ఇండియాలోకి మెటా వెరిఫైడ్ సర్వీస్.. ఇన్‌స్టాగ్రామ్, ఫేస్‌బుక్‌ యూజర్స్‌కు ఇక ఛార్జీల మోతే..

Meta: ట్విట్టర్‌ను ఎలాన్ మస్క్ హస్తగతం చేసుకున్న తరువాత పలు మార్పులు జరిగిన సంగతి తెలిసిందే. వాటిలో బ్లూటిక్ బాగా పాపులర్ అయింది. ఇందుకోసం కొంత ప్రీమియం చెల్లించి సబ్‌స్క్రిప్షన్ తీసుకోవాల్సి ఉంటుంది. ఇదే తరహాలో తాజాగా మెటా సైతం వైరిఫైడ్‌ను ప్రారంభించింది. గతంలో UK, US, ఆస్ట్రేలియా, న్యూజిలాండ్‌లో ఇది అమల్లో ఉండగా.. ఇప్పుడు ఇండియాలోనూ అందుబాటులోకి వచ్చింది.

USలో ఇన్‌స్టాగ్రామ్, ఫేస్‌ బుక్‌ లలో మెటా వెరిఫైడ్‌ను కంపెనీ విడుదల చేస్తున్నట్లు సంస్థ CEO మార్క్ జుకర్‌బర్గ్ మార్చిలోనే ప్రకటించారు. వినియోగదారులు తమ ఇన్‌స్టాగ్రామ్ మరియు ఫేస్‌బుక్ ఖాతాలలో నెలవారీ కొంత మొత్తం చెల్లించి "బ్లూ టిక్ మార్క్"ని పొందడానికి అనుమతించారు. ఈ సర్వీసు మొదట ఆస్ట్రేలియా మరియు న్యూజిలాండ్‌లో అందుబాటులో ఉంది. కాగా ఇప్పుడు భారతదేశానికీ విస్తరించింది. ఇదే విషయాన్ని జుకర్‌బర్గ్ తన ఇన్‌స్టాగ్రామ్ బ్రాడ్‌కాస్ట్ ఛానెల్ ద్వారా ప్రకటించారు.

ఈ సేవలు UKలో ఇప్పటికే అందుబాటులో ఉండగా.. గత వారం కెనడాలోనూ టెస్టింగ్ ప్రాంరంభం కానుందని మోటా బాస్ వెల్లడించారు. "మేము ఈ రోజు నుంచి టెస్టింగ్‌ను భారతదేశానికి విస్తరిస్తున్నాము. రాబోయే రెండు వారాల్లో అర్హత ఉన్న ప్రతి ఒక్కరికీ దీన్ని ఇన్‌స్టాగ్రామ్ మరియు ఫేస్‌బుక్‌లో విడుదల చేస్తాము" అని కంపెనీ ప్రతినిధి స్పష్టం చేశారు.

ఇన్‌స్టాగ్రామ్ మరియు ఫేస్‌బుక్ యొక్క మాతృ సంస్థ మెటా.. ఈ ఏడాది మార్చిలో మెటా వెరిఫైడ్ వెయిట్‌లిస్ట్‌ను తెరిచింది. మెటా వెరిఫైడ్ అనేది సబ్‌స్క్రిప్షన్ సర్వీస్ అని దాని అధినేత జుకర్‌బర్గ్ ఒక ఇన్‌స్టాగ్రామ్ పోస్ట్‌లో తెలిపారు. వినియోగదారులు తమ ఖాతాను ప్రభుత్వ IDతో ధృవీకరించడానికి ఇది అనుమతిస్తుంది. తద్వారా తమ ప్రొఫైల్‌లపై ఆయా వ్యక్తులు బ్లూ టిక్‌ కలిగి ఉండవచ్చు. డ్యూప్లికెట్ ఖాతాల నుంచి అదనపు రక్షణ కవచంగా ఉపయోగపడుతుంది. ఫేస్‌ బుక్‌ మరియు ఇన్‌స్టాగ్రామ్‌ స్టోరీస్, రీల్స్‌లో ప్రత్యేకమైన స్టిక్కర్‌లను కలిగి ఉంటారు.

మెటా ప్రకారం సభ్యత్వాన్ని నేరుగా ఇన్‌స్టాగ్రామ్ మరియు ఫేస్‌ బుక్‌ లో కొనుగోలు చేయవచ్చు. iOS మరియు అండ్రాయిడ్ వినియోగదారులు సభ్యత్యం కోసం నెలవారీ రుసుము 699 చెల్లించాల్సి ఉంటుంది. ఈ సౌకర్యాన్ని వెబ్‌ వెర్షన్స్‌కూ విస్తరింపజేస్తామని నెలకు 599కి అందుబాటులో ఉంచుతామని కంపెనీ పేర్కొంది. ఇప్పటికే వెరిఫై చేయబడిన వారి కోసం మెటా "లెగసీ బ్లూ బ్యాడ్జ్" వర్తింపచేయనున్నట్లు తెలిపింది.