఫౌండర్ వినోద్ కుమార్ మీనా మాత్రం గూగుల్‌పై విరుచుకుప‌డ్డారు. ఇన్ఫో ఎడ్జ్ వ్యవస్థాపకుడు సంజీవ్ మాత్రం భారత కంపెనీలకు యూపీఐ, ONDC తరహాలోనే యాప్ స్టోర్ అనేది ఉండాలని చెప్పారు.