adani: గ్రీన్ లో ట్రేడయిన అదానీ కంపెనీలు.. కారణం ఏమిటంటే..

adani: హిండెన్ బర్గ్ నివేదిక అనంతరం అదానీ గ్రూపు లక్షల కోట్ల రూపాయలు మేర నష్టపోవడం తెలిసిందే. ఈ వ్యవహారంపై సుప్రీంకోర్టులో రెండు ప్రజా ప్రయోజన వ్యాజ్యాలు దాఖలయ్యాయి. ఉన్నత న్యాయస్థానం విషయంపై విచారణ సైతం చేపట్టింది. ప్రభుత్వంతో సంబంధం లేకుండా ఓ కమిటీని నియమిస్తామని స్పష్టం చేసింది. కాగా ఈరోజు న్యాయస్థానంలో దీనిపై మరోసారి విచారణ జరిగింది. అయితే పెట్టుబడిదారుల విశ్వాసాన్ని చూరగొనడానికి కంపెనీ చేస్తున్న ప్రయత్నాలకు కోర్టు సహకరించినట్లయింది.

సుప్రీం ఆదేశాలివి:

సెక్యూరిటీల చట్టాన్ని అదానీ గ్రూపు ఉల్లంఘించిందో, లేదో దర్యాప్తు చేయవలసినదిగా సెక్యూరిటీ ఎక్స్ఛేంజ్ బోర్డ్ ఆఫ్ ఇండియా(SEBI)ను సుప్రీంకోర్టు ఆదేశించింది. గ్రూపు ఛైర్మన్ గౌతమ్ అదానీ సైతం న్యాయస్థానం తీర్పుపై ట్విట్టర్ లో స్పందించారు. కోర్టు ఆదేశాలను స్వాగతిస్తున్నట్లు తెలిపారు. సత్యమే గెలుస్తుందని ఆశాభావం వ్యక్తం చేశారు. ఈ ఘటన పెట్టుబడిదారుల్లో నమ్మకం పెంచినట్లయింది. ఇది జరిగిన తర్వాత అదానీ కంపెనీలు గ్రీన్ లో ట్రేడింగ్ కావడం ప్రారంభించాయి.

భారీగా బ్లాక్ డీల్స్:

సావరింగ్ వెల్త్ ఫండ్ ద్వారా 3 బిలియన్ డాలర్ల క్రెడిట్ లైన్ తీసుకోనున్నట్లు బయటకు వచ్చిన నివేదికలను అదానీ గ్రూపు తిరస్కరించడం తెలిసిందే. అయితే బ్లాక్ డీల్ విండోలో మాత్రం పెద్ద ఎత్తున ఆసక్తి కనబరచింది. అదానీ ఎంటర్ ప్రైజెస్ లో 3.5 శాతం అంటే 3.9 కోట్ల షేర్లు నిన్న చేతులు మారాయి. వీటి విలువ రూ.5,520 కోట్ల రూపాయలు ఉంటుందని అంచనా. దానితో పాటు అదానీ పోర్ట్స్, అదానీ ట్రాన్స్ మిషన్, అదానీ గ్రీన్ ఎనర్జీల్లో సైతం 4.1, 2.5, 3.5 శాతం చొప్పున బ్లాక్ డీల్స్ జరిగినట్లు తెలుస్తోంది.

అప్పర్ సర్క్యూట్లలో..

ఈ బ్లాక్ డీల్స్ అనంతరం.. మార్కెట్ ఓపెన్ కావడంతోనే అదానీ గ్రీన్, అదానీ ట్రాన్స్ మిషన్ షేర్లు 5 శాతం అప్పర్ సర్క్యూట్ ని తాకాయి. మొదట్లో రెడ్ లో ట్రేడింగ్ కొనసాగించిన అదానీ ఎంటర్ ప్రైజెస్ తిరిగి బౌన్స్ బ్యాక్ అయింది. మధ్యాహ్నం 12 గంటల సమయంలో 1,407 రూపాయల నుంచి 1,607 కి చేరింది. అదానీ పోర్ట్స్ సైతం నిన్నటి క్లోజింగ్ తో పోలిస్తే 0.6 శాతం వృద్ధి కనపరిచింది.