వెంటిలెటర్లు తయారు చేయనున్న మహీంద్రా, వేతనమంతా కరనా ఫండ్‌కు ఆనంద్ మహీంద్రా

కరోనా మహమ్మారిలో భారత్ మూడో దశకు సమీపంలో ఉంది. మూడు వందల మందికి పైగా కరోనా బారిన పడ్డారు. ఇప్పటికే ఆదివారం ప్రధాని నరేంద్ర మోడీ జనతా కర్ఫ్యూకు పిలుపునిచ్చారు. పంజాబ్ వంటి రాష్ట్రాలు మరో రెండు రోజుల పాటు దీనిని పొడిగించాలని భావిస్తున్నాయి. తెలంగాణ, ఆంధ్రప్రదేశ్ వంటి రాష్ట్రాలు కూడా ఆ దిశగా ఆలోచిస్తున్నాయి. కరోనా నేపథ్యంలో పారిశ్రామికవేత్తలు, వ్యాపారులు తమకు తోచిన సహాయం చేస్తున్నారు.

ఇందులో భాగంగా ఆనంద్ మహీంద్రా నేతృత్వంలోని మహీంద్రా గ్రూప్ తమ ఫ్యాక్టరీలలో వెంటిలెటర్లను ఉత్పత్తి చేస్తామని ప్రకటించింది. కరోనాపై పోరాడే ప్రయత్నంలో భాగంగా తాము ఈ నిర్ణయం తీసుకున్నట్లు తెలిపింది. ఈ మేరకు ఆనంద్ మహీంద్రా ట్వీట్ చేశారు. మహీంద్రాలో వెంటిలెటర్లు తయారు చేయనున్నామని, అలాగే, మహీంద్రా హాలీడేస్‌లను తాత్కాలిక సంరక్షణ కేంద్రాలుగా అందించేందుకు సిద్ధంగా ఉన్నామని తెలిపారు.

అంతేకాదు, తన 100 శాతం వేతనాన్ని కేంద్ర ప్రభుత్వం కరోనా ఫండ్‌కు అందించనున్నట్లు తెలిపారు. కేవలం ఈ నెల వేతనమే కాకుండా, మరికొన్ని నెలల పాటు దీనిని అందిస్తానని తెలిపారు. అదే విధంగా ఇతర పారిశ్రామికవేత్తలు, వ్యాపారవేత్తలు కూడా సహకరించాలని కోరారు. ఇలాంటి కీలక సమయంలో ప్రభుత్వానికి అండగా ఉందామన్నారు.