మద్రాసు హైకోర్టు కీలక తీర్పు.. దృష్టిలోపం ఉన్న మహిళ కారుకు రోడ్‌ ట్యాక్స్, GST మినహాయింపు

దృష్టిలోపం ఉన్న మహిళ పిటిషన్‌ పై మద్రాసు హైకోర్టు కీలక తీర్పు వెలువరించింది. తన సొంత అవసరాల కోసం కొత్త కారు కొనాలని యోచించగా.. మోటారు వాహనాల, GST చెల్లింపు నుంచి ఆమెకు మినహాయింపు ఇచ్చింది. దృష్టిలోపం ఉన్నవారికి ఈ రాయితీలు ఇవ్వకపోవడం గమనార్హం.

తమిళనాడులోని తిరునల్వేలి జిల్లాకు చెందిన కారునియా శీలవతి ప్రయాణాల కోసం ఇతరులపై ఆధారపడుతోంది. అందువల్ల కొత్త కారు కొనుగోలు చేయాలని భావించింది. వికలాంగుల కోసం రూపొందించిన మోటారు వాహనాల చట్టం 1974, GO 1976 ప్రకారం పన్ను మినహాయింపు ఇవ్వాలని కోరింది. ఆర్థో లేదా లోకోమోటర్ వైకల్యం ఉన్న వారికి మాత్రమే ఇవి వర్తిస్తాయని అధికారులు తిరస్కరించారు.

పూర్తి అంధత్వంతో, వినికిడి లోపంతో బాధపడుతున్న వారు స్వయంగా వాహనం నడపలేరని వికలాంగుల కమిషన్ పేర్కొంది. అయితే దృష్టిలోపం ఉన్న వ్యక్తులు కూడా వికలాంగుల కేటగిరీకి చెందినవారేనని తెలిపింది. వారికి GST, రోడ్డు, టోల్ ట్యాక్స్ మొదలైన వాటిలో రాయితీ ఇవ్వడానికి అనుగుణంగా ప్రభుత్వం GOలకు సవరణలు చేయాలని సిఫారసు చేసింది.

దృష్టిలోపం ఉన్నవారు ప్రభుత్వ రంగంలోనూ ఉద్యోగావకాశాలు పొందుతున్నారని న్యాయమూర్తి అభిప్రాయపడ్డారు. వారు ఆఫీస్‌ కు వెళ్లడం సవాలుగా మారిందన్నారు. ఈ కేసులో పిటిషనర్‌కు మినహాయింపులు ఇవ్వాలని తీర్పు ఇచ్చారు. మోటారు వాహనాల పన్ను మరియు GST నుంచి మినహాయింపుకు అవసరమైన ఉత్తర్వులను నాలుగు వారాల్లో జారీ చేసేలా చూడాలని సంబంధిత అధికారులను ఆదేశించారు.