Bengaluru: బెంగళూరుకు పోటీగా మరో నగరం.. ఫ్యూచర్ ఐటీ హబ్‌గా మారుతున్న 'సిలికాన్ బీచ్'!

భారతదేశ ఐటీ రాజధాని అంటే మనకు వెంటనే గుర్తుకు వచ్చేది బెంగళూరు (Bengaluru). కానీ, ఇప్పుడు ఆ నగరానికి గట్టి పోటీ ఇచ్చేందుకు మరో కోస్తా తీర నగరం సిద్ధమవుతోంది. ఇది గుర్గావ్ కాదు, హైదరాబాద్ అంతకంటే కాదు. చార్టర్డ్ అకౌంటెంట్ సార్థక్ ఆహుజా తన లింక్డ్ఇన్ పోస్ట్‌లో పంచుకున్న వివరాల ప్రకారం.. కర్ణాటకలోని మంగళూరు నగరం భవిష్యత్తులో దేశంలోనే అతిపెద్ద ఐటీ హబ్‌లలో ఒకటిగా అవతరించబోతోంది. తక్కువ ఖర్చు, మెరుగైన జీవన ప్రమాణాలతో ఈ నగరం టెక్కీలను ఆకర్షిస్తోంది.

అంకెల్లో మంగళూరు వృద్ధి!

ప్రస్తుతం మంగళూరులో సుమారు 20,000 మంది ఐటీ ఉద్యోగులు మాత్రమే పనిచేస్తున్నారు. కానీ, రాబోయే ఎనిమిదేళ్లలో ఈ సంఖ్య ఏకంగా 2 లక్షలకు చేరుతుందని అంచనా. కేవలం రెండేళ్ల వ్యవధిలోనే ఇక్కడి ఐటీ ఆదాయం రూ. 3,200 కోట్ల నుంచి రూ. 5,000 కోట్లకు పెరగడం ఈ వృద్ధికి నిదర్శనం. 'బోస్ కార్పొరేషన్' వంటి గ్లోబల్ కంపెనీలు తమ రీసెర్చ్ అండ్ డెవలప్‌మెంట్ సెంటర్లను ఇక్కడ ఏర్పాటు చేయడం వల్ల ఈ ప్రాంతానికి ప్రాధాన్యత పెరిగింది.

తక్కువ అద్దెలు.. మెరుగైన జీవనశైలి

మంగళూరుకు ఉన్న అతిపెద్ద ప్లస్ పాయింట్.. తక్కువ జీవన వ్యయం. బెంగళూరు (Bengaluru), హైదరాబాద్ లేదా పూణేతో పోలిస్తే ఇక్కడ ఆఫీస్ స్పేస్ అద్దెలు 30 శాతం తక్కువగా ఉన్నాయి. ట్రాఫిక్ సమస్యలు దాదాపు లేకపోవడం వల్ల నగరంలో ఎక్కడికైనా కేవలం 15 నిమిషాల్లో చేరుకోవచ్చు. ఇక ఇళ్ల విషయానికి వస్తే, రూ. 50 లక్షల నుంచి రూ. 1 కోటి లోపు మంచి 2-BHK ఫ్లాట్లు లభిస్తున్నాయి. ముంబై, బెంగళూరు వంటి నగరాల్లో నెలవారీ ఖర్చుల భారంతో సతమతమవుతున్న కుటుంబాలకు మంగళూరు ఒక అద్భుతమైన ప్రత్యామ్నాయంగా కనిపిస్తోంది.

సిలికాన్ బీచ్ వైపు అడుగులు

మంగళూరును ఇప్పుడు "సిలికాన్ బీచ్" అని పిలుస్తున్నారు. ఈ నగరాన్ని ఐటీ హబ్‌గా మార్చడానికి కర్ణాటక ప్రభుత్వం భారీగా ప్రోత్సాహకాలను అందిస్తోంది. అద్దెపై సబ్సిడీలు, పన్ను మినహాయింపులు , విద్యుత్ ఛార్జీలలో రాయితీలు ఇస్తోంది. అంతేకాకుండా, ఆర్టిఫిషియల్ ఇంటెలిజెన్స్ (AI), బ్లాక్‌చైన్ , క్వాంటం కంప్యూటింగ్ వంటి అధునాతన సాంకేతికతలపై పరిశోధనలు చేసే కంపెనీలకు ఆర్థిక సహాయం కూడా అందిస్తోంది. ఏటా 10,000 మంది ఇంజనీరింగ్ గ్రాడ్యుయేట్లను ఉత్పత్తి చేసే విద్యాసంస్థలు ఉండటం ఈ నగరానికి మరో ప్రధాన బలం.

ఫ్యూచర్ స్టార్టప్ హబ్

ప్రస్తుత ఐటీ రంగ పరిస్థితులను గమనిస్తే, హైబ్రిడ్ వర్కింగ్ కల్చర్ కూడా మంగళూరు వంటి నగరాలకు వరంగా మారింది. తమ సొంత ప్రాంతాలకు దగ్గరగా ఉంటూ మెరుగైన ప్యాకేజీలతో పనిచేయాలనుకునే టెక్కీలకు మంగళూరు ఫస్ట్ ఛాయిస్‌గా మారుతోంది. తీర ప్రాంత వాతావరణం, మెరుగైన మౌలిక సదుపాయాలు , నాణ్యమైన విద్యా సంస్థలు ఈ నగరాన్ని 'స్టార్టప్ హబ్'గా కూడా మారుస్తున్నాయి. ప్రభుత్వం అందిస్తున్న పన్ను రాయితీలు చిన్న , మధ్యతరహా ఐటీ కంపెనీలకు గొప్ప ఊతాన్నిస్తున్నాయి. దీనివల్ల స్థానికంగా ఉపాధి పెరగడమే కాకుండా, నగరం యొక్క ఆర్థిక ముఖచిత్రం కూడా వేగంగా మారిపోతోంది.

మొత్తంగా చెప్పాలంటే, బెంగళూరులో ప్రస్తుతం ఉన్న అధిక అద్దెలు, ట్రాఫిక్ సమస్యలు , జీవన వ్యయం వల్ల చాలా కంపెనీలు ఇప్పుడు ద్వితీయ శ్రేణి నగరాల (Tier-2 cities) వైపు చూస్తున్నాయి. మంగళూరు వంటి నగరాల్లో ప్రతిభావంతులైన యువత ఉండటం, ప్రభుత్వం నుంచి పూర్తి మద్దతు లభించడం వల్ల భవిష్యత్తులో ఐటీ రంగం విస్తరణ ఇక్కడ వేగంగా జరగనుంది. ఉద్యోగులకు కూడా తక్కువ ఖర్చుతో కూడిన ప్రశాంతమైన జీవనం లభిస్తుంది. కాబట్టి రాబోయే దశాబ్దంలో బెంగళూరు (Bengaluru) కి అసలైన ప్రత్యర్థిగా మంగళూరు నిలిచినా ఆశ్చర్యపోనక్కర్లేదు.