HNIs: భారీగా ఇండియా వదిలి వెళ్తున్న కోటీశ్వరులు.. ఎంతమంది సంపదను తరలిస్తున్నారంటే..

HNIs: ప్రపంచవ్యాప్తంగా సంపద,పెట్టుబడి కదలికలను హెన్లీ అనే ప్రైవేట్ వెల్త్ మైగ్రేషన్ సంస్థ పర్యవేక్షిస్తూ ఉంటుంది. 2023కి గాను ఈ మేరకు ఓ నివేదికను ఆ సంస్థ విడుదల చేసింది. దాని ప్రకారం 6 వేల 500 మంది అధిక-నికర-విలువ కలిగిన వ్యక్తులు (HNIలు) భారతదేశాన్ని విడిచిపెట్టి వెళ్లే అవకాశం ఉందని అంచనా వేసింది.

చైనా ఈ సంవత్సరం 13 వేల 500 మంది HNIలను కోల్పోతుందని నివేదిక వెల్లడించింది. గతేడాది నిష్క్రమించగా మిగిలిన వారిలో 7 వేల 500 మంది మిలియనీర్లు ఈసారి దేశాన్ని విడిచి వెళ్లనున్నట్లు తెలుస్తోంది. అయితే భారత్‌ మాత్రం అంతగా ఆందోళన చెందాల్సిన అవసరం లేదని, కొత్త మిలియనీర్లను ఉత్పత్తి చేయగలదని పేర్కొంది.

2031 నాటికి అధిక నికర-విలువ గల జనాభాలో పెరుగుదల 80 శాతం ఉంటుందని నివేదిక తెలిపింది. ఇదే సమయంలో భారత్ వేగవంతమైన వృద్ధి రేటుతో ప్రపంచ సంపద మార్కెట్‌లలో ఒకటిగా మారుతుందని అంచనా వేసింది. ఆర్థిక సేవలు, ఆరోగ్య సంరక్షణ మరియు ఇతర రంగాలు ఈ అభివృద్ధిని ముందుండి నడిపిస్తాయని భావిస్తోంది.

జీవన ప్రమాణాలు పెరిగేకొద్దీ పలువురు సంపన్నులు తిరిగి ఇండియాకి వచ్చే ధోరణిని కూడా గమనించినట్లు హెన్లీ నివేదిక వెల్లడించింది. ప్రపంచవ్యాప్తంగా డబ్బు తరలింపు నమూనాలను పదేళ్లకు పైగా పర్యవేక్షిస్తున్న న్యూ వరల్డ్ మనీ అనే సంస్థ ప్రకారం, UKలో 3 వేల 200 మంది మిలియనీర్లు ఉండగా.. రష్యాలో 3 వేల మంది HNIలు ఉంటారు.