Dividend Stock: వావ్.. ఒక్కో షేరుకు రూ.110 డివిడెండ్.. రికార్డు తేదీ వివరాలు..

Dividend Stock: ఇంతకు ముందు కరోనాతో అనేక వ్యాపారాలు కుదేలైనప్పటికీ.. ప్రస్తుతం మంచి రాబడులను ప్రకటిస్తున్నాయి. దీంతో తమ పెట్టుబడిదారులకు సైతం తాము సంపాదించిన లాభాలను చాలా కంపెనీలు పంచుతూ వారిని ధనవంతులుగా మార్చేస్తున్నాయి.

ఈ క్రమంలోనే మహారాష్ట్ర స్కూటర్స్ కంపెనీ ఇన్వెస్టర్లకు అతిపెద్ద శుభవార్తను ప్రకటించింది. దీంతో ఈ కంపెనీ షేర్లపై పందెం కాసిన ఇన్వెస్టర్లు సంతోషంలో ఉన్నారు. కంపెనీ ఒక్కో షేరుపై రూ.110 డివిడెండ్ రూపంలో చెల్లించాలని నిర్ణయించింది. రానున్న వారం స్టాక్ మార్కెట్‌లో కంపెనీ ఎక్స్-డివిడెండ్ స్టాక్‌గా ట్రేడ్ అవుతుంది. అందుకే చాలా మంది ఇన్వెస్టర్ల కళ్లు ప్రస్తుతం ఈ కంపెనీ షేర్లపై పడ్డాయి.

మహారాష్ట్ర స్కూటర్స్ రూ.10 ఫేస్ వ్యాల్యూ కలిగిన ఒక్కో షేరుపై 1100 శాతం డివిడెండ్ చెల్లించాలని నిర్ణయించింది. అంటే అర్హులైన షేర్ హోల్డర్లకు ఒక్కో స్టాక్ పై రూ.110 డివిడెండ్ అందనుంది. దీనికోసం కంపెనీ సెప్టెంబర్ 15, 2023ను రికార్డు తేదీగా ప్రకటించింది. అంటే ఈ తేదీ నాటికి కంపెనీ రికార్డ్ బుక్‌లో పేరు ఉన్న ఏ పెట్టుబడిదారుడైనా ఒక్కో షేరుపై రూ.110 లాభాన్ని పొందుతారు.

శుక్రవారం కంపెనీ షేర్లు రూ.7,567 ధర వద్ద తమ మార్కెట్ ప్రయాణాన్ని ముగించాయి. గత నెలలో కంపెనీ షేర్ ధర దాదాపు 21 శాతానికి పైగా పెరిగాయి. అదే 6 నెలల క్రితం ఈ కంపెనీలో షేర్లను కొనుగోలు చేసిన ఎవరైనా పెట్టుబడిదారులు ఇప్పటి వరకు తమ హోల్డింగ్‌లో 82 శాతం లాభం పొందారు. ప్రస్తుతం కంపెనీ తన 52 వారాల గరిష్ఠ స్థాయి అయిన రూ.7,799కి సమీపంలో ట్రేడింగ్ కొనసాగిస్తోంది.