భారీ లాభాల్లో ప్రారంభమైన స్టాక్ మార్కెట్లు, బలపడిన రూపాయి

ముంబై: భారత స్టాక్ మార్కెట్లు మంగళవారం (మార్చి 31) లాభాల్లో ప్రారంభమయ్యాయి. నిన్న భారీ నష్టాల్లో ముగిసిన విషయం తెలిసిందే. సోమవారం సెన్సెక్స్ 1,375 పాయింట్లు నష్టపోయి 28,440 వద్ద, నిఫ్టీ 379 పాయింట్లు కోల్పోయి 8,281 వద్ద క్లోజ్ అయింది. ఈ రోజు లాభాల్లో ఆరంభించాయి. ప్రీఓపెన్ మార్కెట్‌లో సెన్సెక్స్ 622 పాయింట్లు ఎగిసింది. నిఫ్టీ 290 పాయింట్లు లాభపడింది.

రూపాయి 9 పైసలు బలపడి 75.52 వద్ద ట్రేడింగ్ ప్రారంభించింది. అంతకుముందు సెషన్‌లో 75.61 వద్ద క్లోజ్ అయింది. సెన్సెక్స్ ఉదయం గం.09:19 సమయానికి 550.55 పాయింట్లు (1.94%) ఎగిసి 28,990.87 వద్ద, నిఫ్టీ 174.50 పాయింట్లు (2.11%) లాభపడి 8,455.60 వద్ద ప్రారంభమైంది. 513 షేర్లు లాభాల్లో, 82 షేర్లు నష్టాల్లో ట్రేడింగ్ ప్రారంభించగా, 27 షేర్లలో ఎలాంటి మార్పు లేదు. హిండాల్కో ఇండస్ట్రీస్, హెచ్‌డీఎఫ్‌సీ, జేఎస్‌డబ్ల్యు స్టీల్, వేదాంత, టెక్ మహీంద్రా లాభాల్లో ట్రేడింగ్ ప్రారంభించాయి.