కొనుగోలుదారులకు మారుతీ సుజుకీ షాక్, రూ.22,500కు ధరల పెంపు

మారుతీ సుజుకీ షాకిచ్చింది. స్విఫ్ట్, సెలెరియో మినహా మిగిలిన కార్ల ధరలను రూ.22,500 వరకు పెంచింది. పెరిగిన ముడి సరుకు వ్యయ భారాన్ని కొంత తగ్గించుకునేందుకు ఈ నిర్ణయం తీసుకున్నట్లు తెలిపింది. వివిధ మోడల్స్ ఢిల్లీ ఎక్స్ షోరూం ధరలో 1.6 శాతం వరకు పెంపు ఉంటుందని తెలిపింది. శుక్రవారం నుండి ధరల పెంపు అమల్లోకి వచ్చిందని స్పష్టం చేసింది. ఈ మేరకు రెగ్యులేటరీ ఫైలింగ్‌లో తెలిపింది.

ఈ ఏడాదిలో మారుతి సుజుకి కార్ల ధ‌ర‌లను పెంచడం రెండోసారి. అంటే జనవరి నెల నుండి ఇప్పుడు పెంచడం రెండోసారి. ఎంపిక చేసిన మోడ‌ల్ కార్ల‌పై స‌గ‌టున రూ.34 వేల చొప్పున పెరిగాయి. స్టీల్ వంటి ముడి సరుకు, గ్లోబ‌ల్ క‌మోడిటీ ధ‌ర‌లు నిల‌క‌డ‌గా పెరుగుతున్న నేపథ్యంలో కార్ల తయారీ కాస్త భారంగా మారింది. అలాగే గ్లోబ‌ల్ మార్కెట్లో సెమీ కండక్టర్స్ కొర‌త అధిక వ్య‌యానికి కారణంగా మారింది.

జనవరి నెలలో మారుతీ సుజుకీ తన ఆల్టో, ఎస్ ప్రెస్సో పైన రూ.34,000 వరకు పెంచాయి. మారుతీ సుజుకీ దేశంలో 14 మోడల్స్‌ను విక్రయిస్తోంది. మారుతీ సుజుకీతో పాటు ఇతర వాహన కంపెనీలు కూడా ధరలను పెంచాయి.